1 Amboac tonaŋ Josep kêsô jakêkêŋ ŋawae gêdêŋ Parao ma kêsôm gebe “Tamoc to ŋoc lasitêwai ma nêŋ domba to bulimakao ma nêŋ gêŋ samob sêmêŋ aŋga gamêŋ Kanaan jasêŋgôŋ gamêŋ Gosen.” 2 Eŋ kêkôc têwai lemeŋ teŋ sêwiŋ eŋ ma kêtôc êsêac gêdêŋ Parao. 3 Parao kêsôm gêdêŋ eŋ têwai gebe “Amac ajam kôm amboac ondoc.” Ma êsêac sêsôm gêdêŋ Parao gebe “Nêm sakiŋwaga aêac ajop dombageŋ atôm tamemai.” 4 Go êsêac sêsôm gêdêŋ Parao gebe “Aêac amêŋ gebe amoa gamêŋ tonec amboac lau jaba gebe nêm sakiŋwaga aêac ma gamêŋ alôm ma dombaŋa teŋ gêc gamêŋ Kanaan atom gebe tôbôm gêjam gamêŋ auc samucgeŋ. Tec aêac ateŋ aôm gebe ôlôc gebe nêm sakiŋwaga aêac aŋgôŋ gamêŋ Gosenmaŋ.” 5 Go Parao kêsôm gêdêŋ Josep gebe “Tamam to nêm lasitêwai dêdêŋ aôm sêwac. 6 Gamêŋ Aiguptuŋa kêtu aômnêm gêŋ. Ôjaliŋ gamêŋ ŋajamanô teŋ sa ma ôkêŋ êndêŋ tamam to nêm lasitêwai sêŋgôŋ. Ôkêŋ êsêac sêŋgôŋ gamêŋ Gosenmaŋ. Ma aôm embe ôlic lau tokauc aŋga êsêacnêŋ, go ôkêŋ êsêac sejop ŋoc bulimakao sêwiŋ.”

7 Josep gêwê tama jakêtôc gêdêŋ Parao ma Jakob gêjam mec Parao. 8 Ma Parao kêtu kênac Jakob gebe “Aômnêm jala tendocgeŋ.” 9 Jakob gêjô Parao awa gebe “Jala, taŋ gamoa nom amboac ŋac jaba teŋ naŋ 130. Jala, taŋ gamoa nom ŋatêm tau dambê to ŋawapac ma taêsam kêtôm tamocinêŋ jala sêmoa nom amboac lau jabaŋa naŋ atom.” 10 Ma Jakob gêjam mec Parao ma gêwi eŋ siŋ kêsa gêja.

11 Go Josep kêkêŋ gamêŋ gêdêŋ tama to nê lasitêwai gebe sêŋgôŋŋa ma kêkêŋ nom gêdêŋ êsêac kêtu êsêacnêŋ gêŋ aŋga gamêŋ Aiguptuŋa, kêkêŋ nom ŋajamanô tau gêdêŋ êsêac aŋga gamêŋ Rameses kêtôm Parao kêjatu. 12 Ma Josep gêlôm tama to nê lasitêwai ma tamanê lau samob kêtôm êsêacnêŋ gôlôacnêŋ nambageŋ.

13 Mo teŋ gêc gamêŋ samuc tonaŋ atom, gebe tôbôm kapôêŋ sec e mo gêjô lau gamêŋ Aiguptu to Kanaanŋa êndu. 14 Ma Josep kejoŋ awa, taŋ gêc gamêŋ Aiguptu to Kanaanŋa naŋ, samob sa gêjô polom, taŋ lau sêjam ôli naŋ. Ma Josep kêkêŋ ŋaawa kêsô Paraonê andu.

15 Ma gêdêŋ taŋ awa samob gêbacnê aŋga gamêŋ Aiguptu to gamêŋ Kanaan naŋ, lau Aiguptu samob dêdêŋ Josep sêja ma sêsôm gebe “Ôkêŋ mo êndêŋ aêac. Aêac amac êndu anêc aôm laŋômnêmŋa êtu ageŋŋa, gebe ma awa gêbacnê.” 16 Ma Josep kêsôm gebe “Amacnêm awa embe êmbacnê, go akêŋ nêm bôc ma aê gabe jakêŋ mo êndêŋ amac êjô nêm bôc.” 17 Tec êsêac sêkêŋ nêŋ bôc gêdêŋ Josep ma eŋ kêkêŋ mo gêjô hos to bulimakao ma domba to doŋki. Tec gêdêŋ jala tonaŋ eŋ gêlôm êsêac ŋa mo gêjô nêŋ bôc samob.

