1 Ma aŋela luagêc sêô lasê Sodom gêdêŋ kêtulala. Lot gêŋgôŋ malac ŋasacgêdô. Eŋ gêlic êsêagêc ma gêdi sa gebe êpuc êsêagêc tôŋtôŋ ma gewec laŋôanô jagêdêŋ nom 2 ma kêsôm gebe “O apômtauagêc, aê jateŋ amagêc gebe anam nêm lêŋ ôkwi api nêm sakiŋwaganê andu. Akwasiŋ emkaiŋ to anêc bêc. Êndêŋ bêbêc kanucgeŋ, go andi ma asêlêŋ nêm intêna.” Mago êsêagêc sêsôm gebe” Masi, aêagêc anêc malacluŋ tonec.” 3 Mago eŋ kêkac êsêagêc ŋapaŋ, tec agêc sêjam nêŋ lêŋ ôkwi sêwiŋ eŋ sêpi ênê andu. Ma Lot kêmasaŋ moasiŋ gêdêŋ êsêagêc to kêpac polom ŋaluc ma agêc seŋ. 4 Êsêagêc sêc bêc atom tageŋ ma ŋacwaga malacm, ŋacwaga aŋga Sodom tau, wakuc to laŋgwa sêwiŋ tauŋ. Lau samob tomalageŋ sêgi andu tau auc. 5 Ma êsêac sêmôêc Lot ma sêsôm gebe “Ŋacwaga, taŋ sêô lasê aôm gêdêŋ gêbêc naŋ, sêmoa ondoc. Ôkôc êsêagêc sêsa sêndêŋ aêac sêmêŋmaŋ gebe ajala êsêagêc.” 6 Go Lot kêsa gêdêŋ êsêac gêja gê katam gêc muŋa 7 ma kêsôm gebe “O lasitêwaiac, aŋgôm sec amboac tonaŋ atom. 8 Alicgac me, latucoagêc sêmoa, taŋ sêjam kauc ŋacwaga. Aê gabe jakêŋ êsêagêc sêndêŋ amac. Aŋgôm êsêagêc amboac têmtac gêwiŋ. Mago aŋgôm ŋaclagêc tonaŋ sec atom, gebe êsêagêc sêsô ŋoc salôm ŋalabu sugac.” 9 Mago êsêac sêsôm gebe “Aôm ôêc su.” Ma sêsôm gebe “Ŋac tonec gêô lasê amboac ŋac jaba ma galoc ketoc tau sa gebe êtu ŋac-êmêtôc-biŋwaga. Amboac tonaŋ, aêac aŋgôm aôm sec êlêlêc êsêagêc su.” Ma êsêac guluc-gulucgeŋ sebe sêkôc Lot tôŋ ma sebe têtuc katam popoc. 10 Mago ŋaclagêc sêmêtôc lemeŋ ma sê Lot kêsô andu gêdêŋ êsêagêc gêja ma sêsaŋ katam auc. 11 Ma sêgôm ŋacwaga sauŋ to kapôêŋ, taŋ sêmoa katam dêmôêŋa naŋ, mateŋpec kêsa e seso katam elêmê. 12 Go ŋaclu sêsôm gêdêŋ Lot gebe “Aômnêm lau ŋagêdô sêmoa tonec me masi. Aômnêm lawami to latômio ma nêm lau, ŋagêdô, taŋ sêmoa malac naŋ, ôwê êsêac awi malac tonec Siŋ. 13 Gebe aêagêc abe anseŋ malac tonec su gebe Apômtau gêŋô êsêacnêŋ biŋ gêjam sêga ma kêsakiŋ aêagêc gebe anseŋ êsêac su.” 14 Ma Lot kêsa gêja ma kêsôm gêdêŋ lawai, taŋ sebe sênam latuoagêc gebe “Ajôc, awi malac tonec siŋ gebe Apômtau oc enseŋ su.” Mago lawai sêlic eŋ amboac ŋac kêsôm biŋ makic teŋ.

