7
Niospa ciento cuarenta y cuatro mil afe yorafo kexexii
1 Nãskata ẽ anã õia oa ẽfe namapa õia keskara nã ẽ mato yoinõ. Niospa ãfe ãjiri cuatro afe nai mẽra imisfo ẽ õia. Fetsa xini oaikiri nia, fetsa xini kaikiri nia, fetsa xini oaima anori nia, fetsa xini kaima anori nia. Askano nefe nishpapakekafana. Nefe nishpapakekafanaino keyokõi maifo tii anoa nii peifo takka takka ikama. Fakafãri anã poo ikama. 2 Nã cuatro Niospa ato yoiaito mai yafi fakafã chakafatirofo. Askata Epa Nios nipanakato ãfe ãjiri fetsa ẽ õia xini oaikirinoax oaito, nõko Epa Nios ãfe marakka fati feaito, a afe yorafo aõ marakka faxii keyokõichi tãpinõfo Niospa afe yorafokẽ. Nã Niospa ãjiri okĩ nã cuatro Niospa ãjiri fetsafori fãsikõi ato yoia iskafakĩ: 3 “Manayokãfe, nã Nios Ifofamisfo ĩkisi ãto femãnãki ãfe anefo keneyonõ nãfãfe Nios yonoxomisfoki keyokõichi tãpinõfo. Nãskakẽ fena ato chakana fayamakãfe. Mai anoafo fakafã anoafori, ififo ato chakana fayamakãfe. Chipo ato axikakĩ,” ixõ ato yoia.
4 Akka ẽ nika mã Niospa ãjirinĩ mã ato marakka faano ciento cuarenta y cuatro mil judeofãfe femãnãki. 5-8 Nõko xini Israel ãfe fakefo feronãfakefos doce inifo. Ato iyoakõichi ãfe ane Judá. Judá ãfe pefeta Rubén. Rubén ãfe pefeta Gad. Gad ãfe pefeta Aser. Aser ãfe pefeta Neftalí. Neftalí ãfe pefeta Manasés. Manasés ãfe pefeta Simeón. Simeón ãfe pefeta Leví. Leví ãfe pefeta Isacar. Isacar ãfe pefeta Zabulón. Zabulón ãfe pefeta José. José ãfe pefeta ato chipo fakekõi Benjamín. Nã doce feronãfake fisti rasi paxkakanax mã kaiafono nã doce feronãfake anoa Niospa ato katoni. Fetsa anoa doce mil faxõ ifita, fetsa anoari doce mil faxõ ifini. Nãato askafakĩ fetsa doce mil faxõ ato ifiketsani. Nãskakẽ mã afo yosikanax ciento cuarenta y cuatro mil inifo.
Yorafã rasikõichi rapati oxokõi safeafo
9 Askata Epa Nios fe ãfe Fake Jesús nã oveja fake keskara nã tsaoafo ano yorafã rasi niafo tsõa ato tanatiroma. Nã maitio anoafo fisti rasi anoafo, xoko fetsafo, meka fetsayafo ikafo, rapati oxokõi chainipa safeafo ẽ õia fisti rasichi epe pei tsomafãfe. 10 Nãfãfe fãsikõi yoiafo iskafakakĩ:
Nõko Epa Nios feta ãfe Fake Jesús noko ifimis nõko Ifo Jesús oveja fake keskara nokoõnoax nani nõko chaka noko soaxoxikĩ nõ afe nĩpaxanõ,
ixõ yoiafo. 11-12 Nãskata nõko Ifo xanĩfãfe tsaoti ano tsaoano ãfe ãjirifãfe foaketi fayakenafo ikafo. Nãskakẽ nã veinticuatro xanĩfofo fe nã Niospa onifanifo cuatrofo nõko Ifo tsaoano tsaoafo ikafo. Nãskafono nã ãjirifo nã nõko Ifo tsaoano ratokonõ mai chachipakefofãkanax feopakefofãnafo Nios yoisharakakĩ iskafakakĩ:
¡Aicho! Chanĩmakõi, meres fisti mĩ isharapakemis. Meres fisti nokori mĩ imasharatiro. Mĩ keyokõi tãpia. ¡Aicho! Nã nõ yopai keskara mĩ noko axomis. Keyokõichi sharakõi mia fapanakafo. Mĩ afama mĩshti fatiro. Mĩ nãskapakenaka. Nãskaroko anõkĩ,
ixõ yoiafo.
13 Nãskata nãnoa xanĩfo fẽtsa ea yõka: “¿Na yorafo rapati oxo chainipa safeafo tsoamẽ? ¿Fakiax feafomẽ, mĩ tãpiamẽ?” ixõ ea yõka. 14 “Maa. Ẽkai tãpiama. Mĩ tãpia. Mĩ ea yoitiro,” ẽ faito ea yoia iskafakĩ: “Yorafo omiskõiaifono na yorafori fãsi omiskõinifo. Akka omiskõiaifono Niospa ãfe Fãke Jesús ato nãxoni ãto chaka ato soaxoxiki. Ato chaka soaxõ mã ato imasharakõia. Nãskakẽ ato rapati oxo shara safemana. 15 Nãskakẽ Epa Nios ano iskaratĩa afe ikafo. Epa Niospa ato yonomana keskara axopakenakafo. Nãskakẽ ato kexefafãini afara chaka atoki nokoyamanõ. 16-17 Niospa ãfe Fake Jesús Epa Nios fe imis. Nãato ato kexepakenaka. Nãskakẽ anã fonãitama, anã nomipakenakafoma. Xinĩri anã ato pipanakama. Jesús ato kexeaino inimapakenakafo. Epa Niospa ãto õiti ato fepeaxoxii anã oianõfoma,” ixõ ea yoia.