18 Jala tonaŋ gêbacnê, tec gêdêŋ jala kêtu luagêcŋa êsêac sêmu dêdêŋ eŋ jasêsôm gêdêŋ eŋ gebe “Aêac asiŋ biŋ tonec ôkwi êndêŋ ma ŋatau atôm atom gebe awa gêbacnê ma bôc ŋatoŋ kêtu ma ŋataunê gêŋ sugac. Amboac tonaŋ ma gêŋ akêŋ êndêŋ ma ŋatauŋa teŋ gêc atom, aêac ôliŋ to ma nom tageŋ. 19 Aêac to ma nom anaŋa anêc aôm laŋômnêmŋa êtu ageŋŋa. Ônam ôli aêac to ma nom ma ôkêŋ mo êjô, go aêac to ma nom anam sakiŋ êndêŋ Parao. Ôkêŋ polom ŋawê êndêŋ aêac gebe aŋgôŋ mateŋ jali ma amac êndu atom ma aêacma nom êtu gasaŋ atom.”

20 Amboac tonaŋ Josep gêjam ôli nom samob aŋga Aiguptu kêtu Paraonê gêŋ, gebe lau Aiguptuŋa samob sêkêŋ nêŋ nom gêdêŋ eŋ gêjam ôli gebe tôbôm kapôêŋ sec gêc, tec nom tau kêtu Paraonê gêŋ. 21 Mago lau tau tec kêkêŋ êsêac têtu gêŋôma aŋga Aiguptu ŋamadiŋ ŋamakeŋ e gêdêŋ ŋamakeŋ. 22 Dabuŋwaga tauŋgeŋ nêŋ nom tec gêjam ôli atom, gebe dabuŋwaga têtap nêŋ ŋaôli sa aŋga Paraonê, tec ŋaôli tau, taŋ Parao kêkêŋ gêdêŋ êsêac naŋ, gêlôm êsêac. Kêtu tonaŋŋa êsêac sêkêŋ nêŋ nom gêdêŋ eŋ gêjam ôli atom.

23 Ma Josep kêsôm gêdêŋ lau gebe “Amboac tonaŋ, ocsalô tonec aê gajam ôli amac to nêm nom atu Paraonê gêŋgac. Galoc akôc polom ŋawê tonec ma asê êsêp kômmaŋ. 24 Mago kôm ŋanô tau awa êkôc êna toŋ lemeŋ teŋ ma akêŋ toŋ teŋ êndêŋ Parao. Toŋ aclê êtu amacnêm gebe asê êsêp kôm wakuc ma aniŋ êtu amac to nêm gôlôac ma nêm ŋasec-ŋasec nêm mo.” 25 Êsêac sêsôm gebe “Aôm gôjam aêac sa aŋgôŋ mateŋ jali. Ma ŋatau, embe ôlic aêac ŋajam, go anam sakiŋ Parao anêc ŋawaegeŋ.” 26 Tec Josep kêkêŋ biŋ tonaŋ kêtu ŋagôliŋ teŋ gêc e mêŋgêdêŋ galoc gêjam gôliŋ lau Aiguptuŋa nêŋ nom gebe sêwa kôm ŋanô êkôc êna toŋ lemeŋ teŋ ma sêkêŋ ŋateŋ êndêŋ Parao. Dabuŋwaga tauŋgeŋ nêŋ nom kêtu Paraonê gêŋ atom.

27 Amboac tonaŋ Israel sêŋgôŋ gamêŋ Aiguptu ŋagamêŋ Gosen. Ac sêŋgôŋ têtu têlê ma sêka gôlôac lasê e têtu taêsam ŋanô lasê. 28 Ma Jakob gêŋgôŋ gamêŋ Aiguptu jala 17 e ênê jala kêtu 147. 29 Israelnê noc êmac ênduŋa kêdabiŋ naŋ eŋ kêkalem latu Josep ma kêsôm gêdêŋ eŋ gebe “Aôm embe ôlic aê ŋajam, go ôkêŋ lêmam êsô lambic ma ôsôm êtu tôŋ gebe ômansaŋ aê ŋapep ma totêmtac êwiŋgeŋ gebe ônsuŋ aê aŋga Aiguptu atom. 30 Mago ôkêŋ aê janêc jawiŋ tamoci. Ômbalaŋ aê aŋga Aiguptu naônsuŋ aê aŋga nêŋ sêô.” Eŋ gêjô eŋ awa gebe “Aê gabe jaŋgôm êtôm biŋ, taŋ kôsôm naŋgeŋ.” 31 Ma Israel kêsôm gebe “Ôtôc lêmam.” Ma Josep kêtôc lêma. Go Israel gewec gêdêŋ nê mê ŋagêdô môkêapacŋa.