Tarih-tǝzkirǝ «2»
1
Sulayman Israil üstigǝ ⱨɵküm süridu
1Pad. 3:1-15
1 Dawutning oƣli Sulaymanning ⱨɵkümranliⱪi mustǝⱨkǝmlǝndi; qünki uning Hudasi Pǝrwǝrdigar uning bilǝn billǝ bolup, uni bǝk büyük ⱪildi.
2 Sulayman pütkül Israillarni, mingbexi, yüzbexi, soraⱪqi wǝ pütkül Israilning ⱪǝbilǝ-jǝmǝt baxliⱪliri bolƣan ǝmǝldarlarni qaⱪirtip ularƣa sɵz ⱪildi. 3 Sulayman barliⱪ jamaǝt bilǝn birliktǝ Gibeonning egizlikigǝ bardi; qünki u yǝrdǝ Hudaning «jamaǝt qediri», yǝni Pǝrwǝrdigarning ⱪuli Musa bayawanda yasatⱪan qedir bar idi. □ «Gibeonning egizliki» — yaki «Gibeondiki «yuⱪiri jay»ƣa». «jamaǝt qediri» — yaki «(Huda bilǝn) kɵrüxüx qediri». 4 Hudaning ǝⱨdǝ sanduⱪini bolsa Dawut Kiriat-Yearimdin elip qiⱪip, ɵzi uningƣa tǝyyarliƣan yǝrgǝ ǝkǝlgǝnidi; qünki u Yerusalemda ǝⱨdǝ sanduⱪi üqün bir qedir tiktürgǝnidi. 5 Hurning nǝwrisi, Urining oƣli Bǝzalǝl yasiƣan mis ⱪurbangaⱨ bolsa Gibeonda, yǝni Pǝrwǝrdigarning jamaǝt qediri aldida idi; Sulayman jamaǝt bilǝn birliktǝ berip, xu yǝrdǝ Pǝrwǝrdigardin tilǝk tilidi. 6 Sulayman jamaǝt qedirining aldidiki mis ⱪurbangaⱨning yeniƣa, Pǝrwǝrdigarning aldiƣa kelip, ⱪurbangaⱨta ming malni kɵydürmǝ ⱪurbanliⱪ ⱪildi.
7 Xu keqisi Huda Sulaymanƣa ayan bolup, uningƣa: — Sǝn nemini tilisǝng, xuni berimǝn, dedi.
8 Sulayman Hudaƣa: — Sǝn atam Dawutⱪa zor meⱨir-muⱨǝbbǝt ata ⱪilƣan, meni uning orniƣa padixaⱨ ⱪilding. 9 I Pǝrwǝrdigar Huda, ǝmdi Sǝn atam Dawutⱪa bǝrgǝn wǝdǝngni puhta orunliƣaysǝn; qünki Sǝn meni yǝrdiki topidǝk nurƣun hǝlⱪⱪǝ ⱨɵkümranliⱪ ⱪilidiƣan padixaⱨ ⱪilding. 10 Əmdi Sǝn manga bu hǝlⱪⱪǝ yetǝkqilik ⱪilƣudǝk danaliⱪ wǝ bilim bǝrgǝysǝn; undaⱪ bolmisa Sening munqiwala qong bu hǝlⱪinggǝ kim ⱨɵküm sürǝlisun? — dedi.□ «bu hǝlⱪⱪǝ yetǝkqilik ⱪilƣudǝk» — bu ibarǝ ibraniy tilida «bu hǝlⱪning aldida qiⱪip-kirgüdǝk» degǝn sɵzlǝr bilǝn ipadilinidu.
11 Huda Sulaymanƣa: — Mǝn seni hǝlⱪimgǝ padixaⱨ ⱪilip tiklidim. Əmdi sǝn muxundaⱪ niyǝtkǝ kelip, nǝ bayliⱪ, mal-mülük, nǝ izzǝt-ⱨɵrmǝt wǝ düxmǝnliringning janlirini tilimǝy, nǝ uzun ɵmür kɵrüxni tilimǝy, bǝlki bu hǝlⱪimgǝ ⱨɵküm sürüxkǝ danaliⱪ wǝ bilim tiligǝn ikǝnsǝn, 12 Danaliⱪ wǝ bilim sanga tǝⱪdim ⱪilindi; wǝ Mǝn sanga bayliⱪ, mal-mülük wǝ izzǝt-ⱨɵrmǝtmu berǝy; xundaⱪ boliduki, seningdin ilgiri ɵtkǝn padixaⱨlarning ⱨeqbiridǝ undaⱪ bolmiƣan, seningdin keyin bolƣusi padixaⱨlardimu undaⱪ bolmaydu, dedi.
