68
Anôtô kêku nê ŋacjo lulu ŋawê lambiŋŋa
1 Anôtô êndi êkô gebe enseŋ nê ŋacjo êliŋ-êliŋ
ma êsêac, taŋ nêŋ ŋalêlôm kêmoatiŋ tôŋ kêtu eŋŋa naŋ, sêc su aŋga ênê laŋônêmŋa.
2 Anôtônê laŋôanô enseŋ lau, taŋ sêkac tauŋ su aŋga ênê naŋ,
êtôm mu kêdaba jadauŋ to ja kêpac lêp gêwê.
3 Ma lau gêdêŋ têntac ŋajamgeŋ to têtu samuc sêkô Anôtô laŋônêm
ma ôliŋ êpi toôndugeŋ.
4 Anam wê êpi Anôtô. Awem êôc ênê ŋaê. Anam ŋac, taŋ kêsa gamêŋ sawa naŋ, nê intêna.
Ŋac tau nê ŋaê gebe Apômtau. Akô eŋ laŋônêmŋa ma anam lasê toôndugeŋ.
5 Anôtô taŋ gêmoa nê andu dabuŋ naŋ,
kêtu mosêbunêŋ tameŋi to awêtucnêŋ gêjam-sawaga.
6 Anôtô gêjam lau sawa sa gebe têtap gôlôac sa ma kêgaboac lau kapoacwalôŋa su jasêmoa nêŋ tauŋŋa.
Ma kêmasê gêsuŋtêkwa ŋatoŋwaga sa e nêŋ gamêŋ, taŋ sêŋgôŋ naŋ, kêtu keleŋ laŋgwageŋ.
7 O Anôtô, gêdêŋ taŋ gôdi gôwê lau sa ma kôtu êsêacnêŋ ŋamata
to gêdêŋ taŋ amkaiŋ kôka gamêŋ sawa tôŋ naŋ,
8 nom kêtênêp to umboŋ kêsêwa kom
kêtu Anôtônê laŋôanô kêtu awêŋa.
Lôc Sinai kêtênêp kêtu Anôtô gêô lasê lôc tauŋa.
Israelnêŋ Anôtô gêô lasêgac.
9 O Anôtô, aôm kôkêŋ kom gêjac kêsêwageŋ
ma kôlau nêm nomlênsêm, taŋ gelo-gelo naŋ.
10 Aômnêm gôlôac têtap nêŋ gamêŋ sêŋgôŋŋa sa.
O Anôtô, nêm moasiŋ kêmasaŋ gamêŋ tau kêtu lau ŋalêlôm sawaŋa.
11 Apômtau kêjatu sa
ma lauo taêsam ŋasec sêjam wêsiŋ e ŋawae kêtu tapa.
12 “Lausiŋ totoŋ-totoŋ to nêŋ kiŋ sêc, sêcgoc”
ma lauo sêjac sam ŋawaba gêdêŋ tauŋ.
13 Talic êsêac amboac balôsi ŋaôsic-ôsic amboac silber ma ŋawaô joŋsamuc ma ŋaôsic-ôsic amboac gold.
Amacnêm lauo ŋagêdô sêmoa domba nêŋ sapa ŋalêlôm kêtu ageŋŋa.
14 Gêdêŋ taŋ ŋajaŋa ŋatau Anôtô kêpa kiŋ êliŋ-êliŋ naŋ,
eŋ kêkêŋ sno gêjac aŋga lôc Salmon.
15 Aôm lôc Basanŋa kôtu lôc towae.
Aôm lôc Basanŋa ŋatêpôê jabo-jabogoc.
16 Amac lôc ŋagêdô, taŋ jabo-jabo naŋ, asageŋ têmtac ŋandaŋ gêdêŋ lôc, taŋ Anôtô gebe êŋgôŋ êtu nê gamêŋ naŋ.
Biŋŋanô, Apômtau oc êŋgôŋ tônê endeŋ tôŋgeŋ.
17 Anôtô gêmêŋ aŋga Sion ŋa nê kareta siŋŋa taêsam ŋalêlêma atom.
Apômtau gêmêŋ aŋga Sinai mêŋgêô lasê nê gamêŋ dabuŋ.
