1 Hili gom /e mo tani ṯori gwo mo a’di jin midi ha me’d mo gom gwonṯor gana/ mo. 2 Ḵani ’kwani kun can gwo mo mmo’tima du mo, dhali mmoḵa/aḵa/ mo dhali ḵu’th is ki ’cese/ ’cese/ mo, mmota kuŋ gana/ mo e moŋgam gwo is mo dhali e mo/en mo dhali mmoṯel sho’k ki ṯel gana/ mo. 3 Ḵani up̱ gun tana ṯi/ gwo mo wakan ki uni mini ḵa/aḵa/ mo gom gway miim buni mo, mmo’koki ta imanthutha thu’th ’pen mo walla mmota c̱iŋkina/ ma su mo mmop̱i mo. Uni ḵa ba/ imini mii ṯor gwo mo gom a’di jin ’boro’d mo ba/. 4 Dhali wakan yethi up̱ kun ta dhuru’c sho’k mo mmo/en ikaṯẖim buni mo dhali uc̱im buni mo, 5 dhali mmota uni kun mini ḵu’th is ki ’cese/ ’cese/ mo, dhali mmota uni gun mini ga/ gwasa tiya mo, dhali ta imandhu gu’b buni ki ’bore/ mo, dhali ta imanta gi bwaŋkush mo, dhali ta uni kun mini ’dap̱ ’twa/ mo e mo gi ikaṯẖim buni mo, ki gwo ma Arumgimis minu ’taki ’koki waḵ mo be. 6 Wakan ḵani ’kwani kun ta dhuru’c gwo mo ka daran du mo mmo’tima du ki is buni mo. 7 Ṯori is pini eya ris ’twaŋkal kuku/ mo mmota she/mm ki miim ’borga/ mo, dhali e gwom pini jin ṯora /e mo tani ṯori a’di jin dara’d ki jin thusi cine/ mo, dhali a’di jin ḵa/aḵa/ mo, 8 dhali gwom ’borga/ jin ṯora /e jin minu mol waḵ mo, wakan ki wathi/ jin ceshki mo mo tani minu kar ki mo ma ’the is mo mmodar gi tonthusa ’deŋ kamu/ mo mmo/o gom ana mo be. 9 Ḵani uniny c̱iŋkina/ gun yolu gwo mo mmo’dap̱ ’twa/ mo e itap̱am buni mo dhali c̱i uni moŋkap̱ mo eya ris ’twaŋkal kuku/ mo. Uni mini mii ’koki burush uni gwo i’twa/ mo, 10 walla mmoḵal to ki bwam buni mo, hili mmoṯor a’di jin di’d isi bwaman mo ki a’di jin ta jiŋ gana/ mo, wakan ki eya ris to ’baar mo tani uni mini mii ’taki nyoŋ gwonṯor ma Arumgimis is mo, a’di jin ta’da Manwoṯẖ bana mo be.

11 Haali/ a’the ma Arumgimis mo, a’di piki’d mo gom bway mowoṯẖ mo goma ris ’kwani ’baar mo be, 12 mmoye’th ana sho’k mo mmowaḵ gwo mo jin ushuwa Arumgimis luŋ mo dhali mii gun dhunu e ki ’thir ’thir mo e mony’cesh yan mo dhali mmo’ko mmoḵu’th is ki ’cese/ ’cese/ mo dhali mmota gi buyeŋ kush gana/ mo dhali mmomii mii ma gayiin mo e mony’cesh mo be, 13 mmoc̱ora c̱or mo gom mo ma ’teŋ kap̱em bana jin ’boru mii mo, a’di jin ta mompi gi monyca ma Arumgimis bana mo jin caaca mo dhali Amanwoṯẖ bana jin ta’da Yesus Ḵrisṯẖos mo be. 14 A’di jin c̱iki is piti mo gom ana mo mmowan ana ’ba/ mo ’peni aris miinthus mo dhali mmodhelel ’kwanim pitiŋ gana/ mo gom is piti mo, uni kun shwana mii anyor ki thiṯẖ mo gom miim ’boron mo be.

15 Bahi aris to gwansan mo dhali malasiya malas mo dhali ḵucuriya ḵucur ki moshirri ’baar mo. Dhalku/ ki dhal wathin ’deŋ kamu/ bway mo mmowaḵ /e mo.