1 Gêŋ tonaŋ su acgom, go Esra kêpi aŋga Babilon gêmêŋ gêdêŋ taŋ kiŋ Persiaŋa Artakerkes gêjam gôliŋ gamêŋ naŋ. Esra eŋ Asaria latu, naŋ Kilkia latu, 2 naŋ Salum latu, naŋ Sadok latu, naŋ Ahitub latu, 3 naŋ Amaria latu, naŋ Asaria latu, naŋ Meraiot latu, 4 naŋ Serajah latu, naŋ Usi latu, naŋ Buki latu, 5 naŋ Abisua latu, naŋ Pinahas latu, naŋ Eleasar latu, naŋ dabuŋwaga Aron latu. 6 Esra tau tonaŋ aŋga malac Babilon kêpi Jerusalem gêja. Eŋ kêtu biŋsutau teŋ, taŋ kêjala Mosenê biŋsu, taŋ Apômtau, Israelnêŋ Anôtô kêkêŋ naŋ, tomalageŋ, Ma kiŋ kêkêŋ gêŋ samob, taŋ eŋ keteŋ naŋ, gebe Apômtau, ênê Anôtônê lêma gejob eŋ.

7 Gêdêŋ taŋ kiŋ Artakerkes nê jala gôliŋŋa kêtu 7 naŋ, lau Israel nêŋ ŋagêdô sêpi Jerusalem sêja amboac tonaŋgeŋ ma dabuŋwaga to lau Lewi ma lau wêŋa to gejobwaga sacgêdôŋa ma sakiŋwaga lôm dabuŋŋa sêwiŋ. 8 Ma Esra gêô lasê Jerusalem gêdêŋ kiŋnê jala gôliŋŋa kêtu 7 ŋaajôŋ kêtu lemeŋteŋŋa. 9 Gêdêŋ ajôŋ ŋamata ŋabêc ŋamataŋa eŋ gêdi aŋga Babilon ma gêdêŋ ajôŋ kêtu lemeŋteŋ ŋabêc ŋamataŋa eŋ gêô lasê Jerusalem gebe ênê Anôtônê lêma ŋajam kêkêŋ ajuŋ eŋ. 10 Esra nê ŋalêlôm kêkac eŋ gebe êndôŋ tau e êjala Apômtaunê biŋsu to êŋgôm ŋanô êsa ma êndôŋ ŋagôliŋ to jatu aŋga Israel.

11 Biŋ tonec kêsêp papia, taŋ kiŋ Artakerkes kêkêŋ gêdêŋ dabuŋwaga to biŋsutau Esra, taŋ kêjala Apômtaunê biŋsu to ŋagôliŋ, taŋ Anôtô kêkêŋ gêdêŋ Israel naŋ kêtu toŋ. 12 “Kiŋ samob nêŋ kiŋ Artakerkes nê papia êndêŋ dabuŋwaga Esra, Anôtô undambêŋa nê biŋsu ŋabiŋsutêna. 13 Aê kajatu biŋ tonec gebe lau Israel nêŋ teŋ me nêŋ dabuŋwaga to ŋac Lewi teŋ, taŋ gêmoa ŋoc gamêŋ kiŋŋa ma nê ŋalêlôm êkac eŋ gebe êna Jerusalem naŋ, êtôm gebe êwiŋ aôm êna. 14 Aê kiŋ to ŋoc lau seŋeŋ 7 asakiŋ aôm gebe ônac gamêŋ Juda to Jerusalemŋa kêsi ma ônam dôŋ ŋabiŋ êpi aômnêm Anôtônê biŋsu, taŋ kêsêp aôm lêmam naŋ. 15 Ôkôc silber to gold, taŋ aê kiŋ ma ŋoc lau seŋeŋŋa akêŋ toma ŋalêlôm samucgeŋ gêdêŋ Israelnêŋ Anôtô, taŋ gêŋgôŋ Jerusalem naŋ, ôna amboac tonaŋgeŋ. 16 Ôkôc silber to gold samob, taŋ aôm oc ôtap sa aŋga gamêŋ Babilonŋa samucgeŋ naŋ ma da, taŋ lau Israel to nêŋ dabuŋwaga sêkêŋ tonêŋ ŋalêlôm samucgeŋ êtu nêŋ Anôtônê andu aŋga Jerusalem naŋ. 17 Mone tonaŋ aôm ôkôc ma ônam ôli bulimakao kapoac to domba kapoac ma domba ŋalatu êwiŋ da keleŋ to wain, taŋ sêkêc êtu da naŋ. Ôkêŋ gêŋ tau êtu da ênsac aômnêm Anôtônê andu ŋaaltar, taŋ kêkô Jerusalem naŋ. 18 Ma aôm to nêm lasitêwai aŋgôm silber to gold, taŋ gacgeŋ gêc naŋ, êtôm amac alic ŋajam ma êtôm amacnêm Anôtônê biŋ naŋ. 19 Laclu taŋ sêkêŋ gêdêŋ aôm kêtu Anôtônê andu ŋasakiŋ naŋ, aôm oc ôkêŋ tomalageŋ ênêc Anôtô laŋônêmŋa aŋga Jerusalem. 20 Gêŋ ŋagêdô samob, taŋ embe ôpô lêna êtu Anôtônê anduŋa naŋ, ma gêŋ taŋ gêjac aôm ŋawae gebe ônam ôliŋa naŋ, ôkôc ŋamone sa aŋga kiŋnê kanom.

