Midi umpang aming nua'ni wari Juda amingga' yokiamgu'
1
Anutuning midi wa ananing mindingni wari sini' nininga nakem
1 Ka timinggi'sini' Anutu wari Juda indining papane ga' midi a napa' fam tiamonga iragu' wa midi iyang ning kadapmang wa usap. Abanga midi togadofi aming profet undu' usap wara' Anutu adi u iniinga wari naknga iniaging. 2 A inga' sini' ka napa'napa' kabi'sini' biwanga tara' ganang ikem yara'ganang wa Anutu wari midi wa ananing mindingni ning mini ganang nininga nakem. Ka timinggi'sini' Anutu wari kama kunim mayap mayam a bam a napa'napa' kababi' u defata' u tugu' wa mindingni' ka u kamiinga tugu'. Abanga mindingni ka wa Anutu wari inga' adining napa'napa' dabik wara'ning tuang iik waraga' kuma' tipkasiregu'. 3 Anutuning kigineng girii wa mindingni wara'ganang ikita' wara' indi adining iik u kanga Anutuning kigineng u kayam. Abanga nasi' kadapmang a sasuk kareng ka Anutuning kaba ganang wa mindingni wari tanga ningtintingneinga kuma' kasasu'nem. Ka mindingni wa beni guk dabik ningsa' wara' napa'napa' ka kunim furo'ning a kamaganang i iking dabiksa' wa adining midi wara'ning kigineng warisa' yotangkayabinga iking. Ka adi kamaganang i ira kane ka indining kadagang u tanga kayoniminga indi fafandangeng karengsa' iik wara'ning u tipmiringa ning tanga aranga king girii Anutu adining kafong kareng ganang u mera girii tim iyak beng sini' ita'.
Anutuning mindingni ning wap wari kunung aming ensel ning wap tarafata'
4 Ka aming ka wa Anutu wari wap kigineng ka ananing mindingni ning u amigu'. Ka wap ka Anutuning mindingni wari kunung aming ensel ning wap u tarafata' wara' mindingni ning tangkunang undu' ensel arantagim ning tangkunang u tatarafik sini' tara'. 5 Ka indi mindingni ning wap kigineng wari ensel ning wap u tarafita' wara'ning u sura nakeda waraga' ka Anutu wari midi nua'ni togu' u yoking wa ning,
“kami gu naning sabana ning gifikadofinga na guning bagangga ning itik, ning togu'.”
Abanga waraga' unggung ka midi nua'ni ka ning togu',
“na adining beni ikinga adi naganing sabana ning iro'ga'.”
Ka ning togu' waraga' sukantam, Anutu adi midi ka u togu' wa adi kunim aming ga' mo' sura togu', mokngang, adi ananing mindingni didimeng waraga'sa' togu'. 6 Ka Anutu wari ananing mindingni kareng wap girii sini' guk u kamaganang yaraga' anigaronga wa adi midi ka ning togu',
“Anutu naganing kunung aming ensel sidi adita' mandaksi' upmama animamangna tini', ning togu'.”
7 A ananing kunung aming ensel waraga' wa midi nua'ni ka ning togu',
“Anutu naganing kunung aming wa naning kane ga' yangkaronga wa gugubik a kundip mambaya' ningda'ning ifaigikitik.”
8 Ka Anutu adi mindingni ga' wa ning togu',
“o Anutu gu king girii beng guk sini'. Guning tangkunang wa bibi' titining guk mokngang, fikifiki ningsa' ira au wara'ningsa'. Gu guning aming arantagim wa kadapmang didimeng ganangsa' yaptatorarang. 9 Gu kadapmang kadagang ga' wa bibi' sini' nakitang. Gu kadapmang kareng ga'sa' nakitang wara' guning Anutu wari u gapma amige fam u ibinga gu girii sini' gipmiinga guning kabaka kareng a mesisiringa girii wari amige fam ning mesisiringa u tarafarota', ning togu'.”
10 Ka midi nua'ni ka mindingni anata' unggung nua'bu ka ning togu',
“timinggi'sini' napa'ni guk mokngang kama sigesa' fidegu'ganang girii gusa' kama i tugung, abanga kunim undu' ganing kafaga warisa' tugung. 11-12 Ka napa' u tugung wa bibii titining guk, a tuang ga wa bibi'ning guk mokngang, ningsa' iyak wara'ning. Ka kama kunim u tugung wa timinira tanga wadigi' kadaga ning guk ka aming wari kwi' timini ka damirik tanga kadainga inga'ni ubu kamana ga' sura timini u sige urang kukinga fideting ningda'ning ka kama a nasi' nasi' timini u wadigi' tipmire'ga'. A gu wa ning guk mokngang, guning iik wa kuma' u itang ningsa' ira au wara'ning, ning togu'.”
13 Ka Anutu wari midi nua'ni undu' ning togu', gu naganing kafana kareng ganang i abanga mera nagok girii dabik ira na aming arantagim ka guta' digirap tanga iking u manggara fabanga guning kapmik kukyabinga gusa' yaptatorotang, ning togu'. Ka Anutu adi kunung aming ensel ga' wa ning guk mo' tounga tugu', mokngang, adi mindingni ga'sa' sura wa midi ka u togu' wang. 14 Ka kunung aming ensel arantagim adi girii iikning guk mokngang, adi Anutuning kane amingsa'. Ka adi aming sini' mo', uwara'ni sa', adisining kanesi' wa aming arantagim ka Kasira Aming Jisas ga' naktangka tinga inga' Anutu wari manggara gi' kuknibinga iik u yotangkanim waraga' kukyabinga ikiting. Wara' indi waraga' sura ning nakedem, mindingni ning kigineng wari ensel ning kigineng u tarafita'.