1 Askata fariseofo fe a Moisés yoikĩ kirika keneni keskara ato tãpimamisfo Jerusalén anoax Jesúski fẽkaxõ yõkanifo: 2 “¿Afeskai na mĩõxõ tãpimisfo a nõko xinifo ipaonifo keskakanimamẽ? Akka a nõko xinifãfe yoinifo keskara tãpifikaxõ pixikakĩ mechokomekeranafo,” ixõ yoiaifãfe Jesús ato kemani:

3 “Akka, ¿afeskakĩ mãri mãto xinifo ipaonifo keskara mã tanapaimẽ? Nãskaxõ a Niospa yoini keskara mã nikatama nã mãto xinifãfe yoimisfo keskara mã nikamis. 4 Akka Epa Niospa yoikĩ iskafani: ‘Mãto epa yafi mãto efa nikasharakãfe. Akka a ãto apa yafi ãto afa chakafaifo ato retemakãfe,’ ixõ Niospa yoini. 5-6 Nãnori Niospa yoifinikẽ mãfi ato mẽstekõi nofe yorafo mã ato tãpimamismaki. Akka mã ato yoimis iskafakĩ: ‘Mãto epa yafi mãto efa mã yoikĩ iskafatiro: “Epa, na kori ẽ mia inãkerana. Nãskafixõ mẽ kori keyoa ẽ Nios inãkĩ. Nãskakẽ ẽ mia anã afaa inãtiroma,” ixõ mã ato yoitiro. Nãskaxõ mãto epafo mã shinãmakĩa keskara mã itiro,’ ixõ mã ato yoimis parakĩ. Askafixõ mã ato tãpimasharamisma. A kirikaki yoikĩ Niospa meka kenenifo anori mã yoimisma. Nã mãto xinifo ipaonifo keskara fisti mã tanamis. A Niospa yoini keskara mã akima. 7 Mãfi keparanãmiski. Matoõnoa yoikĩ Niospa meka yoimisto Isaías kirika keneni chanĩmakõi iskafakĩ:

10 Nãskata Jesús yorafo kenaxõ ato yoini iskafakĩ: “Ea nikasharakõikãfe tãpisharakõixikakĩ ẽ mato yoinõ. 11 Na mã piaito choshta keskara mato imatiroma. Askatamaroko yorafãfe ãto shinã mẽraxõ chaka shinãkani, askatari chakai mekaifono choshta keskara Niospa ato õi,” Jesús ato fani.

12 Askata aõxõ tãpimisfo fõkaxõ Jesús yõkanifo: “Ifo, ¿mĩ tãpiamamẽ fariseofo õitifishkikani nã mĩ yoiaito nikakani?” ikaxõ yoinifo.

13 Askafaifono Jesús ato kemani meka fetsafaxõ: “Tare ifãfe afara chakafo fanatiroma. Askatamaroko a chaka foaikaino tsekaxõ potatiro. Nãskarifakĩ ẽfe Epa nã nai mẽra ikato afarafo fanayamaxõ, ãfe tapo tsekaxõ potaxii anã afaa inõma. 14 Akka fariseofo nikayamakãfe. Nã fẽxo keskarafoki. Akka fẽxo afe fẽxo iyopai xato mẽra paketiro. Nãskarifiakĩ nã fariseofãfe Niospa meka tãpikaxoma fetsafo tãpimatirofoma. Nãskakẽ ato fe Nios ari nokotirofoma,” ixõ Jesús ato yoini.

15 Ato askafaito Pedro Jesús yoini: “A na mĩ yoia keskara meka fetsafaxõ noko yoisharafe nõ tãpisharanõ,” fani.

16 Askafaito Jesús kemani: “¿Afeskakĩ mãri mã nikasharaimamẽ? 17 Akka nõ afara piano nõko ato mẽranoax payokomeano nõ aya safatiro. Nãatokai mato chakana fatiroma. 18 Akka a mãto shinãmã shinãxõ mã afara chaka yoiaino nãato mato chakana fatiro. 19 Akka yorafãfe afara chakafakakĩ ãto shinã mẽraxõ chaka shinãtirofo, ato retetirofo, askatari ãto ãfima chotatirofo, askatari kẽro fetsa kaxefatirofo, askatari yometsotirofo, askatari chanĩtirofo, askatari ato ĩchatirofo. 20 Akka mechokomexoma mã piaino Epa Niospa choshta keskara mato õima. Akka yorafãfe ãa shinãkaxõ afara chakafatirofo. Nãskakẽ Epa Niospa ato õi choshta keskara,” ixõ Jesús ato yoini.

