11
Jon wari aming fama' ka Anutuning midi ituagumu' u yapku'
1 Ning tanga nua'bu aramak tanga kaguk ka kuyang ka napa' fam ning namba wara'ning u namging. Nama ning tanga ning nangging, gu mamarak tanga tepka i bema anga Anutuning mesisiringa yak girii u tep yari kufara kadidime', yak beng wara'guk ka alta guk dabiksa' kufara yapdidimotang. Ning tanga ami taming ka Anutuning mesisiringa yak wara'ganang amanga mesisiringa titing wara'sining nambasi' undu' indangirotang. 2 Ka gu tep wa Anutuning mesisiringa yak girii beng unggungsa' kufara kadidimanga yarotang. Sinim ka fugang ganang wa Anutuning naktangka aming wari mo' iking, adi adining mesisiringa yak iyung bane wara'ganangsa' ubu abanga iking. A sinim ka fugang ganang wa aming ka fugang iikisi adisita' ubu kuma' kabiamirik. Adi abanga kama ka wap Anutuning yong kareng ning ikita' wa adibu kadofinga tipkadanga ikanting. Ka adi yong ka wara'ganang ikanting wa mayap 42 ning sini' ikanting. 3 Ka na aming fama' ka naganing midi itua kane titi waraga' yangkarok ga'. Yangkareinga anga adi midi ka wari ami taming ga' mamareng iyam wara'ning kamaga waraga' sura kwi' babam kadagasi u tama adenga naganing midi u ituaimdemu'ga'. Ka midi u ituaimdemu' wa mayap 42 ning wara'ning bining ganangsa' ituanga ademu'ga'.
4 Aming fama' ka wa firi karesi fama' oliv ka Anutu ka kama kama dabiksa' yaptatoreta' wara'ning tare ning du'ganang adetamu'. Abanga lam karesi fama' ka Anutuning tare du' ganang adetamu' ningwara' da'ning u yangkareinga afademu'ga'. 5 Ka aming fama' wara'sining masi' ginang ganang wa kudip kagaya guk. Ka aming kamaganangni ka ni wari kadagang iramironga tinga wa adi kudip kadagang wari sagumak ning tademu'ga'. Ning tinga adi aming ka ningwara' u didipmi ning guk mokngang sini'. 6 Kama ka adi Anutuning midi itua kane afanga tanga ikdemu' wara'ganang wa adi tangkunang kuni' kuni' ka aming wari adisining midi waraga' bibi' nakyaminga ifanatam titi a mamareng iyam wara'ning wara'guk afademu'ga'. Mamareng ka wa ning, gimak anisefiinga gimak kabi'guk mo' titi pamparangeng sa' ira au a ama kababi' karesi aming wari topna tanga iikning u ininga kabuda tanga kiptang sini' ka aming amaa da'ning iik abanga bagana kadagasi kuni' kuni' a mamareng kuni' kuni' fam ka anasaning sasuk ganangsa' ifakadofaimsasu'na ning tademu'ga'.
7 Ka aming fama' wari Anutuning midi itua kane u tipmirisasu'neinga napa' kadagang sini' ka keng baseni girii da'ning wari kama ginang ka ari'ni guk mokngang wara'ganang ikita' wari kadofinga aming fama' wara'siguk ami' tanga aming fama' wara'sining tangkunang u bema afasasu'nanga ning tanga adisa' irafara dipmigumaro'ga'. 8 Dipminga yugukinga adisining bapmasi' wa yong girii ning kadapmang bining ganang unggung sarengsa' defakdemu'ga'. Kama ka u dipmo' wa yong ka adisining girisi' ugariging wara'ganang didimeng sini' dipmo'ga' wara' yong ka wa wapni kadagang ka Sodom guk ka Isip guk ning tuguting wara'ganang u defakdemu'ga'. 9 Ning tinga aming wari adisining fuksi' u kama ginang ganang unafarafiap ga' bibi' naknga ibiinga kadapmang ganang unggung kama paramu' gi' sini' ka sidii famineng ning sini' dekdemu'ga'. Defainga aming dabiksa' ka arantagimsi' kuni' kuni' a midisi' nua'ni nua'ni ka kama dibing naro' naro' a yaksing kuni' kuni' ira yareting wari kadapmang wara'ganang anga abu tanga dabiksa' yapsasu'nani'ga'. 10 Yapma ning tanga adi aming fama' wara'siga' bibi' sini' nakiama ning toni'ga', a profet fama' ya kabam sini' kureng kumara defakiamu', fikifiki adi Anutuning midi ituanga indita' mamareng fanimitamu' wara' kureng kumara defakiamu'. Ning tonga adi waraga' kabaksi' karengsa' naknga mesisiringa tanga tangsana tanga a amisega' napa' kura' aming tanga nanga ikni'ga'.