15 Gêu bôŋ ma aŋela sêkac Lot ma sêsôm gebe “Ôndi, ôkôc nêm awê to latômoagêc, taŋ sêmoa tonec naŋ, gebe ŋagêjô, taŋ êtap malac sa naŋ, enseŋ aôm su ôwiŋ atom.” 16 Lot kêlênageŋ, tec ŋaclu sêkam êsêagêc nê awê to latuoagêc lemeŋ gebe Apômtau gebe ênam êsêac sa ma sêwê eŋ gêwi malac siŋ ma sêkêŋ eŋ kêlêwaŋ tau gêŋgôŋ malac ŋamagê. 17 Êsêagêc sêkêŋ êsêac sêmoa awê ma sêsôm gebe “Ôêc ônam katôm kêsi, ôkac taôm ôkwi atom to ôkô ôniŋ awam aŋga gaboaŋ tonec atom. Ôêc ôpi lôc ôna gebe ônaŋa atom.” 18 Mago Lot kêsôm gêdêŋ êsêagêc gebe “O apômtauagêc, masianô. 19 Amagêc amoasiŋ nêm sakiŋwaga ma taêm walô aê tec ajam aê kêsi gebe janaŋa atom. Mago aê katôm gebe jaêc japi lôc atom. Gêŋwapac oc êtap aê sa ma jamac êndu. 20 Alic acgom, malac tônê gêc ŋagala kêtôm gebe jaêc jana tônê, ma malac tau sauŋanô. Ôlôc sa gebe jaêc jana tônê. Malac tau sauŋanô atom me. Jaêc jana tônê, go jamoa matoc jali.” 21 Apômtau kêsôm gêdêŋ eŋ gebe “Amboac tonaŋ, aê gabe jalôc sa ma janseŋ malac, taŋ kôsôm ŋabiŋ naŋ, su atom. 22 bêc ôna tônê ŋagaôgeŋmaŋ. Aê jaŋgôm gêŋ teŋ ŋagaô atom e ô lasê malac tônê su acgom.” Kêtu tonaŋŋa sêsam malac ŋaê gebe Soar. 23 Oc kêpi kêpô nom ma Lot gêô lasê Soar.

24 Go Apômtau kêkêŋ talao to ja aŋga undambê gêjac Sodom to Gomora aŋga Apômtaunê. 25 Ma eŋ geseŋ malac tonaŋ to gamêŋ gaboaŋ ma malac to ŋalau pebeŋ to gêŋ, taŋ kêpi aŋga nom naŋ. 26 Mago Lotnê awê, taŋ kêdaguc eŋ naŋ, kêkac tau ôkwi, tec kêtu pocgwêc. 27 Ma bêbêc kanucgeŋ Abraham gêdi ma jakêsa gamêŋ, taŋ eŋ kêkô Apômtau laŋônêmŋa naŋ, 28 ma mata gê Sodom to Gomora ma gamêŋ gaboaŋŋa samob ma gêlic jadauŋ kêpi amboac ja geŋ kôm.

29 Gêdêŋ taŋ Anôtô geseŋ malac gaboaŋŋa su naŋ, eŋ taê gêjam Abraham ma gêwê Lot gêc gamêŋ, taŋ gêjaŋa naŋ su. Biŋ tau kêsa gêdêŋ Anôtô geseŋ malac, taŋ Lot gêŋgôŋ naŋ su.

30 Ma Lot gêwi Soar siŋ jakêpi lôc gêwiŋ latuoagêc gebe eŋ kêtêc tau, tec gêwi Soar siŋ. Ma eŋ gêwiŋ latuoagêc jasêŋgôŋ pocgêsuŋ teŋ. 31 Ma awêsêga kêsôm gêdêŋ awê sauŋ gebe “Tameŋi kêtu ŋamalacanô sugac ma ŋac teŋ gêmoa nom tonec atom gebe êmoa êwiŋ aêagêc amboac sêgôm-sêgôm kêtôm gamêŋgeŋ. 32 Ajôc, aêagêc takêŋ wain êndêŋ tameŋi ênôm e êjaŋiŋ eŋ, go tanêc dawiŋ eŋ gebe nêŋ wakuc sêsa aŋga tameŋinê.” 33 Tec gêdêŋ gêbêc sêkêŋ wain gêdêŋ tameŋi gênôm e kêjaŋiŋ eŋ. Ma awêsêga kêsô gêja gêc gêwiŋ tama. Gêc gêwiŋ eŋ ma gêdi sa, mago tama kêsaê atom. 34 Ŋageleŋ awêsêga kêsôm gêdêŋ awê sauŋ gebe “Gêdêŋ gêbêc aê gaêc gawiŋ tamoc ma êndêŋ êmbêc takêŋ wain êndêŋ eŋ ênôm êtiam. Su, go aôm ôsô naônêc ôwiŋ eŋ gebe tatap nêŋ wakuc sa aŋga tameŋinê.” 35 Tec gêdêŋ gêbêc sêkêŋ wain gêdêŋ tameŋi e kêjaŋiŋ eŋ kêtiam. Ma awê sauŋ gêdi jagêc gêwiŋ eŋ. Gêc gêwiŋ eŋ ma gêdi sa, mago tama kêsaê atom. 36 Tec Lot latuoagêc lulugeŋ taêŋ aŋga tameŋinê. 37 Ma awêsêga kêkôc ŋapalê ŋac ma gê ênê ŋaê gebe Moab. Eŋ kêtu lau Moab têm galocŋa nêŋ abeŋi. 38 Ma awê sauŋ kêkôc ŋapalê ŋac amboac tonaŋgeŋ ma gê ênê ŋaê gebe Ben-Ami. Eŋ kêtu lau gamêŋ Amonŋa têm galocŋa nêŋ abeŋi. * Soar ŋam gebe Gêŋ sauŋ. † Moab ŋam gebe Aŋga tamocnê. ‡ Ben-Ami ŋam gebe Ŋoc tawaŋ latu.