1 Nil Jesus.an kanan meeꞌ-wuthanam-a, nil-a, ngurp nungantaman kan iiyin, punth Kidron wakan woꞌuwaynak. Aak woꞌuwaynanganiy-a, yuk than-thanin, keꞌ orchard yimanangan. Aꞌ than Jesus weeꞌanang aak-aakanakan iiyin. 2 Than kaꞌathaman-a, maꞌ-yotam iiy-iiyin aak-aakanakaniy, nanpalan nil Judas.angan-a, aak anan meeꞌmiy — pam nilan wik yump pam way al-alantangan than yipam Jesus.an mulathayn nunang. 3 Aꞌ nil Judas.angan-a, pam yot anangan yalmath thanang, aꞌ karpam kal thanang, orchard aakanakan. Than wiyaniy-a, soldiers; than wiyaniy-a, thapangumpan than puth aawuch ngench thayanan piꞌ-piꞌin. Than pam inangan-a, pam piꞌan priests al-alangan aꞌ puth Pharisees al-alangan kuchin thanang. Than soldiers aꞌ thapangumpan al-alangan kich nonham aꞌ yuk muurkan aꞌ nhengk-peempan thak kalin. 4 Nil Jesus.an kan meeꞌmiy than ngeenan yumpayn nungant, nilan puth umang kal thanang, aꞌ thaw ngul thant, “Niiy weeꞌant wenk-wenkaniy a?” 5 Thanan thawin nungant, “Ngan nungant Jesus.ant wenk-wenkanan a!” Nil Jesus.an thaw thant, “Ngay ina!”

Niliy-a, Judas.an-a, angman than-than thanttang, pam way al-alantangan, nil Jesus.an yipam maꞌam theeꞌow thant. 6 Nil Jesus.an wik yimanangan thaw-a, than mangkam kuunyin, aꞌ aakang keekin. 7 Aꞌ nil Jesus.an-a, putham thaw thant, “Niiy weeꞌant wenkaniy a?” Aꞌ than thawin, “Ngan nungant Jesus.ant wenk-wenkanan a!” 8 Aꞌ nil Jesus.an thaw thant, “Ngay puth kaꞌathaman kan waaꞌangan niiyant, ‘Ngay ina!’ Niiy ngathar wampan ey? Yaa, niiy ngurp ngatharam inangan-a, kuchān thanang, mak iiyayn!” 9 (Nil Jesus.an wik yimanangan thaw, yipam meenathow thant wik nil kaꞌathaman thaw piip nungantamant, an kan-kanam paththaman thaw, wik yimanangan, “Piip-ang, ngay minam kan piꞌ-piꞌang thanang, pam anangan nintan thawan than ngurp ngatharaman iiy-iiyayn. Ngay thanang maꞌmangkam minam piꞌ-piꞌangan thanang, ngay puth keꞌam maꞌ wayathangan thananga, yotam minam anman piꞌ-piꞌang thananga.”)

10 Aꞌ nil Simon Peter.aniy-a, angman than-than, nhengk-peempan ongk kal-kal. Nil nhengk-peempanan-a, erkam wich, aꞌ kon mal thalokang ump nunang, pam thonaman. Pam ananiy-a, namp nungant Malchus, nil workan iiy-iiy pam piꞌan alantan, moom priestsantamak. 11 Aꞌ nil Jesus.an thaw Peter.ant, “Nint nhengk-peempanan koyam wunpān a! Nil God.ang puth ngayang kuch iikanakan, thanan mak kalayn ngayang. An way paththam ngathar, puth kana, than mak kalayn ngayanga.”

12 Aꞌ nil Jesus.an wik inangan kanan thaw-a, thananiy-a, soldiers-a, aꞌ pam thapangumpan al-alangan mamin nunang, aꞌ maꞌ kathin nunang. 13 Aꞌ than pam piꞌan alantan Annas.ant kalin nunang, Jesus.an. Nil Annas.an-a, kaal-aamp Caiaphas.antam. Nil puth Caiaphas.an-a, moom piꞌan priestsantam. 14 Nil Caiaphas.an-a, kaꞌathaman anman thaw thant, councillors Jews.antam al-alantan, wik inaniya, “An min niiyant, than pam thonam mak mulathayn nunang niiy yotam yipam man-yetham iiy-iiyāna!”

