37
Kaem kote la loaga se kimi bitawanak se nu nanga sangukko
(David ko wur)
1 Ni kariimet memek mu ningo la
bagasan mu ko me gemang dagulokko,
ale nunga mel ningo ningo karogo
bagasan mu ko me ikia ka morukko,
2 mu awuk, nuna mu sirsir iwita maraka namamonko tom pingi aram,
ale tam gawa marakaso ale kaposo iwita mena namamonko.
3 Yawe kote la loaga se kiwem ningo wore bita se lagerko;
uwuta mu asele ali imi te baga se mel bo ko me nguangerkowo.
4 Yawe ko la amilmila se lagerko,
se nu mel suen la gemang motam te aniso mu kisokko.
5 Nika bagara aolak ka mel suen la Yawe kuting te la bitarko;
nu la kote loaga se lager se nu nika sangukko.
6 Nu nika kiwem ningo diram la mu sor ukiso iwita wetang saparukko;
se nika kilek yawara mu kowar tai dirmaso ale nikim kaposo iwita nikim kaparukko.
7 Yawe koma te kutek me ale, nu kimi tui sager se nu kiwem arukko;
kariimet memek nunga kiwem memek
ningi mel ningo ningo gimon se nungarki, mu ko ikia me ka morukko.
8 Gemang me magaruk, se gemang magara ko munan mu biring tuiko;
ikia me ka morukko, mu awuk, munan umu maga namara ko lage.
9 Kariimet munan memek bitawara mu mena namamonko;
bare awiriya Yawe kote la loaga lagoso
mu ali Kaem balam mu te baga lagarukko.
10 Tom me maiyuk se, kariimet memek bitawara mu yumu namamonko;
ni nunga loager bare me nungarkiko.
11 Bare kariimet nunumi karogo kapasan,
mu ali imi tamon ale amilmil te lila te, te bagamonko.
12 Kariimet memek mu kariimet ningo
diram mu nunga maguwumonko ko ikia kalosan ale nogore usisan se gigek maso;
13 bare Kari Biya kariimet memek
bitawara mu nunga gusiso, mu awuk, nu ikiso nononga tom mu taiwoso.
14 Kariimet memek mu baenat woyesan ale
daga wol tagisan ale kariimet kituwura
se nungumik mel mena wore nunga momon se kapamonko;
ale kariimet nunga munan ningo diram mu karogo nunga momon se kuemonko geragasan.
15 Bare nunga baenat mu nongota nunga nokosopas atumokko;
se nunga daga wol karogo mu koma kilikilik maukko.
16 Ningo diram la baga se kimik mel suen mena ago mu ningo,
mu kiwem memek bitawara mu nunga
melmasak suen biya kia saparam;
17 mu awuk, Yawe kariimet memek nunga sokel mu maguwurokko,
bare nu kariimet ningo diram mu nunga sinar taukko.
18 Yawe kariimet nungumik te den bo mena mu pempem nunga bitarso,
ale nunga melmasak balu nungaram mu
eng am nononga pempem anirukko.
19 Ikup ko tom te mu nuna me ta memek arigimonko;
karak tom te mu nuna na suen biya se me ta tukunangamonko.
20 Bare kariimet memek alo mu mena namamonko;
Yawe ilak barimara ko kariimet alo mu
giarum ko wakala yawara iwita,
nuna mena namamonko - tama bur iwita mena namamonko.
21 Kariimet memek alo mu bo ko mel
tasan agi mu, koma me nungarsan;
bare kariimet ningo diram betera alo mu,
amilmil te melmasak kariimet saki nungarsan;
22 kariimet Yawe marak nungarso mu ali imi tamonko,
bare awiriya nu buguwak kalo nungarso mu memek tamonko.
23 Yawe kariimet bo ko munan ko amilmiloso mu sokel tuso;
24 se nu ikup arigok wore nu me ta dagulokko,
mu awuk, Yawe kota ko kuting te iluwok se nu me dagulokko.
25 Aninga kulak te tai aitak garuk arem,
mu ani Yawe kariimet ningo diram mu
buring gurugu nungaram se me nungarkem;
agi nunga kuriang inang ko ngatanga
ngatanga geragaman se me nungarkem, mena.
26 Nuna nongomang motam ningo te
kariimet saki amilmil te melmasak nungarsan;
nononga kuriang marak ningo tasan.
27 Nina munan memek nibiring tual ale munan ningo karo tualko;
mu asele nina tom pempem ningo la baga se lagaralko.
28 Mu awuk, Yawe kariimet kiwem ningo betesan mu nunga kueso,
ale ko kariimet diram la karo tusan mu me buring gurugu nungarso.
Nu nunga bituok se ningo la pempem baga lagamonko;
bare kariimet memek alo nunga kuriang gue mu maga namamonko.
29 Kariimet ningo diram bitawara mu ali tamon ale te butata baga lagamonko.
30 Munan ningo diram la bagara ko
kariimet mu nuguring te ikia sinar den aratukko,
ale nunga nungamili te den ningo wore la balmonko.
31 Nononga Kaem ko den mu nononga nongomang motam ningi aniso;
nunga aolak mu ningo se diram la.
32 Kari memek alo mu yumusan ale
kariimet ningo diram wore nunga kimi bitawasan,
nunga momon se kuemonko ko baga lagasan;
33 bare Yawe mu kariimet ningo diram mu nunga bitiruk se me memek tamonko,
bare den te nunga betemon mu nu nunga sangukko.
34 Yawe ko la ikia bita se ko munan karo tuiko.
Se nu nika sanguk se ni ali mu kotam awurko;
nu kariimet memek alo mu nunga karo saparuk mu ni motam te arikko.
35 Ani munan memek betera ko kari bo
arigem, nu tam biya bo ali welang te aragam tarigiso iwita tarigiram se arigem.
36 Bare tom me maiyam se apalagaya namaram se ko kuwim ipi aniso;
ani ko loagerem, bare me arigem.
37 Kariimet nungumik te den mena se
ningo diram la betesan mu nungarkalko;
nuna nongomang lila te saki alo nongorak baga lagasan,
buta se yawarakala baga se lagamonko.
38 Bare memek betera ko kariimet mu yawarakala me bagamonko,
nuna maga sapamonko.
39 Kariimet ningo diram nunga sangaru tata ko munan mu Yawe kote taiso;
ikup tom ningi mu, nu nunga manga gek am.
40 Nu nunga sangarso ale kariimet memek nuguting te nunga bataguru taso;
nuna nu kote taisan se nunga ira kaluwuso,
mu awuk, nu nunga manga gek am.