6
Gbalon Yerusalɛn xili ma
1 Bunyamin bɔnsɔnna muxune, ɛ gi!
Ɛ keli Yerusalɛn yi!
Ɛ xɔtaan fe Tekowa taani!
Ɛ yɛngɛn taxamasenni te Beti-Hakeremi taani!
Bayo, gbalo gbeen fama
sa keli sogeteden kɔmɛnna ma,
halagi magaxuxin na a ra.
2 Siyon taan naxan tofan,
a rayabu,
n na raxɔrima nɛn!
3 Sofa ganla fama a ma nɛn
alo xuruse rabane nun e xuruseene,
e yi e bubune ti a rabilinni,
e birin yi lu e konna kantanɲɛ.
4 E yi a fala, e naxa,
“Ɛ keli, ɛ a yɛngɛ feni tɔn!
Ɛ keli, en na a yɛngɛ yanyin nan na!
Anu, sogen bata godo fɔlɔ.
Ɲinbanna bata a li,
nininne bata siga fɔlɔ iki.
5 Nanara, ɛ keli,
en na a yɛngɛ kɔɛɛn na.
En sa a banxi faɲine kala.”
6 Alatala Sɛnbɛn Birin Kanna ito nan falaxi,
a naxa, “Ɛ wudine sɛgɛ,
ɛ gbingbinne rate
Yerusalɛn taan makantan yinna xɔn.* Yaxune yi tema taan makantan yinna xuntagi gbingbinni itoe nan xɔn, e taan yɛngɛ.
Taani ito lan a kɛwanle yi saran a ra,
bayo muxu ɲaxankatanxine bata gbo ayi taani.
7 Fe ɲaxine minima taani ito yi
alo igen minima xɔɲinna ra kii naxan yi.
Fala yo mi mɛma a yi
fɔ gbalo feene nun halagi feene.
N na a tɔrɔn nun a furene nan tun toma n yɛtagi.
8 Yerusalɛn kaane,
ɛ a liga ɛ yeren ma,
alogo n nama n masiga ɛ ra,
n yi ɛ konna findi bɔxɔ rabeɲinxin na,
muxe mi nɔɛ dɔxɛ dɛnaxan yi.”
Yamaan naxan mi a tuli matiyɛ
9 Alatala Sɛnbɛn Birin Kanna ito nan falaxi, a naxa,
“E Isirayila yamaan muxu dɔnxɛne tongo ma nɛn
alo manpa bogi tɔnsɔnne na makentun.
Ɛ mɔn xa dangu ndee suxɛ
alo se bogi malanne na xɛtɛ nakɔɔn yirena nde ma.”
10 N falan tima nde xa?
N na ndee rakolonma
alogo e xa e tuli mati n na?
Dɛnkɛlɛyatare tunle nan e ma,
e mi nɔɛ falan mɛ.
Alatalaa falan luxi nɛn e xa
alo konbina,
e mi e rafan fe yo toma a yi.
11 Koni n tan bɔɲɛn bata rafe Alatalaa xɔlɔn na,
n mi fa nɔɛ a ramarɛ.
Ala naxa,
“N ma xɔlɔn xuya diine ma kiraan xɔn,
e nun foningen naxanye malanxi na yi.
Xɛmɛne nun ɲaxanle birin suxuma nɛn e bode xɔn,
e nun fonne nun muxu kɔbɔkɔbɔxine.
12 E banxine yi findi muxu gbɛtɛye gbeene ra,
e nun e xɛɛne nun e ɲaxanle,
n na keli yamanan muxune xili ma waxatin naxan yi.”
Alatalaa falan nan na ra.
13 “Bayo keli muxudin ma
han muxu gbeene,
e birin kunfaxi e tɔnɔn nan xɔn.
Keli nabiin ma han saraxaralina,
e birin wulen falama.
14 E mi n ma yamana furen dandanma e sɔbɛ ra.
E luma a falɛ nɛn, e naxa,
‘Bɔɲɛ xunbenla! Bɔɲɛ xunbenla!’
Koni, bɔɲɛ xunbeli mi na.
15 E yi lanma nɛn e yagi e xɔsi feene ra,
koni, e mi yagima hali!