15-16 Anpalana Simon Peter.ang pul ngurp Jesus.antam thon alangan monkan-wakpul nunang Jesus.an aak-aakanakan aawuch pam piꞌanantamak, pam moom priestsantam alantamakan. Nil Peter.an yoon than-than, thaaꞌ gate thinth. Puth nil pam thonan-a, ep aakanak pek ngoonch, Jesus.antang, aak engkan um-menhang aakanakan, courtyardan waaꞌantan. Nil pam moom piꞌanangan meeꞌmiy nunang, nanpalan nil angan ngoonch. Aꞌ ngul-a, nil koyam ngul iiy, thaaꞌ gate aakanakan, aꞌ wanch komanant thaw, thaaꞌ gate.an piꞌ-piꞌ, “Nil Peter.an mak ngoonchowa.” Aꞌ nil Peter.an pek ngul ngoonch. 17 Aꞌ nil wanch komanan thaw ngul, Peter.ant, “Nint tham ngurp nungantam yaꞌ ey? pam alantamaniy ey?” Nil Peter.an wik uuyam, aꞌ thawant, “Yaꞌa!”

18 Aak angman-a, than pam wiy anangan than-thanin, thapangumpan aꞌ pam workan iiy-iiyin. Than kaꞌathaman thum karkan kiingkin, puth aak kuchara. Aꞌ than pam ananganiy-a, thum thinth than-thanin, thumangan park-parkin. Aꞌ nil Peter.an iiy thant, nil thanttang angman than-than, thumangan park-park ngul.

19 Anpalaniy-a, nil moom piꞌan priest Annas.ana engk nungant, Jesus.antan, ngurp nungantam al-alantaman, aꞌ puth wik anpalan engk nungant nilan thaaꞌ-aath-aath thanang. 20 Nil Jesus.an thawant, “Ngay pam wanch yotaman kan thaaꞌ-aath-aathang thanang meeꞌ yotantangana, wiyiya, aawuch ngench thayanangan puth wiyiy-a, churches ngamparamang angan, aak angman ngamp Jews karpam yal-yalmathwump. Ngay wik mupam keꞌam piꞌ-piꞌang, yaꞌa. 21 Nint ngeenak ngath engk-engkangan a? Nint thant engkāna, thanan wik ngayangan ngeeyin — than ep thiichin wik ngayan thaaꞌ-aath-aathang thanang.” 22 Nil Jesus.an wik inangan thaw-a, aꞌ nil pam thapangumpan alangan wal-mant piik nunang, aꞌ thawant, “Nint wik yimanangan keꞌ thawān a! pam moom piꞌan nalantan a!” 23 Nil Jesus.an thawant, “Ngul wanttak iniy e? Wik ananiy ngul ngay way-wayak thawangan nungant ey? Nint waaꞌān thant ngay wik way wanttakan thawangan. Puth yaꞌa, ngay wik min anman thawangan niiyant, puth nint ngayang ngeenam piikana?” 24 Aꞌ nil Annas.an thaw thant kalayn nunang, Caiaphas alantan, pam moom priests alantan. Than nunang Jesus.an yaam yippak maꞌ kathanang kalin nunang.

25 Than Caiaphas.antan kalin nunang Jesus.an-a, nil Peter.aniy-a, angman thum thinth than-than, aꞌ park-park. Aꞌ than wiy anangan thawin nungant, “Nint ngurp nungantam yaꞌ ey? pam alantamaniy ey?” Nil Peter.an wik uuyam thant, “Yaꞌa!” thaw. 26 Aꞌ pam thonam angman than, nilan work iiy-iiy pam moom priest alantan. Nil pam kampan Malchus.antam, Malchus pam anana, Peter.angan kon umpan. Nil thaw nungant, Peter.ant, “Ngay keꞌ nintangan thathangan ee! nungantang angan than-thanan, orchardang angan.” 27 Nil Peter.an-a, putham wik uuyam thant, “An ngay yaꞌam a!” thaw. Nil wik inangan thaw-a, minh roosteran pech-pech.