Sulaymanning beyixⱪa baxlixi
1Pad. 10:26-29
13 Bu ixtin keyin Sulayman Gibeon egizlikidiki «jamaǝt qediri»din Yerusalemƣa ⱪaytip kelip, Israil üstidǝ sǝltǝnǝt ⱪildi. 14 Sulayman jǝng ⱨarwiliri bilǝn atliⱪ lǝxkǝrlǝrni toplidi: — uning bir ming tɵt yüz jǝng ⱨarwisi, on ikki ming atliⱪ lǝxkiri bar idi; u bularni «jǝng ⱨarwisi xǝⱨǝrliri»gǝ ⱨǝm padixaⱨning yenida turux üqün Yerusalemƣa orunlaxturdi. 15 Padixaⱨ Yerusalemda altun-kümüxlǝrni taxlardǝk kɵp, kedir dǝrǝhlirini tüzlǝngliktiki üjmǝ dǝrǝhliridǝk kɵp ⱪildi. □ «kedir dǝrǝhliri» — yaki «kedir yaƣiqi». Lekin bizningqǝ Sulayman kedir yaƣiqini ixlitipla ⱪalmay, xu qirayliⱪ dǝrǝhlǝrdin Yerusalem ǝtrapiƣa kɵp tiktürdi («Top.» 2:5ni kɵrüng). 16 Sulaymanning atliri Misirdin ⱨǝm kuwǝdin kǝltürülǝtti; padixaⱨning sodigǝrliri kuwǝdin tohtitilƣan baⱨasi boyiqǝ setiwalatti. □ «Sulaymanning atliri Misirdin ... setiwalatti» — bu ayǝtning baxⱪa birhil tǝrjimisi: «Sulaymanning atliri Misirdin kǝltürülǝtti; padixaⱨning soda karwanliri kuwǝdin tohtitilƣan baⱨasi boyiqǝ türküm-türküm setiwalatti». 17 Ular Misirdin setiwalƣan ⱨǝrbir ⱨarwining baⱨasi altǝ yüz kümüx tǝnggǝ, ⱨǝrbir atning baⱨasi bir yüz ǝllik kümüx tǝnggǝ idi; at-ⱨarwilar yǝnǝ Ⱨittiylarning padixaⱨliri wǝ Suriyǝ padixaⱨliriƣimu ǝnǝ xu sodigǝrlǝrning wastisi bilǝn setiwelinatti.□ «Ular Misirdin setiwalƣan ⱨǝrbir ⱨarwining baⱨasi ... ⱨǝrbir atning baⱨasi ... at-ⱨarwilar yǝnǝ Ⱨittiylarning padixaⱨliri wǝ Suriyǝ padixaⱨliriƣimu ǝnǝ ... setiwelinatti» — Tǝwrat, «Ⱪan.» 17:16dǝ Israil padixaⱨliriƣa atlarni elix üqün Misirƣa berix mǝn’i ⱪilinƣanidi.
□1:3 «Gibeonning egizliki» — yaki «Gibeondiki «yuⱪiri jay»ƣa». «jamaǝt qediri» — yaki «(Huda bilǝn) kɵrüxüx qediri».
□1:10 «bu hǝlⱪⱪǝ yetǝkqilik ⱪilƣudǝk» — bu ibarǝ ibraniy tilida «bu hǝlⱪning aldida qiⱪip-kirgüdǝk» degǝn sɵzlǝr bilǝn ipadilinidu.
□1:15 «kedir dǝrǝhliri» — yaki «kedir yaƣiqi». Lekin bizningqǝ Sulayman kedir yaƣiqini ixlitipla ⱪalmay, xu qirayliⱪ dǝrǝhlǝrdin Yerusalem ǝtrapiƣa kɵp tiktürdi («Top.» 2:5ni kɵrüng).
□1:16 «Sulaymanning atliri Misirdin ... setiwalatti» — bu ayǝtning baxⱪa birhil tǝrjimisi: «Sulaymanning atliri Misirdin kǝltürülǝtti; padixaⱨning soda karwanliri kuwǝdin tohtitilƣan baⱨasi boyiqǝ türküm-türküm setiwalatti».
□1:17 «Ular Misirdin setiwalƣan ⱨǝrbir ⱨarwining baⱨasi ... ⱨǝrbir atning baⱨasi ... at-ⱨarwilar yǝnǝ Ⱨittiylarning padixaⱨliri wǝ Suriyǝ padixaⱨliriƣimu ǝnǝ ... setiwelinatti» — Tǝwrat, «Ⱪan.» 17:16dǝ Israil padixaⱨliriƣa atlarni elix üqün Misirƣa berix mǝn’i ⱪilinƣanidi.