Yunus
1
Yunus pǝyƣǝmbǝrning Pǝrwǝrdigar bǝrgǝn wǝzipidin ⱪeqixi
1 Pǝrwǝrdigarning sɵzi Amittayning oƣli Yunusⱪa yetip kelip mundaⱪ deyildi: — 2 «Ornungdin tur, dǝrⱨal Ninǝwǝ degǝn axu büyük xǝⱨǝrgǝ berip, awazingni kɵtürüp u yǝrdikilǝrni agaⱨlandurƣin; qünki ularning rǝzillikliri Mening kɵzümgǝ ⱪadilip turidu». ■ Yar. 10:11,12; Yun. 3:3
3 Biraⱪ Yunus ornidin turup Pǝrwǝrdigarning yüzidin ɵzini ⱪaqurux üqün Tarxix degǝn yurtⱪa kǝtmǝkqi boldi. Xunga u Yoppa xǝⱨirigǝ berip, Tarxixⱪa baridiƣan kemǝ tepip, kirasini tɵlǝp uningƣa qüxti wǝ kemiqilǝr bilǝn birliktǝ Tarxixⱪa berip, Pǝrwǝrdigarning yüzidin ɵzini ⱪaqurmaⱪqi boldi. □ «Tarxix» - ⱪǝdimki zamanlarda «Tarxix» dǝydiƣan üq yurt bar idi. Birinqisi, ximaliy Afriⱪida (ⱨazirⱪi Marakǝx ǝtrapida); ikkinqisi Ispaniyǝ, üqinqisi Əngliyǝ boluxi mumkin idi. Muxu yǝrdǝ ⱪaysi Tarxix ikǝnlikini biz bilmǝymiz. Biraⱪ ularning ⱨǝmmisi Pǝlǝstindin intayin yiraⱪ, Ninǝwǝgǝ baridiƣan yolning ǝksi yɵnilixidǝ bolup birnǝqqǝ ming kilometr yiraⱪliⱪta idi. «Yoppa» - «Yoppa»ning ⱨazirⱪi ismi «Hayfa» yaki «Jaffa», Israiliyǝning ǝng muⱨim portidur.
4 Pǝrwǝrdigar bolsa zor bir boranni dengizƣa taxlidi; xunga dengizda dǝⱨxǝtlik ⱪara boran qiⱪip, kemǝ parqilinip kǝtkili tas ⱪaldi. 5 Kemiqilǝr bolsa bǝk ⱪorⱪup ketip, ⱨǝrⱪaysisi ɵz ilaⱨliriƣa hitab ⱪilip dua ⱪilixti; ular kemini yeniklisun dǝp uningdiki yük-taⱪlarni dengizƣa taxliwǝtti. Biraⱪ Yunus bolsa, kemining asti ⱪǝwitigǝ qüxüwelip, xu yǝrdǝ ɵlüktǝk uhlawatⱪanidi.
6 Kemǝ baxliⱪi uning yeniƣa kelip uningƣa: «Əy, uhlawatⱪan kixi, bu ⱪandaⱪ ⱪiliƣining? Ornungdin tur, ilaⱨingni seƣinip nida ⱪil! Kim bilidu, ilaⱨingning nǝziri qüxüp bizni ⱨalakǝttin ⱪutⱪuzup ⱪalamdu tehi?» — dedi. 7 Ular bir-birigǝ: — Kelinglar, bu külpǝtning kimning wǝjidin beximizƣa qüxkǝnlikini bekitix üqün qǝk taxlayli, — deyixti. Xundaⱪ ⱪilip ular qǝk taxlaxti; ahirda qǝktǝ Yunus qiⱪip ⱪaldi.
8 Ular uningdin: — Ⱪeni, eyt, beximizƣa qüxkǝn bu külpǝt kimning sǝwǝbidin boluwatidu? Sening tirikqiliking nemǝ? Nǝdin kǝlding? Ⱪaysi ǝl, ⱪaysi millǝttin sǝn? — dǝp soridi.
9 U ularƣa: — Mǝn bolsam ibraniy millitidin, ǝrxlǝrdiki Hudadin, yǝni dengizni, yǝr-zeminni yaratⱪan Pǝrwǝrdigardin ⱪorⱪⱪuqimǝn, dedi.□ «Ibraniy millitidin» — yǝni yǝⱨudiy millitidin.
