1 Ning tanga sipsip nano wari midi umpang wara'ning tapni so ka ari' namba seven ning ubu ibaramagu'. Ka adi u ibaramagu' ganang wa kunim ganang kuta wa napa' midi ni kabi'guk mo' nakuk, bararangeng sa' kama paramu' gi' hap awa ning adegu'. 2 Ning tanga yapguk ka ensel seven ning ka Anutuning diming ganang adeging wari be manggara suronga adeging.

3-4 Ning tinga ensel nua'ni wari kabak gol ka napa' mupmu kareng guk tangasa wara'ning u bema abanga alta ganang adeinga napa' kareng ka kudugo mupmu guk kareng danga ara wara'ning u dasitonangaminga bema alta gol wara'ganang kwasinanga segu'. Ensel ka wa Anutuning diming ganang sini' adenga napa' u seinga wara'ning kudugo wari kadofinga Anutuning arantagim didimeng ning ibang wara'guk bak kura danga aregu'. 5 Ning tanga ensel ka wari napa' mupmu guk ka alta ganang u seinga fadaging wara'ning fam u manggara kabak gol wara'ganang dasinga bema kama ganang i kwasinanga ipmainga afaging. Ning tinga wara'ganang didimeng wa tifik girii wari kadofinga mungkurap tonga ning tanga kining girii wari kadofigu'.

6 Ka ensel arantagim seven ning ka wa be mamanggak guk ningsa' adenga ning tanga be u figironga tugunung tiging. 7 Tugunungnanga adeinga munumung sini' wa nua'ni wari figiku'. Figikinga uningkim ais guk ka kudip guk wari amaa guk ka gimak gisifa girii da'ning afiging. Afanga kama dibing girii wa kudip ka wari kuma' dasasu'negu'. Abanga firi a nasi' nasi' ka base ganang ikiting undu' dibing girii wa kuma' dasasu'negu'. Abanga ta' a napa'napa' ka dagaa ganang ikiting undu' dabiksa' dasasu'negu'.

8 Napa' u kaguk wari biinga ning tanga ensel arantagim seven wara'ning nua'ni ka namba tu wari adining be ubu figiku'. Figikinga napa' nua'ni ka kama bubo girii da'ning wari kudip tanga papusananga manga gwang girii ganang mangfagu'. Mangfuinga gwang girii wara'ning dibing girii wari aming ning amaa igiku'. 9 Abanga nasi' ama ging kuni' kuni' ka gwang girii ganang ikiting wara'ning dibing girii undu' kumaksasu'na tiging. Ning tinga sip arantagim gwang ganang mugoging dibing girii undu' kadaga tiging.

10 Ning tanga ensel wara'ning nua'ni ka namba tri wari adining be ubu figiku'. Figikinga bam girii nua'ni ka kunimganang kuta ikita' wari mambaya' girii ka kamang sini' da'ning danga tamara manga ama kababi' a nambuk kabi'mo' ka kamaganang ira yareting wara'ning fam kabi'mo' wara'ganang mangfanga yaregu'. 11 Bam girii wara'ning wapni wa kiptang. Bam ka wari ama wara'ganang mangfanga yareinga aming wari ama ka karesi topna titining u ifakadagainga ama wari kiptang ka aming didipmi ning igikinga aming wari u topnanga kumaksasu'na tiging.

12 Ning tinga ensel arantagim wara'ning namba fo wari adining be ubu figiku'. Figikinga mayam ning dibing girii a mayap ning dibing girii a bam kabi'mo' wara'ning fam wara'sining diok dibing wari bibi' tinga adi diok kafakafa guk mo' tiging. Ning tinga kama wari mayam a mayap guk mokngang da'ning ira sidii wa kama urapsa' gagari a tiim undu' kangkam sini' adeia' fafa'ging wa inga' iik ning tugu' u kaguk.

13 Ka napa' u kadofigu' wari kadofinga biinga ning tanga kaguk wa yang gibigip girii nua'ni wari furo'ning kuta uparanga yangara ku bang ning tafanga katigu', o bibiri' sini' na aming kamaganang ikiting sidita' bibiri' girii naksamarik. Ensel faminengsa' ka ko adeing wari adisining be u figikanting ganang wa bibiri' sini' napa' mamareng girii wari aming kamaganang sidiganang kadofisamota' ning togu'.