1 Ẽfe yora mĩshtichi, ẽkĩa Pablo. Ẽ kirika kenexõ mato fomai mã tãpinõ. Nofeta Jesús Ifofamis Timoteo feta ẽ mato kirika kenexõ fomai. Epa Niospa ea katopaiyaito Cristo Jesús ea katoni ãfe meka ẽ mato yoifofãfofãinõ.

Nios chanĩmara faafo Corinto anoafo, Acaya mai anoafori ẽ mato keyokõi yoisharai. 2 Ẽ nõko Nios mato kĩfixomis iskafakĩ: “Epa Niospa, nõko Ifo Jesús feta ato noikõikĩ ãto õiti inimamasharaxõfe. Askatari ato shara fafe,” ixõ ẽ matoõnoa yoimis.

3-4 Nõ Epa Nios yoisharanõ iskafakĩ: “Epa Niospa, mĩ noko sharafa fafafãini. Mĩ sharafinakõia. ¡Aicho!” ixõ nõ Epa Nios yoinõ. Nãfi nõko Ifo Jesucristo ãfe Apaki. Nãatori noko noisharakõi. Askatari nõ omiskõiaito noko inimamatiro. Akka nã nõ meemis keskara mei, fetsa omiskõiaito nõ inimamatiro, nã Epa Niospa nõ omiskõiaito noko inimamamis keskafakĩ. 5 Cristo omiskõimakĩfinakõinifo. Nãskakẽri nõri Cristoõnoax omiskõikõi. Akka Cristo omiskõiaito Niospa axosharakõini. Nãskakẽ Cristoõxori nokori Niospa axosharakõi. 6 Akka nõ Niospa meka mato yoi nõ omiskõiaito mã noko nikakõixõ mã nõko Ifo Jesús chanĩmara faax mã afe isharakõitiro. Nãskax mã inimakõitiro. Akka nõ mato yoi nõ omiskõifiaito nõko õiti Epa Niospa noko inimamaxomis. Akka mã mã noko õimis nõ omiskõiaito Epa Niospa noko axosharaito. Nãskarifiai mãri omiskõiaito Epa Niospa matori axosharakõixii mã tenesharakõinõ. 7 Mã nõ tãpia nõ omiskõiai keskai mãri nofe omiskõiaito Epa Niospa nõko õiti inimama keskafakĩ matori inimamasharai.

8-9 Efe yora mĩshtichi, Asia mai anoax nõ omiskõita ẽ mato yoi mã tãpinõ. Nõ omiskõifinakõita tenetiroma mei nai keskarakõi nõ meita. Nãskakẽ nõ tãpitiro nãskara Epa Niospa noko tãpimana nõa nõ ifimetiroma nõ omiskõiyamanõ. Epa Nios fistichi noko ifitiro. Akka nõ omiskõiaino nõ naano, nãatofi yorafo otofatirokĩ, ixõ nõko shinã mẽraxõ nõ shinãita. 10-11 Akka nõ fãsi omiskõi nakerafiaino Epa Niospa noko ifita. Anã afetĩara noko ifixii. Askatari nõ chanĩmara fakõini nokomãi ifitaifamiskẽ, mãmãi noko Epa Nios kĩfixomiskẽ. Mã noko askafaino nã Nios chanĩmara faa fetsafãfe shinãkĩ iskafaxikani: “Aicho Epa Niospa, mĩ Pablo yafi afe rafemisfo mĩ ato ifisharakõia. Mĩ fãsi sharakõi,” ixõ yora ichapafãfe yoixikani.

