1-2 Jirye jerye vichanu̱yada diibyimiy Ju̱denu diya jiryejyuuchuvediva. Jiryevyichanu̱yada variy juuchatavay jiryatiy jiryechiityari̱nu̱yadara va̱cha vicha̱da ti̱ta̱ju̱ daryaju̱. Jiryevyichanu̱yada variy bayantu nutyityu̱mu tuva̱chuvay, bayantu rapu̱y ni̱tiy vanu̱tya̱da riy rityimyu̱ ne tuva̱churu̱y simu Vu̱jye̱ Ju̱denu. 3 Ti̱ta̱ju̱ nu̱jerye vichanu̱yada ta̱riy ramuntiy. Nu̱dyivaañu̱yadara daryatiy nu̱dyivaaryu̱y, nu̱vyu̱ va̱tara jarye, nu̱jechiy va̱ta̱damu jaryentiy. Ramuni̱day nu̱vyichanu̱yada variy paruti̱savay Ju̱denu jtedamuju̱, nu̱tyu tavay nijya̱nvatyi ti̱ta̱ju̱ darya. 4-5 Ju̱denu ji̱ta ni̱tiy jaryi jantyutyara, jiryatiy sava̱ta̱da jaryi jivya̱ta̱damu vu̱y, dañuma vu̱ñi̱chanu̱yada diibyimiy vu̱jyuuchuvediva, Crístu jsa̱ju̱ sasa̱yada ja̱muca̱ jnu̱yadaju̱ varivyu̱y. Sani̱ru̱yadamu jirye̱yada variy vuryeyadaju̱. 6-7 Sami̱sadeda Ju̱denu Jesucrístu jsa̱ju̱ vu̱y, sama̱sadeda jarichumu sisa̱ju̱ varintyivyu̱y, sa̱tidye dityanujaya̱sara ju̱na̱re sa̱ra̱ju̱ra jaryi yentyutya̱da, jiryatiy jaryi samirya jachityi̱ savichasara daryaju̱ vu̱ñijyu̱ Jesucrístumusiy. 8 Vinu sa̱ntyutya̱damusiy vu̱ryamitya mityara vu̱jyuuchuveda murichirya, jiryatiy vu̱tyuva̱choda simu. Vu̱tyuva̱choda ji̱tantiy ne vu̱dyirya tuva̱choda darya; Ju̱denumusiñuma rani̱cha ti̱ta̱ju̱ day. 9 Ne vu̱cya̱na̱y vuryivaayadatara, vu̱ñuma jchana̱tya ranchivyu̱y. 10 Vu̱vyichasara daryaju̱ su̱ndebimiy jiryatiy su̱ndejada Jesucrístumu vu̱y, vurya̱tidye vichasara samiy jvaavye, darya sabayada ji̱tyaju̱ vurya̱vichajaya̱sara daryá samirya sadiya.

11 Ramuni̱ jirya̱jachipityara nu̱tyu jiryevyichanu̱yada munu̱ñumiy Judíyuveda diya. Jiryatiy ru̱tachara jmutyonusarara jivyu̱ Ju̱denunijyu̱, ru̱nu̱y ji̱ta jiryeñe̱cho̱ nu̱tyu Ju̱denu rrachúvay, jiryatimyu̱ ne jmutyonusavay daryaju̱ jiryedye. 12 Variryundamu jiryevyichanu̱yada tajiñe̱cho̱ju̱ Crístujisiy. Ne jiryevyichanu̱yada variy Ju̱denu siityari̱vay tevamyi, dantyamu̱y ne jiryedyetya̱da didyerya Ju̱denu jteda jiryeyada ra̱yadaju̱ didye. Jiryevyichanu̱yada mitya, ne jiryentuñu̱yada sa̱jiju̱ Ju̱denu jirya vuryi̱nu̱yada rundamu. 13 Diye ji̱ta Jesucrístu batyeda nudaja̱musiy, satuudityaniy Ju̱denu variy jirye, ripya daryaju̱ jiryevyichanu̱yada sa̱jisidye.

14-15 Sani̱cha ji̱ta Jesucrístu samirya vu̱vyicha̱daju̱ day, varidye santye̱ryadedara davicha̱daju̱y tavicha̱daquiju̱ntiy, daryamusiy sapu̱yadara riñique̱yada jijechivyasiy, ramuni̱day rivyichanu̱yada ripya sa̱jisiy. Sito̱tadeda Jesucrístura Ju̱denu jteda juuchuveda jiyadaju̱ jivyu̱mu, sabatyedamusiy. Su̱teda Ju̱denu daryaju̱ rajuura niquejadamusiy, nu̱tyuramusiy vurya̱vichasara samiy, nu̱tyuramusiy. Sabatyedamusiy ji̱ta yindejada Jesucrístu ni̱ ti̱qui nijya̱mi̱ yimu, jiryatiy sabayadara vurya̱tidye vichajaya̱sara samirya mityiji. 16 Crusitya̱sa batyedata saratyadoda mityijijyu̱ryi davicha̱daju̱y ja̱nvay Ju̱denu diya, rirya̱tidye vichasara ti̱ta̱ju̱ nu̱tyu tevajyuu nta variy. Rata ji̱ta rabaryi̱jada rimyityasiiyadayu. 17 Daryamusiy ji̱ta su̱deda Crístu samirya tu̱choda na̱cho̱, jirya̱tidye tuva̱chu rana̱cho̱ samitu̱choda, samiy vicha̱da jarye, jiryatiy jiryevyichasara ripya daryaju̱ sa̱jisiy. Daryaday satu̱chu ruuva Judíyuvedantiy dañumamu̱y ne riñi̱cha ripya vichavay. 18 Crístumusiy ji̱ta vuryito̱ ti̱ta̱ju̱, dañumamu̱y ne Judíyuveda vu̱ñi̱cha, varimyata si̱tenu Judíyuveda davyu̱y, vuryi̱niy ti̱ta̱ju̱ Vu̱jye̱ Ju̱denumuju̱ vinu ti̱qui si̱tenu Su̱ntumusiy. 19 Ramuni̱mu̱y ne jiryeñi̱cha munu̱ñumiñu̱day, dantyamu̱y ne raruva̱ ja̱nvay. Jiryeñi̱cha ji̱ta Ju̱denu jiintyasavay tevamyidye, Ju̱denu rorijya̱nvay tevamyi jarye risa̱ju̱ ti̱ta̱ju̱. 20 Saroriiy Ju̱denu jiryetya rincha yinsu̱byimiy, saju̱ tu̱chuvabe jarye, nu̱tyu ju̱tuvu̱ nta riñi̱cha variy. Ni̱ni̱ Jesucrístu sani̱cha ravichu̱ nta roriy suru̱tya̱ju̱. 21 Simu ji̱ta jiryentye̱ryaniy nu̱tyu roriche variyu, ra̱sa̱y samiy rorijyu̱ jiryatiy bachara Ju̱denunijyu̱ jachipiya̱joju̱ra. 22 Daryanuma jiryentyidye, nu̱tyunuma taroriqui ti̱ta̱ju̱ jiryevyicha nta variy, samirya vichajo Vu̱jye̱ Ju̱denuju̱, Su̱ntumusintyi.