1 Ning tanga ensel ka wari napa' fam ka yong girii wara'ning bining ganang ubu nangtintingneinga yapkuk wa ning, ama kareng sini' nua'ni ka amingga' ka' iyak iyam wara'ning ka sasareng sini' ka dauwarini sa' u nangtintingnegu'. Ama ka wara'ning deni sini' wa tare kareng ka Anutu girii a sipsip nano wari marekitamu' wara'ning kapmik ganang sini' u auta kadofita'. 2 Kadofinga yong girii ning kadapmang meng girii ganang biningsa' unara famugogu'. Ka ama wara'ning gaga fugung fugung ganang wa firi ki fama' guk, firi ka wa aming wari ka' iyak wara'ning. Firi fama' ka wari mindip titamu' wa kama kubanik ganangsa' mo' titamu', mokngang adi mayap kubanik kubanik fikifiki gurak kubanik ganang wa tadadenga ausa' titamu'. Ka firi fama' wara'sining sasa'si' undu' karesi. Sasa' ka wa ami taming yong yong kabi'mo' wara'ni u yotangkayabinga bagana guk mo' titi wara'ning. 3 Napa' kadakadagasi ka Anutu wari waraga' bibi' sini' nakita' wa yong girii kareng wara'ganang guk mo' ikiting mokngang sini', napa' karesi karesi warisa' ikiting. Ning tinga Anutu girii guk ka sipsip nano guk warisa' adisining tare kareng ganang u mera napa'napa' yong girii ganang u yaptatoretamu'. Ka ami taming ka yong girii wara'ganang ikiting adi fikifiki Anutuga' mesisiringam ningsa' fating. 4 Aming ka yong wara'ganang ikiting adi Anutuning nonda sini' kating. Ning tinga Anutu wari adining wap ami taming wara'sining dimisi'ganang u yora kabiaminga adi fikifiki dimisi'ganang wap ka wara'guk ikiting. 5 Yong ka wara'ganang wa Anutu anasa' kuma' dioksangandainga sangangsa' kuma' ikita' wara' kama wari nua'bu kangkmaranga tiim nua'bu iikning guk mokngang. Adi fikifiki sidii fafa' ningsa' ikita' wara' mayam de wari kadofinga tipsanganda abanga kama gareinga kamang yora garinga tipsanganda wara'ning kane nua'bu titining guk mokngang, sige ningsa' ikiting. Ning tanga adi aming sige nua'bu mo' ikanting, adi aming girisi king arantagim ningsa' ira fikifiki ningsa' ikianting ga'.

6 Ka ensel ka wari ning nanggu', midi ka u torik wa mandaga' wa ma beng guk wa ning mo' surotang. Beng guksa' ganirik aming wari midi ka u naknga waraga' naktangka tangkunang titi wara'ning u ganirik. Anutu girii wari adining mini unggo profet ga' iminga adining midi i ituating warisa' adining kane aming ensel naga nangkareinga afanga aming ka adining kane tanga ikiting sidi nasi' nasi' wari kabi'sini' kagadofi wara'ning waraga' sangnatama yararik. 7 Ka girii Jisas wari ning tuguta', i nakni' naga tubobu abubu ning wa kabi'sini' adera', umpang ka ya napa' ka wari beng guk sini' kagadofi wara'ning. Wara' aming ka umpang i indangira kanga midi yaraga' sura irota' wa adi kareng gi' irota', ensel wari ning nanggu'.

8 Jon na midi a nasi' fam ka i yotik ya naning dana a maana wari sini' kuma' kanga a naknga ning tanga wa i yotik yang. Ka napa'napa' u nangtintingnegu' u yapma ensel ka napa'napa' u nangtintingnegu' waraga' mandakna upma mesisiranga tangamotik ning tonga tuguk. 9 Ka adi nangsefi tanga ning nanggu', o mokngang sini' gu mesisiringa wa nagata' guk mo' tanamotang, mesisiringa kubanik wa Anutu girii ga'sa' tangamotang. Naga a gu a guning kuyage fam ka profet arantagim a aming ka midi i naknga yaraga' naktangka tinting wara'guk dabiksa' indi adining kane amingsa'. 10 Ning nana ning tanga nua'bu ning nanggu', nasi' nasi' midi ka umpang yara'ganang u ganinga yotang wa Anutu wari midi wara'ning bengni wa kabi'sini' tipkadofota' wara' gu kapmo' mo' sebotang, sareng tipsarendanga aming u yangnatamotang. 11 Ka sidi kafakafa sukanting, aming ka kadapmang kadagang a sasuk kadagang guk tanga ikiting adi kadapmang ka ningwara'sa' tanga ikiting. Wara' sidindu' ningsa' sidi kadapmang kareng ka u tanga iking a nasi' Anutuning kadapmang kareng yaranga kadagang kabi'guk mo' u titing wa mo' kabinting, ningsa' surotangkanga tanga ikanting wa napa' kareng beng guk sini'.

