1 Ayy c̱iyi mo jin ’boruwa ’bor bwa i is ki Tap̱a mo, dhali yuḵi gway piti mo.

Kari eya tente/ mii gi tom piti e bwaman ’kwani mo.

2 Yuḵi gway e a’di mo, yuḵi gway mmomaŋ a’di mo,

ṯori aris to kun miina a’di ki momer mo.

3 Cayi mo e gway piti jin ḵogu mo.

Dhalka du gi uni gwansan kun simmki Tap̱a e mo tani ’kunya bwa mo.

4 Simmi Tap̱a e mo dhali mom’bi’th piti mo,

simmi buŋ’kus piti e ki ṯikir ṯikir mo.

5 Kayi momer piti e jin miikina a’di mo,

a’di jin ta miimer piti mo dhali gwon dwall kun toru ’twa/a ’cesh jin bahkina a’di mo,

6 ayy emen ma Ibrahiim jin ta c̱iŋkinam piti mo,

um kun ta iya/ ma Yakuub mo, kun ta kum piti kun kwanykina a’di mo.

7 A’di ta Tap̱a ma Arumgimis bana mo.

Gwon dwall piti kun toru gwo ’twa/a ’cesh mo tani a’di idiki’da p̱owa ris mony’ceshi ’baar mo.

8 A’di tana bwam piti pa ki pa gom gwom piti jin gama a’di me’d ki sule/ sule/ mo,

gom gwom piti jin ḵankina a’diya ḵan goma alip̱ ma risa nyaḵum yil ’kwani mo,

9 gwo jin gamkina a’di me’d nyaḵka Ibrahiim mo,

dhali gwom piti jin thulkina a’di me’da p̱o/ mmo/o is goma Is/hak mo,

10 a’di jin rwa’ckina a’di eya Yakuub mo me’d gwoŋḵan jin bahu mo,

dhali eya Israyiil me’d gwoŋḵan yan jin gamu me’d mo jin midi di ki sule/ sule/ mo,

11 mmo/o gwo mo ki: E um mo tani aha/ mina c̱i um mony’cesh gi Paŋ Kanaan mo

mmota a’di jin mina umi ’tuntul bwa ime’d mo mmota mal bum mo.

12 Ki uni ’kon ki daḵa/ ka ris buni mo,

ki uni ta jasi ara ushalaŋ gana/ mo, ki iimpem buni e a’di mo,

13 mmo/iikina uni ki ii ma c̱a/ ’peni kal gi ’kwaniny’cesh mmotan kal gi ’kwaniny’cesh mo,

’peni bampa/ gi ’peŋkuman bampaŋ kamu/ itagi ’kwanin tiya mo,

14 a’di diki dhal jan ’deŋ kamu/ bway mo mmosiri’c uni ap̱o/ ki sho’k mo.

A’di ḵucurki imaliḵ gom gway buni mo

15 mmo/o gwo mo ki: Dhalku/ ki ta unim pem kun kwanyka/ is ki me’d mo,

dhalku/ ki mii to shi/ka/ ap̱o/ imanc̱i gwom pem mo.

16 Ki a’di yuḵki ṯe/ ap̱o/ mony’cesh mo,

dhali ’ce’da ris tonṯe/ ’baar mo kun miinu ime’d mo,

17 a’di ki hash wathi/ mmoya iṯwa/a/ ki uni mo,

a’di jin ta’da Yuusup̱ mo, a’di jin yolkunu mmota c̱iŋkina/ mo.

18 ’Basho’k piti a’di shi/kunu ka maḵḵiyya mo,

dhali ’ba/ piti a’di re’dkunu ka dhan neran toŋḵuthu’d mo

19 ntagi gwo jin ona a’di mo p̱u’dki’d mo ki jim pe mo

dhali gwo gi Tap̱a nyo/ki a’di mo.

20 Dhala maliḵ hashki’da hash mo dhali ’cuḵ a’di mo be,

dhali tap̱a gi ’kwani mo tani karki a’di ki ’kus mo,

21 dhali a’di ki kar a’di ki ari tap̱a ap̱o/ gu’b piti mo,

dhali kar a’di ki tap̱a ap̱owa ris tom piti ’baar kun tana a’di mo,

22 mmoye’th uni kun ta iya/ ma maliḵ piti sho’k ki bwam ’boro’d piti mo,

dhali mmoṯor ’kwani gwanyjaḵam piti gwo ki moyuḵ mo.