12 Nã nõ fakira kafãsai ariax nõ isharakõimis, nõ afaa chakafamisma. Niospa fichipaiyai keskara nõ amis. Askatari mato mẽranoax nõ isharaifinakõimis. Nãskakẽ nõ shinãchakaima nõ inimasharakõi. Akka nõkai nõ mato pãramisma, chanĩma fisti nõ mato yoimis. Niospa noko noikĩ noko shinãmanaino nõ isharanõ mato mẽranoax. Askatari nã nõ fakira kafãsai ariax nõ isharakõimis. 13-14 Ẽ mato kirika kenexõ manamani tãpitiropinĩ shara faxõ fekaxma mã tãpitiro xafakĩa sharakõi. Nãskafekẽ atirifãfe tãpisharafoma ẽ afe keskaramãki. Nãskafixõ mã tãpisharai, nãskara shara ẽ fichipai. Nãskakẽ nõko Ifo Jesús anã oaino mã nokoki inimasharaxii, nõri matoki inimasharanõ.

15-16 Nãskakẽ ẽ shinã ẽ Macedonia ano kaitĩa ẽ mato ano mãpefaixii anã ẽ mato yoisharaxiki mãto õiti mẽra mã inimanõ. Askata nã Macedonia anoax ẽ oaitĩa anã ẽ mato ano mãpetiro mato fe iyoxiki. Chipo Judea ano ea nĩchitirofo, ixõ ẽ shinãni. 17 Nãnori ẽ shinãfiax ẽ mato ari ẽ kayoikaima. Akka mã iskafakĩ shinãiraka: “Pablo ẽ kaira ifiax kaima, ¿afeskakĩ noko pãramẽ?” ixõ mã shinãiraka. Akka ẽkai õiti ranãyama fetsa yoikĩ, fetsa yoikĩ ẽ fapanã. Nã yõra Jesús Ifofaamato shinãi keskara ẽ shinãima. 18 Nã Niospa noko pãramisma keskafakĩ nõrikai mato pãramisma. Nãskakẽ tãpisharakõia nõ mato pãramisma. 19 Akka Timoteo ikaino Silvano ikaino ẽ ikaino Jesucristo Niospa Fakeõnoa nõ mato yoimis. Jesucristo mekakai rafema, ãfe meka mẽstekõi. Chanĩma fisti. 20 Epa Niospa noko yoiyoa keskara keyokõi Cristo mã noko axomis. Nãskakẽ nõ keyokõichi yoimis iskafakĩ: “Epa Niosi, mĩ fãsi sharakõi. Jesúsxõ keyokõi mĩ afama mĩshti famis nã mĩ yoiyoa keskafakĩ. Nãskakẽ Jesús aneõxõ nõ mia aicho fai,” ixõ nõ yoimis. 21 Askatari Epa Niospa mato yafi noko Jesús Ifosharakõifama. Nãskatari noko katoxõ noko nĩchini ãfe meka yoimis nõ inõ. 22 Akka fẽtsa ãfe afarafo marakka fatiro fetsafãfe tãpinõfo ãfenãkẽ. Nãskafakĩri Epa Niospa ãfe Yõshi Shara nõ mẽra nanea aõxõ nõ tãpinõ nõ afe yoraxõ. Nãskakẽ nõ tãpitiro afara fetsa nã noko yoiyoa keskara chanĩmakõi noko inãxii.

23 Ẽ mato ari kaira ixõ ẽ shinãfiitaxakĩ ẽ kaama. Epa Niospa ea tãpikõia ẽ chanĩkẽma. Ẽ mato ari kakerana. Nãskafiax ẽ kaama ẽ mato shinãkĩ. Ẽ ato ari kaxõ ẽ ato fasi yoikĩ ẽ ato shinãmitsamatirora ikax nãskax ẽ mato ari kaama. 24 Ẽ mato askafatama ẽroko mato inimamapaisharai. Ẽkai mãto ifo ipaima. Akka Jesús fisti nõko Ifo. Akka mã mã Jesús chanĩmara faxõ mã mã Jesús Ifo sharakõifai. Nãskakẽ ẽ mato feta Jesús yonoxopai mã inimai finakõinõ, askatari mã Jesús Ifo sharakõifanõ.