1 Aê jalêŋ biŋ laumata, taŋ sêmoa amac ŋalêlôm naŋ. Aê laumata teŋ katôm amac ma galic Kilisi gêôc ŋandaŋ ma oc jawê kaiŋ ŋawasi, taŋ mêŋêtu awê êtu ŋamu naŋ. 2 Ajop Anôtônê domba ŋatoŋ, taŋ kêkêŋ gêdêŋ amac naŋ, ma ajop êtu sêkac amacŋa atom. Taôm aŋgôm anac ŋawae êtôm Anôtônê biŋ. Aŋgôm êtu awa geoŋa atom, aŋgôm êtu nêm sakiŋ topalêgeŋŋa. 3 Ajop êsêac, taŋ sêsêp amac lemem naŋ amboac gôliŋwaga, taŋ sêkôniŋ nêŋ gôlôac naŋ atom. Atu ŋadôŋdôŋ ŋajam êndêŋ nêm domba ŋatoŋ. 4 Ma gejobsêga tau embe êô lasê, go amac akôc ŋawasi ŋasunsuŋ, taŋ ênaŋa atom naŋ.

5 Amac lau wakuc amboac tonaŋ. Asô lau ŋanô ŋalabu. Amac samob akôniŋ taôm to anam sakiŋ taôm êndêŋ-êndêŋgeŋ, êtôm teto gêc gebe

6 Amboac tonaŋ akôniŋ taôm asô Anôtônê lêma ŋajaŋa ŋalabugeŋ, ec etoc amac sa êndêŋ ŋanoc. 7 Gêŋwapac samob, taŋ kêkôniŋ amac naŋ, apô êpi eŋ êna, gebe eŋ gejob amac. 8 Tekwem saki ma anam jaligeŋ, gebe amacnêm ŋacjo Sadaŋ kêsêlêŋ kêtaŋ-kêtaŋ amboac lewe ma gesom nê gêŋ gebe êndaŋgôŋ. 9 Aŋgamiŋ taôm êndêŋ eŋ ma akêŋ êwiŋ ŋajaŋa. Ma ajala gebe amacnêm lasitêwai, taŋ sêmoa nom ŋagamêŋ samob naŋ, sêôc ŋandaŋ tau tonaŋ têtôm amac. 10 Moasiŋ samob ŋatau Anôtô, taŋ gêbiŋ amac to Kilisi tôŋ naŋ, kêkalem amac gebe akôc ênê ŋawasi teŋgeŋŋa. Oc akôc ŋandaŋ têlageŋ ma eŋ tau mêŋênac dabiŋ amac to êpuc amac tôŋ, ma êkêŋ ŋaclai êndêŋ amac to ênsuŋ amac sa akô ŋajaŋa. 11 Ŋajaŋa êndêŋ eŋ endeŋ tôŋgeŋ. Biŋŋanô.

12 Aê kato papia dambê tonaŋ gêdêŋ amac ma lasic Silwana, taŋ galic eŋ amboac ŋac ŋaŋêŋ naŋ, gêjam aê sa. Aê galêŋ biŋ to gawa sa gêdêŋ amac gebe Anôtônê moasiŋ ŋanô tau tonec. Akô ŋajaŋa akô moasiŋ tau ŋalêlôm. 13 Gôlôac dabuŋ aŋga Babel, taŋ Anôtô kêjaliŋ êsêac sa sêwiŋ naŋ, aweŋ gêjac amac, ma latuc Marka amboac tonaŋgeŋ. 14 Aê moalêc taôm to akôc taôm sa totêmtac êwiŋgeŋ.

Biŋmalô êndêŋ amac samob, taŋ Kilisi gêbiŋ amac tôŋ naŋ êwac.