23 Dhali yan’ko’d Israyiil p̱u’dki’d e Pam Masir mo,

dhala Yakuub p̱u’dki’d ki yaŋ’kus eya ’cesh ma Haam mo.

24 Dhali Tap̱a ki dhu ’kwanim piti mmota uni kun dho’th maman gi dho’th gana/ mo,

dhali mmodhu uni mmota ’kwani kun ’bitha’bi’th mo mmobol ’kwaniŋ ’kup̱ buni e mo.

25 A’di ki ṯuka dum buni mmoshi/ ’kwanim piti i e mo,

mmoṯu/ul nyaḵki uni mmoheka ris c̱iŋkinam piti e mo.

26 A’di ki hasha Musa jin ta c̱iŋkinam piti mo,

dhala Haruun jin kwanykina a’di mo.

27 Uni wagaskunu jamas miim piti e bwam uni mo,

dhali miimer kun miikunu e bampa/ ma Haam mo.

28 A’di hashki mondhurumi’d mo, dhali ’ceṯẖ bampa/ ’tum mo.

Dhali uni pishki is ka le’da p̱o/ gwom piti mo.

29 A’di ṯu’kki ḵumma/ yi’dem buni mmota bas mo,

dhali raḵ wa’c buni isi jwa mo.

30 Bampam buni tashkunu ka buhany ma ’dwa/ mo,

wakan si’da/ e gu’b gi imaliḵ buni mo.

31 A’di oki gwo mo dhali abuhanya ḵanthi/ p̱u’dki’d mo,

dhali arisa shokom ṯẖa’thkin e bampam buni ’baar mo.

32 A’di c̱i uni dhana wasa/ mmohe’th me’da sho’k mo,

dhala wara/ sho’k yan jin dhwa/a’dki mo ki dhwa/a’d dhwa/a’d e bampam buni ’baar mo.

33 A’di ’koshki cwalman ma mura’th buni mo dhala ris cwam p̱u/ mo,

dhali a’di ḵwa/ki cwa gi bampam buni ’baar mo.

34 A’di oki gwo mo dhala kuyu/ p̱u’dkin mo,

dhali ushi emena kuyu/ kun molu deŋ e mo,

35 uni kun loskina ris to kun sinu ki ’kolo’c e bampam buni mo,

dhali uni ki shwa maman cwam buni ’pena ’cesh mo.

36 A’di ki ’kosha ris bwanyaram buni ’peni bampam buni mo,

a’di jin gac̱ki’di ṯwa/a/ ’peni mom’bi’th buni mo.

37 Yan’ko’d a’di ki shuwa Israyiil bway ki ’dolkon kush mo dhali ’dolkon gana/ mo,

dhali jan ṯal ’deŋ kamu/ p̱iyi’d e bwaman ma waḵ piti mo jin kolkunu mo.

38 ’Kwani gi Pam Masir ’bora bwa ki ’bor ki uni iikin mo,

haali/ dhan to jin ḵo/ uni is ’peni ’Kwani ma Israyiil mo tani p̱u’dki’da p̱o/ uni mo.

39 A’di ki p̱a’da raḵ mmokuma kum ’kup̱ mo,

dhali o’d mmoc̱i moŋkush mon’thiny mo.

40 Uni doṯki to mo dhali Arumgimis ki c̱i uni aris ḵusskun mo,

dhali a’di ki c̱i uni tonṯe/ ’peni momis jin ishki’d ka enthus mo.

41 A’di ḵa’dki wosh ’twa/ mo dhali yi’de/ gac̱ki’d ka pije/ mo.

A’di guski’d e bwam ma si’b me’d yi’de/ jin guski’d e bwam wor mo.

42 Haali/ a’di kaki gwom piti e jin ona a’di is jin ḵogu mo,

dhala Ibrahiim jin ta c̱iŋkinam piti mo.

43 Wakan a’di suski ’kwanim piti ka pije/ ki moŋ’kuny bwa mo,

unim piti kun kwanykina a’di mmo/ii gwayi lu/ mo.

44 A’di ki c̱i uni kal gi bampa/ gi ’kwanin tiya mo,

dhali uni bu’thki to gi ’kwanin tiya kun tana uni gi maman buni kun miikina uni to mo,

45 tagi ’kup̱ gwo yan mo ki uni mini ’taki dhu gwoŋḵan piti kun bahu mo,

dhali mii gwoŋḵan piti kun c̱ikunu mo.

Maŋi Tap̱a mo.