1 Ayy Arumgimis, ki to jin ta’da ta iṯa’kkina /e amana sho ki sule/ sule/ kan mo?

Ki to jin ta’da ta idhala /eya nyor pini i ya ku’d ap̱o/ ḵa’bal pini kun tana shon dhii/i’d mo?

2 Kayi dhana tul ’kup̱ ’kwanim pini e mo, uni gun takina /e ’peni kadhamo/ mo,

uni kun wankina /e ’ba/ mo mmota waḵ gom mal pini mo.

Kayi ’Kuwosh ma Sihyuun e mo e mo yan jin c̱a’bkina /e mo.

3 C̱uthi /e ŋaṯgin pini e mo jin ’tuḵkunu ki sule/ sule/ mo.

Uni gun ta ’kup̱ ki ’kup̱ mo tani ’ce’dkina ris to sho’k mo e mo jin ḵogu mo.

4 Uni gun ta ’kup̱ ki /e mo tani aŋkarkin e bwaman mom pini jin ḵogu mo.

Uni thumkina bereḵ buniŋ gana/ mo mmota jamas mo.

5 Dhali e ’twaŋkal gu’b isi mis mo tani uni ki jep̱

cwandher bwa ka thurmany mo.

6 Dhali yan’ko’d aris cwa kun ’cimudhu bwa mo tani

uni ’ce’d uni ka ’cesh ka thurmanya ba’d’ban mo dhali ki ’dorro/ mo.

7 Uni ki c̱i’th mom pini jin ḵogu ki o’d mo.

Uni ki shi/a ’cesh pini jin c̱a’ba /e ki gway pini mo.

8 Uni ki o gwo e is buni mo ki: Ana mina uṯẖ uni ’baar mo.

Uni ki c̱itha ris mo jin tulu is goma Arumgimis e mo yan mo.

9 Ana ’konaki p̱ar jamas bana e mo.

Dhala manc̱i gwoŋ kamu/ di’da?

Dhali jaŋ kamu/ di’di bwam ana jin mishi gwo ki mii yan midi ta ata?

10 Ayy Arumgimisa, /e mini dhal ’kwani kun ta ’kup̱ bway mo mmo’theḵ shushi mis ki rash rash kan ntagi mo gi wakata mo?

A/’kwani kun ta ’kup̱ ki /e mini sor gway pini ki sule/ sule/ kan mo?

11 Ki to jin ta’da ta si’da/ igukina /e me’d pini ka nyaŋ’ko’d mo?

Ki to jin ta’da ta ikarkina /e me’d pini e bwambor pini mo?

12 Hili Arumgimis jin ta’da maliḵ pem mo a’di jin diki’d ’peni kadhamo/ mo,

jin miiki bway gi mowoṯẖ e bwaman gi mony’cesh mo.

13 /E ki ḵwa/ dhan yi’de/ bwa ki mii ma dem dem pini mo.

/E ki ’ce’d ’kup̱ ma dhan tasha/ ki bwam yi’de/ mo.

14 /E ki pwaṯẖ ’kup̱ gi dhan to yi’de/ mo,

dhali /e ki c̱i a’di mmota tonṯe/ gom uni kun uḵu kun ’kon e bwaasho mo.

15 /E ki tirki wosh mo dhali ḵa’d a’di ’twa/ mo dhali du’d yi’de/ mo dhali yi’de/ ki ’thonthor mo.

/E ki ḵu’thki yi’de/ jin sokin e bwam ma gap̱ mo.

16 Atee ta jim pini mo. Mon’thiny si’da/ ta jim pini mo.

/E ṯelki moŋkush gi momis sho’k mo dhala tente/ mo.

17 /E thosonkina ris gwayu/ gi mony’cesh mo.

/E karki moyurantee mo dhali mondiṯ mo.

18 Kayi gwo yan e mo ma, ayy Tap̱a, ’kwani kun ta ’kup̱ ’theḵki shushi mis kata sa/ mo?

dhali ’kwani kun ’koki dhu mii gun ḵogu mo tani waḵki gway pini mo be.

19 Dhalku/ ki c̱iya ḵashira/ gi gurkom pini ki tom bwaasho mo.

Dhalku/ ki ŋa mondiki/e gi a’dim pini jin hatha’ko’d ki sule/ sule/ mo.

20 Kari gwom pini jin gamu me’d mo.

Haali/ mo gi mondhurumi’d gi mony’cesh mo tani a’di ’tu’dkunu mo ki ’kwani gwahan kun bujurkina bujur mo.

21 Dhalku/ ki dhal uni gwansan bway mo kun yap̱kunu ki sho’k mo mmodhu ki mo ma ’the is mo.

Dhalki uni kun hatha’ko’d dhali kun mini mii ta gi to mo maŋ gway pini mo.

22 Cuyi mis mo, ayy Arumgimis, dhali muri is mo gom mii jin midi raḵ /e mo.

Kayi gwo e ki uni gwahan kun ushi gwo kun ḵogu dhu ’theḵi /e shushi is ka tee ’baar mo.

23 Dhalku/ ki ŋa cuuwa/ jin cuuna ’kwani kun ta ’kup̱ ki /e mo,

abomboḵ ’peni ’kwani kun ta ’kup̱ ki /e ka ris mo, a’di jin yaki’d ka ’kulam ’pen mo.