E mi yagin yɛtɛɛn kolon!
Nanara, naxanye faxama,
e nun ne nan faxama.
N na e kɛwanle saranma e ra nɛn,
e yi bira bɔxɔni.”
Alatalaa falan nan na ra.
16 Alatala ito nan falaxi,
a naxa, “Ɛ ti kirane xɔn,
ɛ yi e mato.
Ɛ maxɔdinna ti lan singe ra kirane fe ma,
ɛ naxa, ‘Kira faɲin minɛn?’
Ɛ yi siga na xɔn.
Ɛ matabuden sɔtɔma nɛn na yi ɛ niin xa.
Koni ɛ yi a fala, ɛ naxa,
‘Nxu mi sigama na kiraan xɔn.’
17 N bata ɛ xun makantan muxune ti,
n naxa, ‘Ɛ tuli mati xɔtaan xuiin na de!’
Koni, ɛ yi n yabi, ɛ naxa,
‘Nxu mi nxu tuli matima!’
18 Nanara, ɛ tan siyaan bonne,
ɛ tuli mati!
Ɛ birin xa a kolon
feen naxan danguma e konni.
19 Dunuɲa muxune, ɛ tuli mati!
N tan nan gbalon nafama yamani ito xili ma,
naxan findixi e miriyane saranna ra.
Bayo e mi e tuli matixi n ma falane ra,
e yi e mɛ n ma sariyan fan na.
20 N hayun mundun wusulanna ma
naxan kelixi Saba yamanani?
Hanma se xiri ɲaxumɛn naxan kelixi yire makuyeni?
Ɛ saraxa gan daxine mi n kɛnɛnxi,
ɛ saraxane mi rafan n ma.”
21 Nanara, Alatala ito nan falaxi, a naxa,
“N gɛmɛne sama nɛn yamani ito yɛɛ ra,
e sanne radinma naxanye ra,
fafane nun e diine,
e nun e dɔxɔ bodene nun e xɔyine,
e birin yi bira halagini.”
Yaxune fama
22 Alatala ito nan falaxi, a naxa,
“Ganla fama nɛn keli sogeteden kɔmɛnna binni.
Yama sɛnbɛmaan fama nɛn
sa keli fɔ bɔxɔn danna ra.
23 Xalimakunle nun tanbane e yii,
e yɛɛ xɔdɔxɔ, e mi kininkinin.
E xuiin gbo alo fɔxɔ igen xuina,
e nɛma fama e soone fari.
E yɛbaxin fama safa yɛɛn ma
yɛngɛ so xinla ma,
e fama ɛ tan Siyon kaane nan xili ma.”
24 Yamaan naxa,
“Nxu bata na feen xibarun mɛ,
nxu sɛnbɛn yi ɲan.
Kuisanna bata nxu suxu,
a xɔlɛn luxi
alo ɲaxanla dii barimatɔna.
25 Ɛ nama mini taani siga burunna ra.
Ɛ nama siga kirane xɔn,
bayo yaxun nun a silanfanna kira yi.
Gaxun yiren birin yi.
26 N ma yamana, ɛ kasa bɛnbɛli dugin so sununi,
ɛ ɛ sa xubeni, ɛ gbelegbele
alo muxuna dii xɛmɛ kedenna na faxa,
bayo naxan muxune birin halagima,
na fa en natɛrɛnama nɛn.
27 N bata i tan Yeremi dɔxɔ
alogo i xa n ma yamaan kɛɲaan fɛsɛfɛsɛ,
alo xabun naxan wuren matoma,
alogo i xa e sigati kiin nakɔrɔsi,
i yi a mato.
28 E birin findixi muxu murutɛxi tengbesenxine nan na,
nafigin naxanye xɔdɔxɔ
alo wuren nun sulana.
Kala tiine nan e birin na.
29 Xabun tɛɛn nafema nɛn
alogo tɛɛn xa yɔxɔn ba wureni,
koni a katama wuren nasɛnsɛndeni fuun nin,
bayo wuren gbiin mi tinma bɛ a yi.
30 E luxi nɛn
alo wure gbetin naxan lan a woli ayi,
bayo Alatala bata a mɛ e ra.”