1 Dhali yan’ko’d aha/ ciḵkina dhan ’twa/ jin caaca mo ’peni gu’b gi mondheleladhelel mo mmoṯor iman’doyu gwo kun ’koni pesu/ gwo mo ki: Iiku/ mo dhali gac̱a nyor ma Arumgimis jin ’batha’ba’th ki sheŋ ’kup̱ mo e mony’cesh mo ’peni toŋ’kul bwa kun ’koni pesu/ mo.

2 Wakan aman’doyu gwo jin di’di ṯwa/a/ mo tani a’di yaki’d mo dhali gac̱a nyor piti ’peni toŋ’kul bwa mo ap̱o/ mony’cesh mo, dhali jama/ kun ’then mo ki ’then mo dhali kun bulabul mo p̱u’dkina p̱o/ ’kwani mo uni gun ḵalki gway gi to/e yan mo dhali kun luŋki jamas piti jin uḵu mo be.

3 Dhali aman’doyu gwo jin ’kon ma p̱o/i su/ mo gac̱ki’da nyor piti ’peni toŋ’kul bwa mo ap̱o/ ḵumma/ yi’de/ mo dhali mo wakina e ka bas gi wathi/ jin wuki’d mo, dhali aris to ’baar mo kun ’kon ki e mo tani wukin mo, uni gun ’kokin e ḵumma/ yi’de/ mo be.

4 Dhali aman’doyu gwo jin ’kon ma p̱o/i kwara mo tani gac̱ki’da nyor piti ’peni toŋ’kul bwa mo ap̱o/ yi’de/ kun sokin mo dhali ap̱o/ yi’de/ kun kasha e ki kash mo, dhali uni warkin ka bas mo be. 5 Dhali aha/ ciḵkina man’doyu gwo gi yi’de/ mmo/o gwo mo ki:

8 Dhali aman’doyu gwo jin ’kon ma p̱o/i doŋon mo tani gac̱ki’da nyor piti ’peni toŋ’kul bwa mo ap̱owa tente/ mo dhali a’di dhalkunu bway mo mmoshil ’kwani is ki o’d jin ’batha’ba’th mo. 9 ’Kwani uni shilkunu is ki mom’batha’d jin c̱a’bki wur wur mo dhali uni jeeki gway ma Arumgimis mo, a’di jin ta gi mom’bi’th mo ap̱o/ mom’ba’th gwansan kun wo’cki ’kwani is she/ mo, dhali uni ’koki rica du is mo dhali c̱i a’di monyca mo.

10 Dhali aman’doyu gwo jin ’kon ma p̱o/i mudhe’d mo tani gac̱ki’da nyor piti ’peni toŋ’kul bwa mo ap̱owa ḵursi gi to/e mo dhali ’peŋkuman bampam piti taki mondhurumi’d mo. Dhali ’kwani ’kali’thkina le’d buni ki she/ mo e isa nyor buni jin ’pe’dkina uni she/ mo, 11 dhali jee Arumgimis jin ta ji gi momis mo gom isa nyor buni mo dhali jamam buni mo dhali uni ’koki rica du is ’peni miim buni mo be.

12 Dhali aman’doyu gwo jin ’kon ma p̱o/i pe’de/ mo tani gac̱ki’da nyor piti ’peni toŋ’kul bwa mo ap̱o/ dhan ḵumma/ yi’de/ jin yuḵu gway ka Elp̱uraat mo, dhali yi’dem piti ḵu’thkunu mo mmothoson bway mo goma ris imaliḵ kun ’koni mom’pesho’k mo. 13 Dhali aha/ p̱arkina to jin gac̱ki’d ’peni ’twan tasha/ e mo dhali ’peni ’twa/ gi to/e mo dhali ’peni ’twa/ ma manc̱i gwonthus mo, to kun ’kona e ikwara mo kun ’thena’then mo dhali kun bulabul mo ’peni shi/in piti jin wana e ki ji ma ’dwa/ mo 14 haali/ uni tan ga ruma ’cesh mo, mmo’kup̱ momer mo, uni gun hakaski mo ka bor mo e imaliḵ mo kun ’koni mony’ceshi ’baar mo, mmotul uni ’kup̱ mo goma dhana mee ka tee jin caaca ma Arumgimis jin Eḵa/ Eḵ mo. 15 (Hili mo mo ma. Aha/ mina p̱u’dku/ mo mmowa e ki wathin ’di/ mo. Mom’bor mii gom a’di jin di’d ki e i’kup̱ mo mmokar burrinyem piti mo ki a’di midi ’taki diki ya is ’te/ mo dhali ki a’di minu ’koki hil ki laŋ laŋ mo.) 16 Dhali uni tulki uni is mo mmonṯal ’de/ mo e mo jin yuḵu gway ki ’twaŋ ’Kwani Ibraniyiin ka Harmajadduun mo.

17 Dhali aman’doyu gwo jin ’kon ma p̱o/i pesu/ mo tani gac̱ki’da nyor piti mo ’peni toŋ’kul bwa mo e embul gi momis mo, dhali adhan ’twa/ p̱u’dki’d ka pije/ mo ’peni gu’b gi mondheleladhelel mo dhali ’pena ḵursi ma maliḵ mo mmo/o gwo mo ki: A’di miikunu mo be. 18 Dhali awara sho’k su’kki’d ki dhwa/a’d dhwa/a’d mo dhali dhan mo alki is mo dhali kontor ma sho’k miiki’da gur gur mo dhali adhan mony’cesh yiḵinki is mo, ji gi wakansan yisa mishkunu yisa ’thissa/ me’d jin ’kokina ’kwani e mony’cesh mo. Dhan mony’cesh c̱aan jin yiḵinki is mo tani wa’di caa. 19 Adhan ’peŋkuman bampa/ a’di dherki bwa mo ki she/i kwara mo dhali aris ’peŋkuman bampa/ gi kal gi ’kwaniny’ceshi ’baar mo tani ṯa’kkin mo, dhali Arumgimis kaki dhan Pam Baabil e mo mmoṯuca yim mmop̱iya ḵubbaaya iḵu’th mo, a’di jin ta ji ma nyor piti jin ’batha’ba’th ki wap̱ wap̱ mo. 20 Dhali arisa uḵa ’ceshi ’baar mo sokin mo dhali dhan wosha turga/ yisa gamkunuwa. 21 Dhali adhan kuluny ma wasa/ ṯa’kkin mo. Diṯ buni ka ’deṯe/ ’deṯe/ ḵalki’da raṯul iss ’kwanimpa ka mudhe’d mo kun ṯa’kkina p̱o/ ’kwani ’peni momis mo ntagi ’kwani jeekina Arumgimis mo gom isa nyor kun wo’cki uni is she/ mo goma wasa/ mo, haali/ gom isa nyor jin wo’c uni is she/ kagahara kan mo.