21 “Ma aê, kiŋ Artakerkes, ŋoc jatu gêdêŋ kanomwaga samob, taŋ sêmoa bu ŋamakeŋ ônêŋa naŋ, gebe akêŋ gêŋ samob, taŋ dabuŋwaga Esra, Anôtô undambêŋa nê biŋsu ŋabiŋsutêna eteŋ êndêŋ amac naŋ topalêgeŋ. 22 Akêŋ silber e naêtôm talu 10 to polom ŋanô ŋadôŋ 100 ma wain ŋagasuc 100 to niptêkwi ŋagasuc 100 ma gwêc akêŋgeŋ. 23 Gêŋ samob, taŋ Anôtô undambêŋa kêjatu sa naŋ, aŋgôm ŋanô êsa toôlim palêgeŋ êtu Anôtô undambêŋa nê anduŋa gebe ênê têtac ŋandaŋ êsa êtu kiŋnê gamêŋ to nê latuiŋa atom. 24 Ma aêac akêŋ ŋawae êndêŋ amac amboac tonaŋgeŋ gebe ajac jao gebe amac akôc takis tokaiŋ-tokaiŋ aŋga êsêac dabuŋwaga to lau Lewi ma lau wêŋa to gejobwaga katamŋa ma sakiŋwaga lôm dabuŋŋa to sakiŋwaga Anôtônê anduŋa samob nêŋ teŋ atom.

25 “Ma aôm Esra ôjaliŋ gôliŋwaga to mêtôcwaga sa êtôm nêm Anôtônê kauc, taŋ gôwê kaiŋ naŋ gebe sêmêtôc lau samob, taŋ sêŋgôŋ bu ŋamakeŋ ônêŋa naŋ. Êsêac sêmêtôc lau samob, taŋ sêjala Anôtônê biŋsu su naŋ to êsêac, taŋ sêjala biŋsu su atom tageŋ naŋ, ôndôŋ êsêac acgom. 26 Ma êsêac taŋ taŋeŋ wamu nêm Anôtônê biŋsu to kiŋnê jatu atom naŋ, sêmêtôc êsêac solopgeŋ, êsêac sêmac êndu me sêmasuc êsêac me sênam ôli nêŋ keso ŋa nêŋ waba me sêŋgôŋ kapoacwalô.”

27 Esra kêsôm gebe “Aweŋ gêôc Apômtau, aêac tameŋinêŋ Anôtô, taŋ kêkêŋ kauc amboac tonaŋ kêsêp kiŋnê ŋalêlôm gebe êŋgôm Apômtaunê andu, taŋ kêkô Jerusalem naŋ, ŋawae êsa. 28 Ma kêmoasiŋ aê e kiŋ to nê lau seŋeŋ ma nê lau ŋactêkwa sêlic aê ŋajam. Aê têtac kêpa su gebe Apômtau, ŋoc Anôtô nê lêma gêwiŋ aê ma gajac laumata Israelŋa sa gebe sêpi sêwiŋ aê sêna.”