11 Ning tanga kama famineng u ibinga ning tanga sidii kubanik nua'ni wara'ning mayam de wari kuma' arafaro' ganang wa Anutu wari ananing gugubik u kamaiminga aming fama' wara'sining kabaksi' ganang amanga tubobu ifamarakinga ka' tubobu ira marara aradegumu'. Ning tinga aming ka adisita' bibi' nakni' wari tubobu seranga marakdemu' u yapma mutu girii sini' tini'. 12 Ning tinga midi nua'ni wari kunim ganang kuta bang sini' ning to', sidi i arapdemu'. Ning tuguinga mungkong girii ning mang ganang amanga kunim ganangga' mareinga aming ka adisita' bibi' nakni' wari kuma'sa' yapni'. 13 Ka aming fama' wari mareinga didimeng ka wara'ganang wa kining girii wari kadofinga yong girii wara'ning bining kabi'ning u udagainga yong girii wara'ning dibing wa kadasasu'na tinga yong wara'ning dibing kunik girii wa giri ade'ga'. Ning tanga kining ka wari ami taming kabi'mo' ka seven tausen ning u dabiksa' dipmasasu'no'. Ning tinga ami taming ka ka' giri ikni' wari napa' girii u kanga mutu girii tanga Anutuning wap bema aranga ning toni', o beng sini' Anutu girii furo'ning kuta ikita' warisa' napa' u tara' kayam.
14 Ka napa' u kadofinga yaro' wa mamareng namba tu wa kuma' kadofinga bigu' wang. Ka i nakni', mamareng girii ka namba tri ning wari ubu ari' kabi'sini' kadofota'.
Ensel namba seven wari be figikinga napa'napa' wari kadofigu'
15 Ning tanga nua'bu kaguk ka ensel namba seven wari adining be u figiku'. Figikinga aming kabi'mo' wari kunimganang kuta ku ning katiging, aming girisi fam wari kama i katatoreting wa adisining kane ka katatora titi ning wa kami ari' kuma' bira' wang. Indining girini' a mindingni Kasira Aming Jisas wara'guk adisa' ubu fikifiki ningsa' katatoranga ira antamu'. 16 Ning tuguinga aming girisi arantagim ka 24 ning ka girii ning nonda ganang mekaramaknga marekiting wari mandaksi' upma Anutuning wap bema aranga Anutuga' mesisiringa tangama 17 ning toging,
“o Anutu girii kigineng tuang indi guta' kabakni' kareng sini' naknga asekni' girii sini' toyam. Gu timinggi' timinggi' sini' ira abugung. Ababanga kami yara'ganang undu' ko ningsa' itang. Gusa' gu napa'napa' yaptatora ning tangkunang kigineng ning ki beng sini' wara' kami gu napa'napa' u yaptatoretang wara'ning wari sareng kadofisarendarang wa karengsa' ning toyam. 18 Aming arantagim ka naktangka guk mo' titing adi guning midiga' bibi' naknga guta' kabaksi' kagaya nakamem ning tonga nakiting ka adisining kama wa kuma' bira'. A guning kama wa aming ka guta' bibi' naking wara'ning kadagang waraga' kagaya kura'bu tubobu iyam wara'ning. Kama ka wa aming dabiksa' u tubobu ifamarara adisining kadapmang u yapdidimanga tagagareyapma aming kadagasi' dipmisasu'na wara'ning wari ubu kadofara'. Abanga kama ka wa guning kane aming karesi profet arantagim a aming girisi a aming sige fam ka guning midi naknga guning kapmiksa' ikiting wa adisita' kafakafa sini' tiam wara'ning kama wari kadofara'. A aming ka kamaganang ning iik kareng u tipkadanga fiareting wa gu aming ka u ifakadaga wara'ning kama farara', aming arantagim girii wari ning toging.”
19 Ka adi midi u tonga biinga ning tanga kaguk ka Anutuning siring yak girii ka kunimganang kuta ikita' wara'ning faba wari kagadak tanga auinga samapsa' adegu'. Ning tinga bokis ka tim Anutu wari Isrel aming guk midi totangka tanga midi fam yora bokis wara'ganang dasiging wari adegu' u tonga kaguk. Ning tinga tifik a mungkurap kigineng girii wari kadofigu'. Kadofiinga kining girii wari ubu kadofinga gimak girii ka uningkim ais guk wari ubu manga figing.