12 Ka girii Jisas wari ning tuguta', sidi i nakni' naga tubobu abubu ning wa kabi'sini' kuma' ita'. Naga abok wara'ganang wa na nasi' kadapmang karesi ka aming wari tanga ikiting u toyap wara'ning mambong guk bema abok ga'. 13 Beng sini' timinggi' sini' napa'napa' wari mo' kadofigu' ganang wa na girii ningsa' yaguk a inga' sini' undu' na girii ningsa' ko irokga' beng, ning tuguta'.

14 Ami taming ka kwi' fuksi' ganang iipma ning u kafakafa sini' kuma' yoking geng kabi'guk mokngang adi gi'sa' ikni'ga'. Yong girii kareng wara'ning sinim girii ning iming ganang wa aming ka warisa' anga amani'ga'. Ning tinga Anutu wari firi mindip ka adisining nana ka fikifiki ningsa' iik wara'ning u iminga nanga ikni'. 15 A aming kadagasi adi yong girii wara'ganang amama ning guk mokngang. Aming ka sasuksi' ka sansaramik sini' titing a aming nua'ni se tipkadaga abanga taming a ami fam guk sansaramik mumungguk kadagang titi a aming dipmikumak titi a murak mandaga'ga' siamo' naknga mandaksi' upma mesisiringa tangam abanga aming ka kabaksi' wari midi mandaga' ga'sa' naknga midi mandaga' fikifiki tonga fiareting, aming kadagasi ka ningwara' wa yong girii wara'ning sinim fugang ganangsa' ikni'ga'.

16 Jisas na nasi' nasi' wari kagadofi waraga' sidi sangnatamonga na girii Devit ning iri sini' wari itik. Nagasa' na bam girii iyingeng kareng ka kama fagainga urang mera data' wang ning tuguta'.

17 Ka Anutuning mini unggo wari Jisas u ning anira', abubu te'. Ning tinga taming ka sipsip nano ana sangam ga' kapmefakita' adindu' abubu te' ning anira'. Ka aming ka midi ka i yotik i indangikanting sidindu' adi urapsa' abubu ga' sura wa o urap mabanime' ningsa' tonting. Aming ka ama ga' mini pamparanganga kumaronga tanga wa abubu sa' tota'. Abanga ama ka aming wari topnanga ka' fikifiki ningsa' ikiting u topnota'. Ama kareng ka u topnotang wa to titi ning guk mokngang, Anutu wari ai'dap kareng tanga sigesa' imota'.

18 Beng guk sini' Jon na midi ka i yotik ya napa' fam wari kadofonga ting waraga' sangnatam tirik ka sidi umpang i indangira kafakafa kanga nakeda tinting. Sidi midi ka i kanga sidining sasuk fam wara'guk tipfaranga kamanting wa kadagang, Anutu wari waraga' napa' mamareng kadagasi ka umpang yara'ganang aming fam ga' iyam ga' togu' wa sidita' ubu ma samo' wara' sidi ning guk mo' tinting. 19 A sidi midi ka i sanirik yara'ning fam wa kadagang ning kanga iibi tinting undu' kadagang. Anutu wari umpang yara'ganang firi mindip ka amingga' iminga nanga ka' ningsa' iikga' togu' wa sidita' mo' ma samo'. Abanga adining yong girii kareng ganang mo' amama ga' ma sangsefo'.

20 Beng sini' napa'napa' wari kagadofi wara'ning midi ka u yotik wa mandaga' mo', beng guk sini' ka indining girini' Jisas adi naganing midi u tiptangkaunga midi ka ning tuguta', beng guk sini' na kabi'sini' abotik. Ning tuguta' wa beng guk sini' tuguta' wara' indi ning tontam, girii Jisas gu abubu te'.

21 Ami taming ka girii Jisas ga' naktangka tanga ikiting sidi girii Jisas wari ai'dap tasama kafakafa tasaminga adining kapmik ganang sibim gi' ningsa' ikanting beng sini'.