108
Kaem ana nangarak sanamaruk mu awiri anananga maguwurokko terong?
(David ko wur)
1 O Kaem, ani ni ko ko angamang ningi ninguru nunguning aram;
ani aga adera angimik lilim la nika wur iluwek ale nip patawurikko.
2 Ani ukira duap ago barasik ale aga gita se kulele kolawirik se sor ukirokko.
3 O Yawe, ani sor kasik la nongoma te amilmil kisek,
ale kariimet suen la nongoma te wur iluwek ale nip patawurikko.
4 Mu awuk, nika gemang kua ana nangara
mu aromemek se kalel biya, taiti gomang kiaram,
se munan diram la ni ana nago ko
betesam mu betela, taiti gomang karogo terong mam.
5 O Kaem, nika nip biya taiti gomang suen la te wetang saparko,
se ka kimik nikim biya mu ali lilim iramurokko.
6 Nika kiting sengam mu te nanga bataguru to ale nanga sangaruko,
umutang te mu ni awiriya nunga kuesam mu terong bagamonko.
7 Kaem ko kuwim laili mu ningi baga se den imi balam,
“Ani amilmil te, sail te Shechem ali mu pakakumurik, ale sor wolong Succoth
mu karogo tala parusuwu aga kariimet nungaru gurugekko.
8 Gilead mu aninga,
se Manasseh mu aninga;
Ephraim mu aninga kager ko kitigat,
se Judah mu aninga bitua ura ko tam.
9 Moab mu yam ta tawir yam bo iwita,
se Edom mu aninga asiwik gomang te bitirikko,
se Philistia ningi mu ani amilmil ngata te bitirikko.”* Sor Gilead, Manasseh se Judah mu Israel ningi ko sor wonong. Se Moab, Edom se Philistia mu sor saki Israel ningi mena.
10 Bare aga Kaem, awiri ani agarak sor Edom mu te namaruk ale
ko wonong sokel aora biya mu ningi agarak kaparukko?
11 Awiriya bo mena, mu am nigita.
Ni biring gurugu nangarem ale kager te me nanga sangarukasam.
12 Bare aitak mu ni ana nanga sangaruko;
mu awuk, ali ko kari bo ana nanga sangukko me terong.
13 Bare ana nanga Kaem te mu ana kager te mariranakko;
nu kota kager kari memek alo mu nunga waruk se kapamonko.
*108:9: Sor Gilead, Manasseh se Judah mu Israel ningi ko sor wonong. Se Moab, Edom se Philistia mu sor saki Israel ningi mena.