1 Nogo naakinu nimimi naa agaa waru pago ratua, nimina kone-para waru niminaatepape. 2 Epe makuae-yae waru mua teme agaa rayo waru ratua epe naaki nogo mada piralimina. 3 Epe konena agaa ne madaa epena go agaa meape. Gore onaa yateme rabu pimide rupa mada piralimina. 4 Aa medame kalai-pu kogono pua no su runane pagaa i gol aana mulalo kogono radaa pina pea-rupa epe kone mulalo-re radaa pina kogono go-rupa pape. 5 Neme goa rayo pali-dare neme Adaa Aa-na kone rayo mada adasali. Goa paliri neme Gote page nipu kone waru rulaaye.

6 Gore akolo ya? Aa adaa nipuri ora oyae rayona re yade. Nipumi epe kone gua makuae yae page oyae rayo nipumi niaa guaaya. 7 Adaa Aa nipuna agaa pagoa rateme onaanuri wae yae epe yaenu page adoa rumaeme. Goa peme-pulu Adaa Aa-me nimu waru suruboa wae-para nalopena epe-rupa pirina tea. 8 Gote-me nipuna agaa pogoa rateme onaanuri nipuna surube kuta runane mapiraaya. 9 Nogo naaki nimi epe kone adoa ratalimi-dare epe pora luabu adoa pamualimi. Epe agaa rateme aanu medaloma page epe kone rumaawa epe pora mada mea watea.

10 Goa pua epe kone adaapu nena robaa-para rubialia rabu raana-me omali. 11 Epe kone ratali raburi epea luabumi ne raana gua ne madaa rubia kuma gialia. 12 Goa pua waea peme aanu-para agaa wae-rupa teme aa-nu raapu medaa-para napirape. 13 Go aanu nimu epe pora gimoa wae ribaane pora ratua waea puaeme. 14 Gore nimu wae pora ratulalo pedo pu rana omoaeme. 15 Go aanuna konere pugu pua bebolo maeya tea.

16 Gore aa medana oreme omeme pua paake nape kone salia-dare epe kone aba go agaa-para epalia. Goa palia raburi neme mogo onana kone adoa mada gimali. 17 Go piaene onamere abade ona inumakua pirua aani raapu ki mua pirisipide-agaa gimoa waea pape kone mualia. Gore Gote-na ini agaa madaa ora lalo loa misipide agaa page gimea. 18 Go rabu neme go ona rata mea pali-daare neme aba ome onaa ratamea pe. 19 Go ona adola peme aanu nimu oro yalo epe-rupa pirape pora gimoa wae pora ratulalo peme-pulu epe pora narateme.

20 Epe pora ratamea pope kone salidare neme epe pora ratua mada niminaali. 21 Epe aanuri go su-ama oro yalo epe pora ratua pa piralimi. 22 Go yapare Gote-me waea pi aanu nimu ratu talia. Gore onaame nimuna maapu-para etaa wae mea rasu rubeme-rupa nimu mea rasu rubalia.