46
Jacob ko Kaem nu anananga manga gek am
(Korah ko kuriang alo nunga wur bo)
1 Kaem mu anananga kuwim yumura se anananga sokel,
ikup kam te nanga sangukko sinar ago bagoso.
2 Buta se ana me nguanganakko;
ali yukuok se duruk kutukutuk mauk ale gagi ningi kaparuk,
3 se gagi biyala kelaguk nirung kaparuk ale duruk moruk se yukuok,
bare ana me ko nguanganakko!
4 Kaem Kalel Biya ko wonong laili umu te, yu yawara bo aniso,
se kariimet yu umu ko ninguru amilmilasan.
5 Kaem wonong mu te bagoso,
se kager kari me parusuwumonko;
sor me ukia palagoso la, Kaem wonong mu sangukko.
6 Ali lilim ningi niara nguangara biya barasoso,
kingdom bibiya parasa kapasan;
mu awuk, Kaem ko kuring pure iwita pagoso se, ali kutukutuk maso ale turupuso kaposo.
7 Yawe Sokel Garagar mu nangarak bagoso,
Jacob ko Kaem mu anananga manga gek am.
8 Tairal Yawe kiwem beteram ewere arigalko,
nu ali sor maguwuram ewere arigalko.
9 Nu ali lilim la te kager menawuram,
ale daga gatu gi kulukumuram,
ale karem gi tama ningi awuram se kani namaram.
10 Ale balam, “Daigal kutek mal ale ani Kaem mu aga ikialko;
sor suen la te aip patawumonko,
ali lilim la te nup biya aisimonko.”
11 Yawe Sokel Garagar mu nangarak bagoso;
Jacob ko Kaem mu anananga manga gek am.