1 Muxun nan n na,

naxan ɲaxankatan toxi

Alaa xɔlɔn sɛnbɛn bun ma.

2 A n gbɛngbɛn nɛn a yɛɛ ra,

a yi n nasiga ti dimini,

kɛnɛn mi dɛnaxan yi.

3 A luma a sɛnbɛn nakelɛ n tan xili ma waxatin birin!

4 A bata n fatin nun n fati kidin mafasa,

a yi n xɔnne gira.

5 A bata n nabilin xɔlɛn nun ɲaxankatane ra feu!

6 A bata n lu dimini,

alo muxun naxanye bata faxa

to mi na ra.

7 Ala bata n nabilin yinna ra,

n mi fa nɔɛ minɛ,

a yi n xidi yɔlɔnxɔn binyene ra.

8 Hali n xinla ti n mali feen na han,

a mi a tuli matima n ma maxandin na.

9 A bata kiraan bolon n yɛɛ ra gɛmɛ fɛrɛnne ra,

a yi n ti kira yifuxin xɔn.

10 Ala luxi nɛn n xa

alo kanko gbeen naxan dɔxi n yɛɛ ra,

alo yatan na a luxun fɔtɔnni,

11 a yi n ba kiraan xɔn,

a n yibɔ,

a yi n lu halagixi.

12 A bata a xanla bandun

a yi a xalimakunle xun ti n na.

13 A xalimakunle bata n gbingin sɔxɔn.

14 N bata findi magele seen na n ma yamaan birin xa,

n magele feen bata findi muxune sigi sa xunna ra lɔxɔ yo lɔxɔ.

15 Ala bata n nalugo sansi xɔlɛne ra,

a dabari igen findi n minseen na.

16 A bata n karahan

n yi n ɲinne kala gɛmɛ xɔnne ra,

a yi n yibodon burunburunni.

17 A bata n ba bɔɲɛ xunbenli,

hɛrin yɛtɛɛn yi ɲinan n na.

18 N yi fa a fala, n naxa,

“Siimaya mi fa n xa sɔnɔn,

hanma n yigi yi tixi seen naxanye birin na fata Alatala ra.”

19 N ma ɲaxankatana fe xa rabira i ma,

n lu na xun xɔn kii naxan yi,

n dabari igen nun se xɔlɛn naxanye sɔtɔ.

20 N na n miri ne ma,

n niin yi rafɔrɔ.

21 Koni miriyani ito nan fa n bɔɲɛni

alogo n xa yigin sɔtɔ:

22 Alatalaa hinanna mi ɲanma,

a kininkininna mi a danna liyɛ.

23 Ala mɔn xɛtɛma e ma xɔtɔn yo xɔtɔn.

I ya lannayaan gbo han!

24 N na a falama nɛn n bɔɲɛni,

n naxa, “Alatala nan n kɛɛn na

nanara, n yigi saxi a yi.”

25 Alatala fan muxun na,

naxan a xaxili tixi a ra,

naxan a fenma.

26 A lan muxun xa Alatalaa kisin mamɛ maraxarani.

27 A lan adamadiin xa xuru tɔrɔyaan bun

fɔlɔ a foninge waxatin ma.

28 Xa Ala a ragidi a ma,

a lan a yi dɔxɔ a danna sabarini,

29 a yi a xinbi sin a yɛtagi burunburunni.

Waxatina nde a mɔn yigin sɔtɔma nɛn.

30 A xa a dɛɛn ti a bɔnbɔ muxun xa,

a yi wasa yarabin na!

31 Amasɔtɔ, Marigin mi a mɛma adamadiine ra han habadan.

32 Hali a tɔrɔn nafa e ma,

a kininkininma e ma nɛn

bayo a hinanna gbo.

33 Alaa ɲɛnigen mi a ra,

a xa adamadiine tɔrɔ

a yi e ɲaxankata.

34 Xa muxune yamanan kasorasane birin yibutuxun,

35 xa kiti kɛndɛn mi sama adamadiin xa

Kore Xɔnna Ala yɛɛ xɔri,

36 xa kitisane mi tin muxun xun mayɛngɛ kitin sɛ,

Marigin mi na toma ba?

37 Nde nɔɛ fena nde falɛ,

a yi liga,

xa Marigin mi na feen yamari?

38 Gbalon nun hɛrin firinna birin mi fataxi

Kore Xɔnna Ala fala xuiin xan na ba?

39 Nayi, xa muxun bata yulubine liga,

a lu a nii ra,

na kanna xa a mawuga nanfera?

40 En na en sigati kiine rakɔrɔsi,

en yi e fɛsɛfɛsɛ,

en yi xɛtɛ Alatala ma.

41 En Ala maxandi en bɔɲɛn ma feu,

en yi en yiine ti Ala xa kore xɔnna ma.

42 Yamaan yi Ala maxandi, e naxa,

“Nxu bata i matandi,

nxu yi murutɛ i ma,

i fan mi tinxi nxu mafeluyɛ!”

43 “I bata i yɛtɛ rabilin xɔlɔn na

alo domana, i yi nxu sagatan

i yi faxan ti kininkinintareyani.

44 I bata i yɛtɛ luxun kundani

alogo nxɔ maxandi xuine nama i li.

45 I bata nxu lu

alo ɲaman kurun na,

alo se kunxina siya gbɛtɛne tagi.”

46 “Nxu yaxune birin dɛni bixi nxu xili ma han!

47 Fe magaxuxine nun yili gexine nan tun nxu yɛɛ ra,

e nun kalan nun gbalona.”

48 N yɛɛn xɔnna bata rafe yɛɛgen na

gbalona fe ra

naxan n ma yamaan sɔtɔxi.

49 N yɛɛgen minima

dan mi naxan na,

n mi matabu sɔtɔma,

50 han Alatala yi a yɛɛ ragodo n ma

keli kore xɔnna ma, a n mato.

51 N yɛɛne n xɔlɔma

n na n ma taan sungutunne birin toma tɔrɔxi.

52 Naxanye n yaxuyama fuyan,

ne bata n sagatan

alo e yi xɔliin nan fɔxɔ ra.

53 E bata n ɲɛɲɛn nagodo yili tilinxin na,

e yi gɛmɛne ragodo n xun ma.

54 Igen yi sa n xun ma,

n yi a fala,

n naxa, “N bata lɔ ayi!”

55 Alatala, n na i xili nɛn yili tilinxin kui.

56 I bata n gbelegbele xuiin mɛ,

i nama i tunla ba n xili ti xuiin na malina fe ra.

57 N to i xili, i yi i maso n na

i yi a fala,

i naxa, “I nama gaxu!”

58 Marigina, i bata n xun mayɛngɛ kitini,

i yi n niin xunba.

59 Alatala, i bata a to,

n ɲaxankataxi kii naxan yi.

N ma kitin sa n xa!

60 I bata a to,

e e gbeen ɲɔxɔma n na kii naxan yi,

e feen naxanye birin yitɔnxi n xili ma.

61 Alatala, i bata e konbi ti xuine mɛ,

e nun e feen naxanye birin yitɔnxi n xili ma,

62 e falan tima n xili ma,

e n mafala fɛriɲɛn gbɛn!

63 E mato, e nɛma dɔxi,

e nɛma tixi,

n magele feen bata findi e sigi sa xunna ra.

64 Alatala, e kɛwanle saran e ra,

alo a lan e fe raba kiin ma kii naxan yi.

65 E bɔɲɛne raxɔdɔxɔ ayi,

i ya dangan yi lu e ma.

66 Alatala, e sagatan i ya xɔlɔni

i yi e raxɔri dunuɲa yi!