66
Kaem ko munan ningo ko amilmil wur
1 Ali sor lilim ko kariimet,
amilmil kelagal ale Kaem nup patawuralko!
2 Wur iluwal, nup biya tual,
ale noko nup kualala biya patawuralko!
3 Ale Kaem maonal, “Mel suen la
ni betesam mu am duap bo nunguningkiri!
Nika sokel aromemek owore te se,
kariimet memek ni ko ko ninguru kuruga namasan.
4 Ali lilim la nubugura kulukuru kisisan;
ale wur te nip biya patawusan.”
5 Tairal ale Kaem kiwem bibiya beteram ewere arigalko;
nu kariimet nunga sangukko mel duap duap beteram!
6 Nu gagi kuring kauram se kariimet te aolak iluman kasu kapaman;
buta se tairal se nup patawunakko!
7 Nu ko sokel biya mu te ali lilim bitarso;
nu kariimet suen la ninguru nungarki kutuwuwoso;
buta se kariimet bo nu ilak me barimarukko!
8 O kariimet, anananga Kaem nup patawuralko;
nigiring paogal ale sail te nup patawuralko!
9 Nu ikup ningi nanga sangaru tam se
ana ikup mu te me dagulaman.
10 O Kaem, ni ana billy-can kaetam yugur
gawa te iri lagara se nama nikim kapara iwita nanga irirem.
11 Ni nanga iki se wore nanga beterem se dungan ura ningi namaman,
ale nabiwinang te mel ikup ikup gikasan.
12 Ale nanga bitua kari nungarkiwerem se mel yam ko nanga bitakasan;
ni ana tama ningi, se yu lom biya ningi iwita nanga beterem se aolak iluman,
bare aitak ni nangarak sor mel suen la terong la karogo mu te nangarak tairem.
13 Buta se ani aga den kerak kalem mu
karo tuek ale ka temple ningi tairik ale tama bita kisekko;
14 ani ikup ningi baga se den umu kerak kalem.
15 Ani sipsip mel nungumik titiyam mu ago tairik ale tama bita kisekko;
sipsip anumang se, bull se, goat karogo tai tama bita kisekko.
16 O kariimet, nina Kaem kuring bowa ningi bagasan mu,
tairal se nu kiwem aningate beteram mu balik se ikialko!
17 Ani nup patawu se nu aga sangukko niarem,
ale aga memek me kaluwurem.
18 Bare ani aga memek angamang motam ningi kaluwurem le mu,
nu me aga saongam le.
19 Bare nu nunguningta aninga niara ikiam ale agiring iluwam.
20 Se ana Kaem nup biya patawunakko!
Mu awuk, nu gomang motam kaolam ale aninga niara me buring tuam.