28 Anpalaniy-a, meeꞌ-ngutangaman-a, than Jesus.an kalin nunang aawuch Caiaphas.antam anpalan; amanaman-a, aak thonak ngul kalin nunang aak aawuch Pilate.antamakan. Pam inan Pilate aak Rome punchan, pam nil moom piꞌan iiy-iiya, nil puth aak Jews.antam piꞌ-piꞌ. Than aawuch nungantamak Jesus.an kalin nunang. Than puth Jews anangan keꞌam ngoonchin, aak anganiy, than yoon than-thanin, puth aak thinth ngul wamp may piꞌan Passover.an mungkayn, an puth aak thant yimanangan wun; than nath ngoonchiythan aawuch pam wiyantamangan Jew yaꞌan-a, than may piꞌan keꞌ mungkiythan. 29 Nanpalan nil Pilate.an yoon pent thant, aꞌ thaw thant, “Niiyalang, pam nil alangan way ngeen yump niiyanta? Niiy ngeenam kalan nunang courtakana?” 30 Thanan puth thawin nungant, “Nil way keꞌwey iiy-iiyiywey-a, nganan keꞌ kalin nunang nungkar.” 31 Nil Pilate.an thaw thant, “Niiyam kalān nunang court niiyantamakana! pam piꞌan niiyantam thawayn nungant yipmam.” Than puth Jews anangan thawin nungant, “An yaꞌa, puth niiy Romans.an kan thawan pam piꞌan nganttam al-alangan pam keꞌ kuchayn mulakan.” 32 (Ngul-ngulana, nil Pilate.angan ep kuch nunang Jesus.an mulakanweya, aꞌ than yuk wuuyanangan waanchin nunang. Kaꞌathamana nil Jesus.angan nungantakam waaꞌ nil want-wanttakan uthamow. Nil Pilate.an wik inangan thaw-a, an wik nungantamana kan-kanam ngul wamp.)

33 Aꞌ nil Pilate.an-a, koyam ngul ngoonch, aawuch nungantamang angan, aꞌ thaw thant Jesus.an kalayn nunang. Aꞌ nil engkant, “Nint in king Jews al-alantaman ey?” 34 Nil Jesus.an thawant, “Wik inangan nintan engkanar-a, nint-nintaman ngaantam-ngeeyangan ngayang ey? nath yaꞌa, wiyangan waaꞌin ngayang nungkar ey?” 35 Aꞌ nil Pilate.an thawant, “Ngul ngay in Jew ey? Ngay Jew yaꞌa! An puth than pam wanch kampan nungkaramang aꞌ pam piꞌan priests al-alangan kalin nintang ngathar. Nint kan waaꞌān ngathara, nint way ngeen yumpan a?” 36 Nil Jesus.an thaw, “Ngay keꞌ kings niiyantam yimanangan yaꞌa, ngay puth aak inpalman keꞌam wampangan yaꞌa. Ngay nath aak inpalman wampingwey-a, an than ngurp ngatharam anangan-a, kul yumpiythan niiyant, ngatharam peeyanang, than moom Jews.antam al-alangan keꞌ yipam mamayn ngayang, than keꞌ yipam kuchayn ngayangan thant, Jews al-alantan. Puth yaꞌa, ngay aak inpalman keꞌam wampangan, yaꞌa.” 37 Aꞌ nil Pilate.an engkant ngul, Jesus.antan, “Puth nint king kan-kanam ey?” Nil Jesus.an thawant, “Nint nan kan waaꞌangan ngayang, kingana. Ngay ukangan aak iikanakan ngay yipam wik kan-kanaman waaꞌāng niiyant. Puth weeꞌ-weeꞌanangan kaangk wik anangan ngeeyayn-a, than al-alangaman wik ngeeyantan ngayang.” 38 Nil Pilate.an thawant, “Puth wik ngeen waaꞌangan wik kan-kanamaniy e?”

Anpalaniy-a, nil Pilate.an koyam pent Jews al-alantan, thaw thant, “Ngay puth ep ngeeying nunang pam inaniy nil wayan keꞌam iiy-iiy, yaꞌa. 39 Puth in ngeeyān a! Aak puth niiyantan yimanangan wun; kaap thon-thonangan-a, may piꞌanan kiingkaniy Passover.an-a, ngay pam thon-thonam kuch-kuchang niiyant aak jail anpalan. Ngay pam inan-a, king niiyantaman kuchāngan ey?” 40 Aꞌ than pam anangan pechin nungant, “Yaꞌa! pam nanan yaꞌa! Nint pam Barabbas.an kuchān nunang a!” Pam nilan Barabbas.an puth kulliy, aꞌ maꞌ-kuchan.