67
Eya manyuḵ gway mo ka shu/ kun buḵu mo. Gway jin yuḵu mo jin ta gway mo.
1 Dhalka Arumgimis mii mii ma ’the gom am mo dhali ’bor am mii mo
dhali kar bwam/em piti mmokush mo ap̱o/ aman mo,
Doshi ma dhali ’cunycuri yan mo.
2 ki bway pini minu mish mo ap̱o/ mony’cesh mo,
dhali mom’bi’th pini jin tana /e ata is ki me’d mo e bwaman kal gi ’kwaniny’cesh mo.
3 Dhalki ’kwani maŋ /e mo, ayy Arumgimis.
Dhalka ris ’kwani ’baar mo maŋ /e mo.
4 Dhalki kal gi ’kwaniny’cesh yuḵ gway ki mom’bor bwa mo dhali ki moŋ’kuny bwa mo,
haali/ /e dwallki ’kwani gwo ki dar gi mii ma gwar ’de/ mo,
dhali shu kal gi ’kwaniny’cesh bway ap̱o/ mony’cesh mo.
Doshi ma dhali ’cunycuri yan mo.
5 Dhalki ’kwani maŋ /e mo, ayy Arumgimis.
Dhalka ris ’kwani ’baar mo maŋ /e mo.
6 Mony’cesh gwono’dki maman piti jin markina a’di is mo.
Arumgimis jin ta’da Arumgimis bam mo, a’di ’borki am mii mo.
7 Arumgimis ’borki am mii mo.
Dhalka ris ’kwani kun ’kon e ’pemen gi mony’cesh mo ḵo/ a’di mo.