4
Sadaŋ kêlêtôm Jesu
(Mar 1:12-13; Luk 4:1-13)
1 Gêdêŋ tonaŋ Ŋalau Dabuŋ gêwê Jesu kêsa gamêŋ sawa gêja gebe Sadaŋ êlêtôm eŋ. 2 Ma Jesu gêjam dabuŋ mo geleŋŋa 40 ma gêbêcauc 40 e mo gêjô eŋ. 3 Go Sadaŋ jakêsôm gêdêŋ eŋ gebe “Aôm embe Anôtônê latu, go ôsôm poc tonec ŋai êtu mo.” 4 Ma Jesu gêjô eŋ awa gebe “Teto gêc gebe
‘Mo tageŋ êôc ŋamalac tôŋ atom, biŋ samob, taŋ kêsa Anôtô awa naŋ, tec gêôc eŋ tôŋ.’ ”
5 Go Sadaŋ kêkôc eŋ agêc sêpi malac dabuŋ sêja jaketoc eŋ kêkô lôm dabuŋ ŋasalôm ŋalami, 6 ma kêsôm gêdêŋ eŋ gebe “Aôm embe Anôtônê Latu, go u taôm ôna gebe teto gêc gebe
‘Eŋ oc êsakiŋ nê aŋela êtu aômŋa mêŋêsip aôm ŋa lemeŋ,
gebe ôndiŋ amkaiŋ êpi poc atom.’ ” 7 Tec Jesu gêjô eŋ awa gebe “Teto teŋ kêtiam gêwiŋ gebe
‘Ônsaê Apômtau aômnêm Anôtô atom.’ ” 8 Go Sadaŋ kêkôc eŋ agêc sêpi lôc baliŋ teŋ sêja jakêtôc gamêŋ nomŋa samob toŋawasi gêdêŋ eŋ 9 ma Kêsôm gebe “Aôm embe ôpôŋ amduc to oteŋ mec êndêŋ aê, oc jaliŋ gêŋ tonec ŋai samob su êndêŋ aôm êwac.” 10 Go Jesu kêsôm gêdêŋ eŋ gebe “Sadaŋ, ôkôc taôm sa ôêc ôna gebe teto gêc gebe
‘Ôpôŋ amduc êndêŋ Apômtau, aômnêm Anôtô,
to ônam sakiŋ eŋ taugeŋ.’ ” 11 Go Sadaŋ gêwi eŋ siŋ, ma aŋela mêŋsêjam sakiŋ gêdêŋ eŋ.
Jesu gêja Galilaia ma gêjac m nê kôm mêtêŋa
(Mar 1:14-15; Luk 4:14-15)
12 Jesu gêŋô sêkôc Joaŋ tôŋ ŋawae su ma kêtaiŋ tau su gêja Galilaia. 13 Go gêwi Nasaret siŋ jagêŋgôŋ Kapanaum, taŋ gêc gamêŋ Sebulon to Naptali jabaŋ bugêjactoŋŋa, 14 gebe biŋ, taŋ propete Jesaia kêsôm naŋ, êtu anô gebe
15 “Gamêŋ Sebulon to gamêŋ Naptali,
taŋ gêc kêkanôŋ bugêjactoŋ aŋga Jordan ŋamakeŋ ônêŋa naŋ,
lau samuc nêŋ Galilaia.
16 Lau taŋ sêŋgôŋ gêsuŋbôm naŋ, sêlic ja kapôêŋ teŋgoc,
ma êsêac, taŋ sêŋgôŋ gêmac ŋagamêŋ ŋakesec naŋ, nêŋ ja mêŋkêpigac.”
17 Gêdêŋ tonaŋ Jesu gêjam mêtê gêjac m gebe “Anam taôm ôkwi gebe gamêŋ undambêŋa kêdabiŋgac.”
Jesu kêkalem lau iŋa aclê
(Mar 1:16-20; Luk 5:1-11)
18 Jesu kêsêlêŋ gêmoa bugêjactoŋ Galilaiaŋa e gêlic ŋaclagêc lasi, Simon, taŋ sêsam eŋ gebe Petere naŋ, agêc lasi Andrea sêkêŋ wasaŋ sêmoa, gebe êsêagêc ŋac ulu iŋa. 19 Tec kêsôm gêdêŋ êsêagêc gebe “Andaŋguc aê ma oc jakêŋ amagêc alô ŋamalac.” 20 Tec gacgeŋ dedec nêŋ wasaŋ gêc ma têdaguc eŋ.
21 Gêwi gamêŋ tau siŋ ma kêsêlêŋ gêja e gêlic ŋac teŋ agêc lasi kêtiam, Sebedai latuagêc Jakobo agêc lasi Joaŋ, sêŋgôŋ waŋ sêwiŋ tameŋi Sebedai tau sêbênôc nêŋ wasaŋ sêmoa, go gêmôêc êsêagêc. 22 Tec gacgeŋ dedec waŋ totameŋigeŋ kêpoac ma têdaguc eŋ sêja.
Jesu gêjam sakiŋ lau
(Luk 6:17-19)
23 Go Jesu kêsêlêŋ gêjac laoc Galilaia ŋagamêŋ samob ma kêdôŋ êsêac aŋga nêŋ lôm to gêjam mêtê kapi ŋawae ŋajam Anôtônê gamêaŋŋa ma gêgôm launêŋ gêmac to ôliŋ ŋasec tokaiŋtokaiŋ ŋajam kêsa. 24 Ma ênê wae kêsa gêjam gamêŋ Suriaŋa samob auc, tec sejoŋ lau ŋasec samob dêdêŋ eŋ sêja, lau togêmac tokaiŋ-tokaiŋ ma toŋandaŋ ŋagêdô ma lau, taŋ ŋalau sec gêgôm êsêac to meloc kêtê êsêac ma ŋatêkwa kêtu goloŋ naŋ, ma gêgôm êsêac ôliŋ ŋajam kêsa samob. 25 Ma lau taêsam aŋga Galilaia to Malaclemeŋlu ma aŋga Jerusalem to Judaia ma Jordan ŋamakeŋ ônêŋa têdaguc eŋ.