1 Dhali aha/ mishkina mo ki Ari Ḵa’bal ’ceeki yiṯ yansan jin ’kuc̱u is ’twa/ mo a’di jin ta jin ’de/ ’peni tiyan pesu/ mo kun ’dap̱kunu ’twa/ mo ka ’diŋkila/ mo, dhali aha/ ciḵkina ’twan ’de/ ’peni to/e kun ’kon ma p̱o/i doŋon kun ’kon ki e mo, mmo/o gwo mo me’d ’twa/ ma sho’k jin dorki’d mo ki: Yayu/ mo. 2 Dhali aha/ p̱arkina mo e mo dhali hili mo mo ma, shumarum kush mo dhali a’di jin merki a’di ap̱o/ mo tani ta’d ga abwa mme’d mo. Dhali toŋ’kup̱ c̱ikunu a’di mo, dhali a’di yaki’d ka pije/ mo mmop̱i mii e mo dhali di gwo ibwa mo mmop̱i mii e mo be.

3 Dhali ki a’di ’ceeki’da ’diŋkila/ ’twa/ mo jin ’kon ma p̱o/i su/ mo tani aha/ ciḵkina ’twa/ ’peni to/e kun ’kon ki e mo kun ’kon ma p̱o/i su/ mo jin o gwo mo ki: Yayu/ mo. 4 Dhali shumaruma kamu/ p̱u’dki’d ka pije/ mo jin c̱a’bki ’tiḵil ’tiḵil mo dhali dhir dhir mo. Dhali a’di jin merki a’di ap̱o/ mo tani a’di dhalkunu bway mo mmobu’th moŋḵu’th is ’peni ’kwaniny’cesh mo, wakan ki ’kwani mini ’kosh jwa ka rem ’kup̱ mo, dhali a’di c̱ikunu dhan gandala turga/ jin caaca mo.

5 Ki a’di ’ceeki’da ’diŋkila/ ’twa/ mo jin ’kon ma p̱o/i kwara mo tani aha/ ciḵkina to/eŋ kamu/ jin ’kon ma p̱o/i kwara jin di ki e mo jin o gwo mo ki: Yayu/ mo. Dhali aha/ p̱arkina mo e mo dhali hili mo mo ma, shumaruma kamu/ p̱u’dki’d mo jin ta’da dhisal mo, dhali a’di jin merki a’di ap̱o/ mo tani ta’d gi to jin baru to mo mme’d piti mo be. 6 Dhali aha/ ciḵkina ’twa/ jin wana e ki a’di jin doshki’di bwaman to/e kun ’koni doŋon kun ’kon ki e mo mmo/o gwo mo ki: Pos bunyan jin baru ka gada mo ki nasa guurush mo dhali pos bunyana kamu/ jin baru ka gada karka ba’de/ ap̱o/ mo ki nasa guurush mo. Hili dhalku/ ki shi/a yin is mo dhali yimana mura’th jin ḵa/u ki ŋah ŋah mo.

7 Ki a’di ’ceeki’da ’diŋkila/ jin ’kon ma po/i doŋon ’twa/ mo tani aha/ ciḵkina ’twa/ ’peni to/e kun ’kon ki e mo kun ’kon ma p̱o/i doŋon mo kun o gwo mo ki: Yayu/ mo. 8 Dhali aha/ p̱arkina mo e mo dhali hili mo mo ma, shumaruma kamu/ jin ta’da mandup̱any p̱u’dki’d mo, dhali a’di jin merki a’di ap̱o/ mo tani gway piti yuḵu ki Mowu mo, dhali Mo ma Haawiya mo, a’di baṯẖki a’di isho’k mo. Dhali uni c̱ikunu mom’bi’th mo ap̱o/ mony’cesh mo ntagi bwanu’ba kamu/ gi mony’cesh mo mmo’kosh uni ki gandala turga/ mo dhali ki ṯe/ mo dhali ki mo/isa nyor ’peni to kun shi/kin mo dhali ki tombwaasho kun ’kokin e mony’cesh mo.

9 Dhali ki a’di ’ceeki’da ’diŋkila/ ’twa/ mo jin ’kon ma p̱o/i mudhe’d mo tani aha/ p̱arkina mo e mo e bwaŋ’kwariny mo ma gwaṯa/ jin miikunuwa basa ’cesh mo aḵashira/ gi uni gwansan kun ’koshkunu jwa mo gom gwo ma Arumgimis mo dhali gom gwo jin ḵala uni mmoṯor mo. 10 Uni cuukin ki dhan ’twa/ kun caaca mo mmo/o gwo mo ki: Ayy, Tap̱a jin di’da Liṯgany mo, /e ḵogu mo dhali /e ta a’diŋ gana/ mo. Kakasja sa/? imina /e dwall gwo mo dhali ri/a ri’c mo goma bas bam mo ap̱o/ uni gwansan kun ’kokin ap̱o/ mony’cesh mo? 11 Yan’ko’d uni ’baar ka ’deṯe/ ’deṯe/ c̱ikunu burrinyeŋ kush mo dhali ṯorkunu gwo mo mmosi/is ari’ceenne/ mo ntagi mondeŋ gi igarr buni kun nyaḵkina ṯu’c mii mo dhali iwaḵ buni mo minu ’taki thim mo, uni gun minu ’taki ’kosh jwa mo me’d uni, uni ki is buni mmomiikunu uni kan mo.

12 Dhali ki a’di ’ceeki’da ’diŋkila/ ’twa/ mo jin ’kon ma po/i pe’de/ mo tani aha/ hilkina mo mo dhali hili mo mo ma, adhan mony’cesh yiḵinki is mo dhali atente/ warki’d ki ’thi/ mo me’da shawaal ’thi/ mo dhali appe jin ta’da kunn is mo tani warki’d ka bas mo 13 dhala risa cul ’peni momis uni ṯa’kkina ’cesh mo me’d cwamp̱u/ mo me’d jin raskina a’di maman kun ’koki is mo e mondiṯ mo ki a’di yiḵinkin ma p̱unthar ’tham is mo. 14 Momis a’di p̱uuki’d mo mmowa e ki yiṯ jin ’kuc̱kunu is mo, dhala ris wosha turga/ mo dhali a/uḵa ’cesh mo uni joc̱kunu mo ’peni mom buni mo be. 15 Dhali yan’ko’d imaliḵ kun ’kon e mony’cesh mo dhali ’kwani kun caaca mo dhali uni gun ta gummp̱a/ gom ’kwani ma mee mo dhali uni gun ta pa ki pa mo dhali uni kun ’bitha’bi’th mo dhali ’kwani ’baar ka ’deṯe/ ’deṯe/ mo dhali uni gun ta c̱iŋkina/ kun yolu mo dhali uni kun ’kon ki ’kus mo tani uni bagkin e jurum wosh mo dhali e bwamana ris wosh mo e ’kuwosha turga/ mo tani 16 uni yuḵki wosha turga/ mo dhali aris wosh mo mmo/o gwo mo ki: Ṯaki ap̱o/ aman mo dhali bagi aman mo ’peni jis/e gi a’di jin c̱a’bki’d eya ḵursi ma maliḵ mo dhali ’pena nyor gi Ari Ḵa’bal mo 17 haali/ adhana tee ma nyor buni jin caaca a’di p̱u’dki’d mo dhali kaja a’di imidi mish doshi bwambori a’di mo?