57
Kaem ikup kam ningi aninga yumura kuwim ningo
(David Saul ko naguram ale garap gogong ningi baga se den imi batogam)* 1 Samuel 22:1.
1 Gemang aisuko, O Kaem, gemang lila aisuko;
ni aninga yumura kuwim.
Ani nika kiting bowa kararik ale bagarik
se mel memek suen la aga maguwurokko taiso mu mena saparukko.
2 Aninga niara Kaem Kalel Biya mu kote betesam; nu aninga bitarso.
3 Nu duruk wonong te baga se aninga sangarso,
ale kager kari aga karowasan mu ining nungarso;
Kaem me aga beteso, aninga kueso ale lage mu te aga sangarso.
4 Ani kausik memek aga laturman se kusumuri bagasam;
nuna kariimet nunga moa namonko bagasan;
nononga nogore mu gatu kore iwita,
se nunga nungamili mu batir wuli karogo wore toroman.
5 O Kaem, nika nip biya taiti gomang suen la te wetang saparko,
se ka kimik nikim biya mu ali lilim iramurokko.
6 Nuna ani te aga ilumonko dagarok kereman,
se ani angamang ninguru ikuwoso;
nuna aninga lage te mutim bo iman,
bare aking nongota ningi dagulaman.
7 O Kaem, ani ni ko ko angamang me namoso taiso,
ani angamang sokel ago bagasam;
ani nika wur iluwek ale nip patawurikko.
8 Ani ukira duap ago barasik ale
aga gita se kulele kolawirik se sor ukirokko!
9 O Kari Biya, ani sor kasik la nongoma te amilmil kisek,
ale kariimet suen la nongoma te wur iluwek ale nip patawurikko.
10 Mu awuk, nika kua nangara mu kumik tom mena, taiti gomang kiaram;
se nika munan me nanga bita ariga mu betela, taiti gomang karogo terong mam.
11 O Kaem, nika nip biya taiti gomang suen la te wetang saparko,
se ka kimik nikim biya mu ali lilim iramurokko.