1 Lau nomŋa samob sêsôm biŋ aweŋ tageŋ to ŋalô tageŋ. 2 Gêdêŋ taŋ êsêac dêdi aŋga gamêŋ oc kêpiŋa naŋ, sêsêlêŋ e têtap gaboaŋ teŋ sa gêc gamêŋ Sinar ma sêŋgôŋ tonaŋ. 3 Ma êsêac sêôc tauŋ gebe “Ajôc, tamansaŋ nomku têkê-têkê ma tapac e ŋajaŋa êsa.” Ma êsêac sêkôc poc nomkuŋa gêjô poc anô ma sêkôc kolda kêtu sêsap poc tôŋŋa. 4 Go sêsôm gebe “Ajôc, takwê nêŋ malac teŋ sa to andu baliŋ teŋ e ŋatêpôê soso êpi undambê gebe tamboa nêŋ ŋaê sa, gebe têta aêac saliŋ-saliŋ tanam nom samuc auc atom.” 5 Go Apômtau kêsêp gêmêŋ gebe êlic malac to andu soso, taŋ ŋamalac latuŋi sêkwê sa naŋ. 6 Ma Apômtau kêsôm gebe “Kec, êsêac lau m tageŋ ma samob sêsôm aweŋ tageŋ. Ma kôm, taŋ sêjac m naŋ, oc sênac têku ma gêŋ samob, taŋ êsêac taêŋ ênam gebe sêŋgômŋa naŋ, ŋateŋ oc êkêŋ wapac êsêac atom. 7 Ajôc, tasêp tana ma taŋgaluŋ êsêac aweŋ gebe sêŋô tauŋ nêŋ biŋ sapu.” 8 Ma Apômtau kêta êsêac saliŋ-saliŋ e jasêjam nom samucgeŋ auc ma êsêac sêpô kôm sêkwê malac saŋa siŋ. 9 Kêtu tonaŋŋa sê malac tau ŋaê gebe Babel, ŋam gebe Apômtau kêgaluŋ lau nomŋa samob aweŋ aŋga ônê ma kêta êsêac saliŋ-saliŋ e sêjam nom samucgeŋ auc.

10 Semnê wakuc tau tonec. Bu kêsuŋ ŋatêna kêpa ma jala luagêc gêbacnê, go Semnê jala kêtu 100, ma kêka Arpaksad lasê. 11 Arpaksad têna kêkôc eŋ su ma Sem gêmoa nom jala 500 gêwiŋ, go kêka latuio to ŋac ŋagêdô lasê. 12 Arpaksadnê jala kêtu 35 ma kêka Sela lasê. 13 Sela têna kêkôc eŋ su ma Arpaksad gêmoa nom jala 403 gêwiŋ, go kêka latuio to ŋac ŋagêdô lasê. 14 Selanê jala kêtu 30 ma kêka Eber lasê. 15 Eber têna kêkôc eŋ su ma Sela gêmoa nom jala 403 gêwiŋ, go kêka latuio to ŋac ŋagêdô lasê. 16 Ebernê jala kêtu 34 ma kêka Peleg lasê. 17 Peleg têna kêkôc eŋ su ma Eber gêmoa nom jala 430 gêwiŋ, go kêka latuio to ŋac ŋagêdô lasê. 18 Pelegnê jala kêtu 30 ma kêka Reu lasê. 19 Reu têna kêkôc eŋ su ma Peleg gêmoa nom jala 209 gêwiŋ, go kêka latuio to ŋac ŋagêdô lasê. 20 Reunê jala kêtu 32 ma kêka Serug lasê. 21 Serug têna kêkôc eŋ su ma Reu gêmoa nom jala 207 gêwiŋ, go kêka latuio to ŋac ŋagêdô lasê. 22 Serugnê jala kêtu 30 ma kêka Nahor lasê. 23 Nahor têna kêkôc eŋ su ma Serug gêmoa nom jala 200 gêwiŋ, go kêka latuio to ŋac ŋagêdô lasê. 24 Nahornê jala kêtu 29 ma kêka Tara lasê. 25 Tara têna kêkôc eŋ su ma Nahor gêmoa nom jala 119 gêwiŋ, go kêka latuio to ŋac ŋagêdô lasê. 26 Taranê jala kêtu 70 ma kêka Abram agêc Nahor ma Haran lasê.

27 Taranê wakuc tau tonec. Tara kêka Abram agêc Nahor ma Haran lasê. Ma Haran kêka Lot lasê. 28 Haran gêmac êndu gêmuŋ tama Tara aŋga nê malacmôkê Ur aŋga Kaldea. 29 Ma Abram agêc Nahor sêjam awê sa. Abramnê awênê ŋaê gebe Sarai, Nahornê awênê ŋaê gebe Milka, eŋ Haran latuo, Haran, taŋ kêka Milka agêc Iska lasê naŋ. 30 Ma Sarai eŋ awê kapoac, eŋ kêkôc ŋapalê teŋ atom.

31 Tara kêkôc latu Abram agêc dêbu Lot, naŋ Haran latu ma lawao Sarai, latu Abram nê awê, ma êsêac sêwi Ur aŋga Kaldea siŋ gebe sêna gamêŋ Kanaan. Mago gêdêŋ taŋ êsêac sêô lasê Haran naŋ sêŋgôŋ tônê. 32 Taranê jala kêtu 205 ma Tara gêmac êndu aŋga Haran.