10 Bu sɵz ularni intayin ⱪorⱪutiwǝtti. Ular: «Sǝn zadi nemǝ ix ⱪilƣan?» — dǝp soridi qünki ular uning Pǝrwǝrdigarning yüzidin ⱪaqⱪanliⱪini bilgǝnidi, qünki ular buni uning ɵz aƣzidin angliƣanidi.
11 Ular uningdin: — Əmdi biz seni ⱪandaⱪ ⱪilsaⱪ dengiz biz üqün tinqlinidu? — dǝp soridi; qünki dengiz dolⱪuni barƣanseri ǝwj elip ketiwatatti.
12 U ularƣa: — Meni kɵtürüp dengizƣa taxliwetinglar, xu qaƣda dengiz silǝr üqün tinqlinidu; qünki bilimǝnki, bu zor boran mening sǝwǝbimdin silǝrgǝ qüxti, — dedi.
13 Biraⱪ bu adǝmlǝr küqǝp palaⱪ urup ⱪirƣaⱪⱪa yetixkǝ tirixti; ǝmma yetǝlmidi, qünki dengiz ⱪerixⱪandǝk tehimu dolⱪunlap ketiwatatti. 14 Ular Pǝrwǝrdigarƣa iltija ⱪilip pǝryad kɵtürüp: — Aⱨ Pǝrwǝrdigar, Sǝndin ɵtünimiz, bu adǝmning jenini alƣanliⱪimizni bizdin kɵrmigǝysǝn! Bigunaⱨ bir adǝmning ⱪenini tɵküxning gunaⱨini üstimizgǝ ⱪoymiƣaysǝn! Qünki Sǝn Pǝrwǝrdigar Ɵzüngning haliƣiningni ⱪilding! — dǝp nida ⱪildi.
15 Xuning bilǝn ular Yunusni kɵtürüp elip dengizƣa taxliwǝtti; dengiz dolⱪunlinixtin xuan tohtidi. 16 Xuning bilǝn bu adǝmlǝr Pǝrwǝrdigardin ⱪattiⱪ ⱪorⱪti; ular Pǝrwǝrdigarƣa atap ⱪurbanliⱪ ⱪilip ⱪǝsǝm iqixti.
17 Biraⱪ Pǝrwǝrdigar Yunusni yutuwelixⱪa yoƣan bir beliⱪni ǝwǝtkǝnidi. Yunus bolsa bu beliⱪning ⱪarnida üq keqǝ-kündüz turdi.□ «Yoƣan bir beliⱪ» - «yunus beliⱪi» bǝlkim bu ixtin ⱪoyulƣan namdur. Biraⱪ «yunus beliⱪi» (insanlarƣa amraⱪ bolƣini bilǝn) adǝmni yutⱪudǝk qongluⱪta yoⱪ. ■ Mat. 12:40; 16:4; Luⱪa 11:30
□1:3 «Tarxix» - ⱪǝdimki zamanlarda «Tarxix» dǝydiƣan üq yurt bar idi. Birinqisi, ximaliy Afriⱪida (ⱨazirⱪi Marakǝx ǝtrapida); ikkinqisi Ispaniyǝ, üqinqisi Əngliyǝ boluxi mumkin idi. Muxu yǝrdǝ ⱪaysi Tarxix ikǝnlikini biz bilmǝymiz. Biraⱪ ularning ⱨǝmmisi Pǝlǝstindin intayin yiraⱪ, Ninǝwǝgǝ baridiƣan yolning ǝksi yɵnilixidǝ bolup birnǝqqǝ ming kilometr yiraⱪliⱪta idi. «Yoppa» - «Yoppa»ning ⱨazirⱪi ismi «Hayfa» yaki «Jaffa», Israiliyǝning ǝng muⱨim portidur.
□1:9 «Ibraniy millitidin» — yǝni yǝⱨudiy millitidin.
□1:17 «Yoƣan bir beliⱪ» - «yunus beliⱪi» bǝlkim bu ixtin ⱪoyulƣan namdur. Biraⱪ «yunus beliⱪi» (insanlarƣa amraⱪ bolƣini bilǝn) adǝmni yutⱪudǝk qongluⱪta yoⱪ.
■1:17 Mat. 12:40; 16:4; Luⱪa 11:30