1 Iesu ana tauvotaḡotaḡo maiteni i wanavira-melei au Capeniam. Ma au pom ruaḡa au murina, rava nolana i nonori da tauna i nememei au melagai. 2 Ma rava maḡamaḡaui i vitagogiei au numa. Patara i rata guratana da numa i oai ma metaeta maiteni i mae-potai. Iesu, God riwana i raraugugulei. 3 Nelara ruaḡa ma ruaḡa, oroto gwaḡagwaḡana rasirasiei i avarai da i neiai Iesu awarina. 4 Rava i maḡa guratana ma eḡa tagotagogina da ita neiai Iesu awarina, lamna aubaina da tetelei i amḡaena da au poewa ma gavogavo i bauni ma kampa gwaḡagwaḡana ana rasirasina i tere-ḡairei Iesu au naona. 5 Ma Iesu, nai ravai i ʼnanai da ai vitumaḡana i rata, lamna aubaina gwaḡagwaḡana i riwei i pa, “Natu, am ḡoʼapoapoei, a nota-tawanei.”

6 Anina mai Jew ai tarawatu babadai ḡelaui kampa i kiakiala, au orai i vinua-notanota i pa, 7 “God ainelana ḡoʼapoapoei e notanota tawanei. Aiwai aubaina wei ravana nanare e bababani? Tauna, God e vivijiboḡi ma e ririwa da tauna, God nanare.”

8 Maratagogi, Iesu Aruanei ai nota i vaia ma i riwei i pa, “Aiwai aubaina wei kauai o vivinua-notenotei? 9 Metauna i telatela: ḡwaḡagwaḡana ata riwei, ‘Am ḡoʼapoapoe a nota-tawanei.’ Bo ata riwei, ‘Ma vomairi, am animatave ma vaia ma ma babara?’ 10 A ḡoei da taumi ona aramanei da Rava Natuna au dobu ana rewapana e mamae da rava ai ḡoʼapoapoe ina nota-tawanei ma ina vilawani.” Ma gwaḡagwaḡana i riwei i pa 11 “A riwem, ma vomairi, am animatave ma vaia ma ma nae au numa!”

12 Orotona i vomairi ma maratagogi aravi i vaia ma i babara nae. Ma patara i raraubiga, i bana-kauei ma God i voepaepai ma i ririwa, “Tauai eḡa melanai kaua wenanare ata inanai!”

13 Iesu, Capeniam i voterei ma Galili topana au gerana i bababara ana tauvotaḡotaḡo maiteni. Ma patara i nei awarina ma tauna God riwana viararamanana i vikarei. 14 Ma i verau-nae aburuna ma Apius* Eng. Alphaeus. natuna Levi i ʼnanai, ana bagibagi au gabuna i kiakiala ma tax i tamitami Rome gabemanina aubaina. Iesu i riwei i pa, “Ma votaḡotaḡoiu!” Levi i vomairi ma i votaḡotaḡoi.

15  Tax tautami ma ḡoʼapoapoei ravai maḡamaḡaui, Iesu ma ana tauvotaḡotaḡo i votaḡotaḡoi. Ma anatapui, Levi ana au numa i kiala gogona ma i amam.† Moses, Bada ana Tarawatu i girumi ma mai Pharisi wei Tarawatuna i votaḡotaḡo-kauei. Ma taui kaua waduboi amamai ḡariei maiteni i vovoteletelei ma i riwa da aiavoi Tarawatu eḡa ita voteletelei lamna taui rava apoapoei, ḡoʼapoapoe tau kauei. 16 Tarawatu Babadai ḡelaui lamna Pharisi, ma taui i ʼnanai da Iesu tax tautami ma ḡoʼapoapoe ravai maiteni i amam. Anina ma Iesu ana tauvotaḡotaḡo i riwei i pa, “Aiwai aubaina Iesu tax tautami ma ḡoʼapoapoei ravai maiteni e amam?”

17 Ma maranai Iesu wei riwana i nononori ma taui i riwei i pa, “Rava lawalawai, doketa eḡa ita ḡoeḡoei ma rava doridoriai, doketa e ḡoeḡoei. Tau a nei ḡoʼapoapoei ravai aubai ma eḡa rava jijimani aubai.”

18 Mara tagogi, John Taubabataito ma Pharisi ai tauvotaḡotaḡo i ujiuji. Ma rava ḡelaui i nei Iesu awarina ma i vitara-virevirei, “Aiwai aubaina John Taubabataito ma Pharisi ai tauvotaḡotaḡo e ujiuji, wate tam am tauvotaḡotaḡo eḡa ita ujiuji?”

19 Iesu i paribelei i pa, “Taumi o notanotai da taui aiavoi i raukwatuei tavine ana au torela, ina mae lota bo? Eḡateni kaua! Maranai tavitavine vou orotona, taui maiteni e mamae, taui eḡa ina uji. 20 Wate mara ina ḡeta maranai tavitavine vou orotona ina vaitawanei ma lamna maranaina ana rava ina uji.”

21 Ma riwa e mamae, “Tau kaua vouna a neiai eḡa me taumi ami kaua wadubona nanare. Eḡa aiai ravana, gara vounei gara au wadubona ina popo-ratui da gavogavo ina vopotai. Mepa da nanare lamna, gara vouna gara wadubona ina roroi ma gavogavo ina rata. 22 Ma nanare, eḡa aiai wine vouna ina vaini da wine aniterenana wadubona ḡamoḡamo opinei au orana ina iwaḡi. Mepa da ina kauei, lamna wine vouna ina dodo ma wine aniterenana wadubona ina viairoroi ma wine ma aniterenana ina wanabauni‡ Wine e tuputupua ma puropurona wine ana aniterenana ina viaisikasikai. Wate wine vouna, anina da wine aniterenana vouna au orana ina iwaḡi.”

23 Mara tagogi au Sabat, Iesu ana tauvotaḡotaḡo maiteni, witi wapuna au orana i nenae. Ma ana tauvotaḡotaḡo witi rovei i vaini ma i amam. 24  Pharisi ḡelaui i ʼnanai wei kauana i kaukauei ma taui Iesu i riwei, “Ma inanai, ata Tarawatu e mamae da Sabat, lamna lauvitau ana mara. Aiwai aubaina taui e vovobagibagi?”

25 Iesu i paribelei i pa, “Me peroveta i girugirimia nanare. David ana tauvotaḡotaḡo maiteni am-iraḡe ma aiwai i kauei? Taumi o iavi ma aiwai aubaina anona, eḡa ota vinua-notenotei? 26  ✡ 1Sa 21:1-6Pirisi Ḡeḡetelarana Abiathar ana au mara, David, God ana au numa i rui ma palawa vovivirana i vaia ma ḡelaui ana tauvotaḡotaḡo maiteni i verei da i ani. Moses ana Tarawatu e mamae da pirisi ava palawana e aniani.”

27 Ma Iesu ana riwa au damona i riwa i pa, “God, Sabat i kauei da rava voaguna aubaina ma eḡa rava ita kauei Sabat voaguna aubaina. 28 Ona vinuanotenotei, tau Rava Natuna, lamna aubaina tau anina Sabat badana.”