20
Jeremiah ana beura
Bada i riwa,
5 Tau, Jerusalem ma ai mane ma ai maura ma aiwai anatapui polapolai i toitoiei ana veredamanei ai ḡavia awarii. Ina nei ma Judah, ai gulagulau ai purapura maiai ḡaeḡaei maiteni ina pupuna-naiei au Babilon.
Jeremiah i riwa,
7 Oo Bada! u gwala-kaueu da a viperoveta
ma a voterem da u kauei.
Tam u virewapana guratana da
u tereḡaireiu.
Marina tau rava ai anivinama.
Rava anatapui e vivinameu, marai ma waguvarai.
8 Maranai a paripariverena,
Riwa ana nuaii e rubaruba-opu.
“Viḡaiḡaiawa! Pupu e nenei!”
Bada ana pariverena aubaina, vinama ava a nenelaḡai.
9 Mepa da ana geduai ma wavana eḡa ana latoni bo wavanei ana jima
Lamna maranaina riwam lamna me ai araratana,
orau e ararai.
Amapo eḡa ana vojijina-guratei. Amapo eḡa!
10 A nonori patara e viviarautueu.
Au ḡavia i maḡa kaua,
ma e vineneḡaneu da ana neboa,
ma ina viwavuiu ina pa,
“mepa da i jima boa, ina waro-melei ma tauta ata biwa tana vaia.”
11 Wate Bada tau maiteni
me tauviḡavia vivirewapana kaukauana.
Lamna aubaina au ḡavia eḡa ina tereḡaireu.
Taui ina vunu-aveu ma ina vinimala kaua.
Ina vinimalana-nonoei ma eḡa nuanuai ina vuru.
12 “Oo Bada Vivirewapanam! Tam rava jijimanii e raraudadani,
ma ai nota ma orai e araramanei.
Au vita au uram a terei
ma ana inanaim, au ḡavia ma kovoḡi.
13 Ona wela Bada awarina.
Ona voepaepai.
Maranai Rava vivirewapanai, gwaḡagwaḡai e rarau-iviapoapoelei,
lamna Bada ana rewapanei taui ina gagaloei.”