111
Kaem kiwem bibiya beteso wore ko amilmil wur
1 Yawe ko nup patawunakko!
Ani angamang motam lilim la te,
kariimet diram nunga biguwura motam te,
Yawe nup biya nunguning tuekko.
2 Yawe kiwem bibiya beteso mu yawarakala nunguningkiri;
se arikaya ko amilmilasan ale ko kuesan mu ko nungamin ares ma se lagasan.
3 Nu ura suen la beteso mu sokel nikinang karogo la arataso,
se noko munan ningo diram mu kumik menara mena.
4 Nu ko kiwem bibiya beteso mu tom suen biya ko kariimet nungamin te aniso;
nu kiwem ningo se marolila ko Kaem.
5 Nu kariimet noko nguanga se kua bowa ningi bagasan mu inang nungarso;
ale noko den nongorak kaolam mu ko kuamili me saposo.
6 Nu sor iwareng nunga ali bataguru ko kariimet nungaram,
ale mu te noko sokel ko kariimet nunga kausam.
7 Nu mel suen la beteso mu ningo se diram la beteso;
noko den balso mu nunguningta se diram la.
8 Se mel umu suen la beteso mu tom pempem la ani lagoso;
nu kiwem nunguning se munan diram la te beteso.
9 Nu ko kariimet nunga bataguru tam ale
nongorak den kaolam,
se den mu tom suen biya anirukko.
Nu laili se sokel garagar!
10 Yawe ko nguanga se kua bowa ningi la
bagara ko munan mu ikia ningo ko lage kuring nunguningkiri;
awiriya noko den karo tusan mu nu ikia ningo nungarso.
Buta se noko nup pempem la patawu se laganakko!