18 Aôm kôpi lôlôc jagôwê lau kapoacwalôŋa sêwiŋ aôm. Ŋamalac sêsuŋ nêŋ gêŋ gêdêŋ aôm gêwac.
Gêsuŋtêkwa ŋatoŋ oc sêŋgôŋ sêwiŋ Apômtau Anôtô amboac tonaŋ.
19 Aweŋ êôc Apômtau, eŋ kêsip aêac sa bêc to bêc.
Eŋ Anôtô, taŋ gêjam aêac sa naŋ.
20 Anôtô tonaŋ tec kêtu aêacnêŋ Anôtô, taŋ gêjam aêac kêsi naŋ,
ma Apômtau Anôtô eŋ ŋatau, tec oc ênam tasa paŋ lêndaŋ ôkwi.
21 Biŋŋanô, Anôtô oc elo nê ŋacjo môkêŋapac popoc,
oc ênac ŋac, taŋ kêsêlêŋ tonê secgeŋ naŋ, môkêdaŋgam popoc amboac tonaŋ.
22 Apômtau kêsôm kêtu tôŋ gebe “Aê oc jajoŋ êsêac aŋga Basan sêmu sêmêŋ.
Biŋŋanô, oc jajoŋ êsêac aŋga gwêc ŋagêdimbob sa sêmu sêmêŋ.
23 Gebe ôkwasiŋ amkaiŋ êsêp nêŋ declêlôm.
Nêm kêam imbeleŋ têtap nêŋ gwada aŋga ŋacjonêŋ sa.”
24 O Anôtô, lau sêlic nêm gôlôac ŋawalaŋ baliŋ.
Sêlic ŋoc kiŋ Anôtônê walaŋ baliŋ omŋa sêmoa gamêŋ dabuŋ.
25 Lau sênam wê ŋa aweŋwaga têtu ŋamata, go lau, taŋ sêjac gêŋ wêŋa kêtaŋ naŋ, têtu ŋamu
ma lauo takiŋ sêmoa ŋasawa togegobgeŋ.
26 Awem êôc Apômtau Anôtô aŋga gôlôacnêŋ sêkac sa ŋalêlôm.
Amac taŋ Israel kêtu nêm ŋamôkê naŋ, awem êôc Apômtau.
27 Lau Benjaminŋa toŋ sauŋ ec teŋ sêwê sêmoa ônê, lau Judanêŋ kasêga toŋ kapôêŋ teŋ kêdaguc,
go kasêga Sebulonŋa to kasêga Naptaliŋa amboac tonaŋgeŋ têtu ŋamu.
28 O Anôtô, ôŋgôm nêm lai êpoa.
O Anôtô, ondeŋ gêŋ, taŋ gôjam aêac saŋa naŋ tôŋ.
29 Kiŋ oc sejoŋ awa sa dêndêŋ aôm sêna Jerusalem
êtu nêm lôm dabuŋŋa.
30 Ôlêŋ biŋ bôcbôm Aiguptuŋa, taŋ sêmoa bumaŋ ŋasiŋlêlôm naŋ.
Ôlêŋ biŋ tenteŋlatui, taŋ têtôm bulimakao kapoac to ŋalatu naŋ,
e samob sêmbu tauŋ ma sêkêŋ silber êndêŋ aôm.
Onseŋ lau, taŋ têntac gêwiŋ siŋ naŋ, êliŋ-êliŋ.
31 Kasêga aŋga Aiguptu sêmêŋ.
Lau Aitiopiaŋa sêlêti ma sêmêtôc lemeŋ gêdêŋ Anôtô.
32 Amac kiŋ nomŋa anam wê êpi Anôtô.
Awem êôc Apômtau,
33 taŋ gêmuŋ andaŋgeŋanô gêmoa nê undambê lôlôcŋa naŋ.
Aŋô eŋ gêôc awa sa ma gêmôêc ŋa awa kapôêŋ.
34 Aoc Anôtô ŋaclai lasê. Eŋ gêjam gôliŋ Israel toŋawasigeŋ
ma nê ŋaclai gêc tao ŋalêlôm.
35 Anôtô ŋaclai kaiŋ teŋ kêsa aŋga nê gamêŋ dabuŋ gêmêŋ.
Eŋ Israelnêŋ Anôtô. Eŋ kêkêŋ ôliŋ walô gêdêŋ nê lau.
Lambiŋ êndêŋ Anôtô.