44
Apômtau taugeŋ eŋ Anôtô
1 “O ŋoc sakiŋwaga Jakob, o Israel, taŋ kajaliŋ sa naŋ,
galoc ôkêŋ taŋam.
2 Apômtau taŋ kêkêŋ aôm
to kêmasaŋ aôm aŋga tênam têtaclêlôm ma oc ênam aôm kêsi naŋ,
kêsôm biŋ tonec gebe
O ŋoc sakiŋwaga Jakob, o Israel,
taŋ kajaliŋ aôm sa naŋ, ôtêc taôm atom.
3 Gebe aê oc jakêc bu êsêp gamêŋ ŋakeleŋ
ma bu oc êpoac nom gelo-gelo.
Aê oc jakêc ŋoc Ŋalau êpi nêm wakuc
ma jakêc ŋoc mec êpi nêm gôlôac.
4 Ma êsêac oc sêlêc amboac gêgwaŋ aŋga gamêŋ ŋawambuc ŋajam
ma sêpi amboac ka, taŋ kêkô bulêndaŋ naŋ.
5 Ŋac teŋ oc êsôm gebe ‘Apômtaunê ŋac aê.’
Ma teŋ oc êsam tau ŋa Jakobnê ŋaê.
Ma teŋ oc eto êpi lêma gebe ‘Apômtaunê gêŋ,’
ma ê tau êpi Israel.”
6 Apômtau, Israelnêŋ kiŋ to kêsiwaga
ma lausiŋ undambêŋa nêŋ Apômtau kêsôm biŋ tonec gebe
“Aê ŋac ŋamata to ŋamu, anôtô teŋ gêmoa gêwiŋ aê atomanô.
7 Asa kêtôm aê. Êsa mêŋêwa sa,
êkêŋ tau êkô aê laŋôcnêm ma êwa tau sa.
Ŋac andaŋgeŋŋa asa geoc biŋ, taŋ ocgo mêŋêsa naŋ, lasê kwanaŋgeŋ.
Eŋ eoc gêŋ, taŋ ocgo mêŋêsa êtu ŋamu naŋ, lasê êwiŋmaŋ.
8 Atêc taôm atom ma aê go taôm atom.
Aê gajac miŋ to gawa biŋ tau sa gêdêŋ amac gêdêŋ andaŋgeŋŋa atom me.
Amac atu ŋoc lau-apuc-ŋoc-biŋ-tôŋwaga.
Anôtô teŋ gêmoa gêwiŋ aê me masi.
Lamu ŋanô teŋ gêmoa atom. Aê kajala teŋ atom.”
Sakiŋ gwamŋa tonec gêŋ meloc
9 Lau-sêsap-gwamwaga êsêac gêŋ ŋaôma ma nêŋ kôm ŋanô, taŋ tetoc sa naŋ, ŋanô masi. Ma lau, taŋ sêsap êsêac tôŋ naŋ, sêlic to sêjala gêŋ teŋ atom, tec oc sêmoa tomajeŋgeŋ. 10 Asa kêsap gwam ma kêmasaŋ ŋakatu ŋaôma ma ŋanô masi. 11 Alic acgom, ŋac tau nê sakiŋwaga oc majeŋ êsa, ma lau lemeŋ-mêtêwaga tau ŋamalac ŋaôma. Êsêac samob sêkac tauŋ sa nasêkô acgom, go têtakê ŋanô ma sêŋgôm êsêac samob majeŋ êsa.
12 Ŋac-kêpac-kiwaga kêkêŋ ki kêsa ja e ŋalana kêsa. Eŋ kêsac ŋa hama gebe êkêŋ gwam ŋalaŋô. Eŋ gêjam kôm tolêma ŋajaŋa sec e mo gêjô eŋ ma têkwa gêbac. Eŋ gêjam dabuŋ bu, tec ôliwalô gêbacnê.
13 Kamunda teŋ gê dôŋ nê ka ma keto ŋakatu ŋa kêlêpê. Go kêsap ŋa ki kêdaguc ŋadôŋ tau ma kêwaka ŋamalac ŋakatu sa e kêtôm ŋamalac laŋô, gebe kêkô andu teŋ. 14 Ŋac tau kêsap kaseda me kêjaliŋ kaleloŋ me kamem teŋ sa aŋga saleŋ me moae kêsê kaseda teŋ ma kom gêlôm ka tau e kêtu kapôêŋ. 15 Go ka tau êtu ŋac teŋ nê kamasê, eŋ êkôc ŋagêdô ma ênsêlu ma ŋagêdô gebe eno nê gêŋ. Mago ka ŋagêdô tec eŋ kêsap kêtu anôtô jaba ma gêjam sakiŋ gêŋ tau, ma kêmasaŋ gwam ma kêpôŋ aduc gêdêŋ gêŋ tau. 16 Ka ŋamakeŋ tec eŋ kêkêŋ ja geŋ ma kêpac gwada ma geŋ bôc e gêôc eŋ tôŋ, ma eŋ kêsêlu ja gêwiŋ ma kêsôm gebe “Kec, galoc kasêlu jagac.” 17 Ma ka tau ŋamakeŋ eŋ kêsap kêtu nê anôtô gwam ma kêpôŋ aduc to gêjam sakiŋ ma keteŋ mec gêdêŋ gêŋ tau gebe “Ônam aêac kêsi gebe ŋoc anôtô aôm.”