21 Askata Jesús aõxõ tãpimisfo fe kani nã pexe rasi Tiro fe Sidón chaimashta ano. 22 Askata kẽro fisti Canaán mai ano ikatsaxakĩ judeo kaifoma Jesús ano kani. Kaxõ fãsikõi yoikĩ kenani iskafakĩ: “Ifo, mĩ David fenaki, ea shinãfe. Ẽfe fake xotofakeshta niafaka chakata omiskõimamiski,” ixõ yoini.

23 Askafaito nikafikĩ Jesús kemanima. Nãskakẽ ãfe inafãfe fõkaxõ yoinifo: “Ifo, na kẽro yoife katanõ. Nocho okĩ noko fekaxtefafei kiki. Fãsikõi fiisiki kiki,” fanifo.

24 Askafaifono Jesús ato yoini: “Ẽfe Epa Niospa ea nĩchini judeofos ano, nãfo oveja fenoa keskarafo. Akka yora fetsafo ano ea nĩchinima,” ato askafani.

25 Akka nã kẽro Jesús nãmã ratokonõ mai chachipakefofãyanã iskafakĩ yoini: “Ifo, ẽfe fake ea sharafaxope,” fani.

26 Askafaino Jesús kemani meka fetsafaxõ: “A fakefãfe piai fĩaxõ nõ paxta inã, askarakai sharama,” fani.

27 Jesús askafaito nã kẽromã kemani: “Ẽje, Ifo. Akka paxtafãfe pitirofo a ifãfe piai ãfe potofo mĩsa nãmã keyo pakeaito,” fani.

28 Askafaito Jesús yoini nã kẽro: “Mĩ ea chanĩmara fakõini fetsafo keskarama. Akka nã mĩ ea yoiai keskara ẽ mia axonõ,” ixõ Jesús nã kẽro yoini. Askafaino ãfe fake xotofake shararisatani.

29 Askata Jesús anoax aõxõ tãpimisfo fe kaax ĩa Galilea kesemẽ nokoni. Nãskata machi keya mãpefainax tsaoni. 30 Nãno yorafã rasi akiki fenifo. Nã isinĩ imisfo akiki efenifo Jesús ato sharafanõ. Fetsa chãto ini, fetsari fẽxo ini, fetsari mifi yõshia ini, fetsari mekamisma ini. Nãskakẽ fetsa fetsatapafo a isinĩ ikaifo Jesús keyokõi ato sharafani. 31 Ato sharafaino õikani yorafo yoinãnifo: “¡Kee! Õikapo. Iskarakai nõ õimisma. Nã mekamisfoma mã mekakani. A mifi yõshiafori mã sharafo. Nã chatofori mã nisharakani. Nã fẽxofãferi mã õisharakani. Jesús afama mĩshti fatiro. Akka nõfi israelifokĩ nõko Nios fãsi sharakõi,” ikanax yoinãnifo.

32 Askata Jesús aõxõ tãpimisfo kenaxõ yoini: “Ẽ na yorafo shinãkõi, nono tres nia mã efe ikafono, nonoxori afaa pikanima. A piaifo mã keyoa. Akka afaa pimaxoma ãto pexe ano ẽ ato nĩchiano fonãikani afaa pikanaxma fai nẽxpakĩa paketirofo,” ixõ Jesús ato yoini.

33 Akka ato askafaino aõxõ tãpimisfãfe kemanifo: “Akka, ¿afeskaxõ a nõ piai nõ fichitiromẽ na yorafo ato pimaxikĩ nono tsoa ikama?” fanifo.

34 Askafaifono Jesús ato yõkani: “¿Afe tii mã pãayamẽ?” ato faito, “Siete pãa pishta, foe ichapamashtari,” fanifo.

35 Nãskata nã yorafo nãmã tsaonõfo Jesús aõxõ tãpimisfo ato yoini. 36 Nãskata Jesús siete pãa yafi foeri tsomaxõ Apa Nios kĩfini: “Aicho Epa, mĩõxõ ẽ ato pimaikai. Mĩ fãsi sharafinakõiaki,” fata, pãa kaxketa, foeri tekenãfaxõ aõxõ tãpimisfo ato inãni nã yorafã rasi ato miniketsanõfo. 37 Nãskakẽ keyokõichi pikanax mãyakõinifo. A pikĩ chetefaafo siete fẽta fospikõia ini. 38 Akka nã pãa piafo cuatro mil feronãfakefos inifo. Kẽrofãferi fakefoyaxori ato feta pinifo. 39 Nãskata Jesús yorafo yoini fõtanõfo ãto pexe ano. Nãskata Jesús kanõanãfã mẽra naneinãkafani aõxõ tãpimisfo fe. Mã naneinãkafãta aõxõ tãpimisfo fe mai fetsa ano kani, Magdala ano.