18 Lau tau tonaŋ sêjala gêŋ teŋ atom ma nêŋ kauc masi gebe nêŋ mateŋanô gêmôb e sêlic gêŋ teŋ atom ma nêŋ ŋalêlôm ŋadani e sêjala gêŋ teŋ atom. 19 Êsêac taêŋ gêjam biŋ teŋ atomanô ma nêŋ kauc to jala gebe sêsôm biŋ amboac tonecŋa masi gebe “Ka tau ŋamakeŋ aê kakêŋ kêsa ja ma gano ŋoc gêŋ to kapac gwada e gêôc aê tôŋ ma ka tau ŋamakeŋ aê oc jasap êtu gêŋ alôb-alôb teŋ me. Aê oc japôŋ ocduc êndêŋ ka ŋadambê teŋ me.” 20 Ŋac taŋ mata katu gêŋ ŋaôma-ŋaôma naŋ, nê ŋalêlôm dansaŋ gêjam gôliŋ eŋ keso ma eŋ kêtôm gebe ênam tau kêsi atom. Eŋ kêtôm atom gebe êsôm biŋ tonec gebe “Gêŋ taŋ lemoc anôŋa gêgôm naŋ gêŋdansaŋ.”
Apômtau eŋ Israelnêŋ kêsiwaga
21 “O Jakob ma Israel, taêm ênam biŋ tonaŋ,
gebe ŋoc sakiŋwaga aôm.
Aê kamasaŋ aôm kôtu ŋoc sakiŋwaga.
O Israel, aê oc jaliŋ aôm siŋ atom.
22 Aê gaseŋ nêm keso su amboac mu kêdaba tao
ma nêm sec gê su amboac ômbiŋ.
Ômu ôndêŋ aê ômôêŋ gebe aê gajam aôm kêsi.”
23 O undambêac, anam wê gebe Apômtau gêgôm gêŋ tau ŋanô kêsa.
O nom ŋalêlômac, anam lasê.
O lôcac, o saleŋac to ŋaka samob, apuc wê sa
gebe Apômtau gêjam Jakob kêsi
ma geoc nê ŋawasi lasê aŋga Israel.
24 Apômtau, nêm kêsiwaga, taŋ kêmasaŋ aôm aŋga tênam têtaclêlôm naŋ, kêsôm biŋ tonec gebe
“Aê Apômtau, taŋ kakêŋ gêŋ samob naŋ.
Aê taucgeŋ galam umboŋ ma gaja nom.
Asa gêmoa gêwiŋ aê.
25 Aê gaseŋ laudansaŋ nêŋ puc gebe ŋanô êsa atom
ma gagôm lau-seoc-biŋ-lasêwaga têtu meloc
ma kakêŋ lau tokauc sênu tauŋ su sêja
ma nêŋ kauc kêtu meloc.
26 Aê kapuc ŋoc sakiŋwaganêŋ biŋ tôŋ
ma gagôm ŋoc jaeŋwaganêŋ biŋ ŋanô kêsa.
Aê kasôm kêpi Jerusalem gebe ‘Lau oc sêŋgôŋ tonec,’
ma kêpi malac Judaŋa gebe ‘Lau oc sêkwê malac tonec sa
ma aê oc jajac malac ŋapopoc sa êtiam.’
27 Aê kasôm gêdêŋ gwêc ŋagêdim gebe ‘Ôtu keleŋ,
ma aê oc jaŋgôm nêm bu êpa.’
28 Aê kasôm kêpi kiŋ Kores gebe ‘Ŋoc ŋacgejob dombaŋa eŋ
ma eŋ oc êŋgôm ŋoc biŋ ŋanô êsa.’
Aê kasôm kêpi Jerusalem gebe ‘Lau sêkwê malac tonec sa êtiammaŋ,’
ma kêpi lôm dabuŋ gebe ‘Lau sênac m kôm sêkwê aôm saŋa.’ ”