1 Efe yora mĩshtichi, ẽ mato yoisharapaiyai keskara akãfe. Epa Niospa mato noikĩ mato sharafamiski. Nãskakẽ mãri inãmekãfe mãto Ifo inõ, ãfe yonomati ipaxakakĩ. Mã askaino anã afara chaka mãto ifo itiroma, Nios mãto Ifo iki. Shinãkapo. Mã mẽste shinãsharakõikĩ Nios noiyanã sharafakãfe. Mã askafaino Nios matoki inimakõitiro. 2 Nios Ifofaafãfema shinãi keskara shinãyamakãfe. Mã shinãpaoni keskara anã shinãyamakãfe. Iskaratĩa Niospa mãto shinã mẽra fetsafapaiyai keskara shinãkãfe. Afaa fetsakai mã shinãtiroma. Mã askakĩ mã tãpitiro Niospa mato imapaiyai keskara sharafinakõi. Mato imapaiyai keskara mã ikaino matoki inimatiro.

3 Epa Niospa ea noikĩ ea yoia ẽ mato tãpimanõ. Nãskakẽ ẽ keyokõi mato yoisharapai. Kakapaimis iyamakãfe. Niospa mato imapaiyai keskara fisti shinãkãfe. Afaa fetsa shinãyamakãfe. Niospa mato shinãmana keskara fisti matoõnoa shinãkãfe. Mẽstekõi matoõnoa shinãkãfe. Mã Nios chanĩmara fakĩ shinãkãfe iskakĩ: “Ea Niospa imapaiyai keskara ẽ ipai,” ixõ shinãkãfe. 4 Ẽ mato afara fetsa ẽa yoipai. Nõko yora fistifiano nõ põyayai fetsea. Askata nõ feroyata, pachoyata, nã nõ fisti askai fetsea. Nãskaxõ nãfãfe nõ afara fetsafo atiro. 5 Nãskarifiai nõko Ifo Cristo fistikõi. Akka nõfi ãfe põya keskarata, ãfe fero keskarata, ãfe tae keskarata nõ iki fetsea yora fisti fiax.

6 Epa Niospa noko amapaiyai keskara nõ aõxõ fetsafo axosharatiro. Mã nõ Nios Ifofaano a noko imapaiyai keskara noko imaketsai fẽtsa ãfe meka ato yoinõfo, fẽtsari ato tãpimanõ, fẽtsari afaamaisfori ato inãnõ. Nãskarafo noko imaketsai. Mã nõ Nios Ifofaano noko noikĩ noko katoa noko amai keskara nõ anõ. Noko fetsafo katoa ãfe shinãõxõ fetsafori ãfe meka nõ ato yoinõ. Nãskakẽ mã mato katoano mã chanĩmara faxõ mato yoiai keskara fetsafori ato yoisharakãfe. 7 Mã mato fetsafo katokẽ ãfe shinãõxõ fetsafori axosharafafãikãfe. Mato fetsafo katokẽ ãfe shinãõxõ ãfe meka ato tãpimasharakãfe. 8 Mato fetsafo katokẽ aõxõ fetsafo õiti ato fepeaxõfafãikãfe. Mato fetsafo katokẽ afara yopaifo inimayanã ato inãsharakãfe. Mato fetsafo katokẽ ãto xanĩfo mã inõ. Nãskakẽ Niospa shinãmana keskara ato yonomasharakãfe. Xanĩfo mẽsteshara ikãfe. Nã mato katokẽ ãfe shinãõxõ omiskõiaifo ato noikĩ inimayanã ato axosharakãfe.

9 “Ẽ mato noira,” ifiata ato pãrayamakãfe. Yorafo noikõikãfe. Afara chakafo noikaspakãfe. Afara shara noisharakãfe. Afo potayamakãfe. 10 Nã mã Nios chanĩmara faafo tii noinãkãfe. Mato fe yorakõifo fe mã noinãmis keskariai noinõnãkãfe. A mã mã nõimeai keskariai fetsafori ato noisharakãfe. “Fetsafo finakõiaki, ẽ finakõiyamaki,” ixõ ato sharafakãfe. 11 Nõko Ifo yonoxoni xaniyamakãfe. Niospa Yõshi Sharaõxõ inimakãi yonosharaxokãfe. 12 Epa Niospa mato sharafaxoxiai keskara shinãkãfe. Nãfo shinãi inimakãfe. Akka omiskõifi fena fenayamakãfe. Epa Nios kĩfikĩ xateyamakãfe. 13 Nios Ifofaafãfe afara yopaifono ato inãkãfe. Fetsafo pimasharakãfe. Pexe yopaifãfe mãto pexe mẽra ato ikimakãfe. Ato kexesharakãfe.

14 Mato omiskõimanaifãfe ato kopiyamakãfe. Nios kĩfikãfe iskafakĩ: “Epa Niospa ato chakafayamafe ato sharafafe,” ixõ Epa Nios kĩfikãfe. Nãskaxori ato ĩchayamakãfe. Askatamaroko ato sharafaxokãfe. 15 Inimaifono mãri inimakãfe. Ato sharafaifono aõnoax inimakãfe. Oiaifono mãri shinãmitsayanã ato shinãkãfe. Omiskõiaifono mãri atoõnoax omiskõikãfe. 16 Afe feratenãkakĩma Epa Niospa mato shinãmapaiyai keskara fisti anori shinãkãfe. “Ẽ ato keskarama,” iyamakãfe. Xanĩfofo fisti fe rafepaimis iyamakãfe. Afaayamafo feri rafekãfe. “Ẽ tãpia keskarakai fetsafãfe tãpiafoma,” ixõ anori shinãyamakãfe. Kakapaiyamakãfe.

17 Mato chakafafiaifãfe ato kopiyamakãfe. Ãto ferotaifi isharakãfe, “Nios chakara,” fayamanõ. 18 Keyokõi yorafo fe rafepaisharakãfe. Mã aska sharafapaifiaino fetsafo mato fe rafesharapaikanima. 19 Efe yora mĩshtichi, fẽtsa mato chakafafiaito ato kopiyamakãfe. Epa Niospa meka yoikakĩ kenenifo iskafakakĩ: “Mato chakafaifo ẽ ato omiskõimanikai,” ixõ kirika kenenifo. Epa Niospa yora chakafo ato omiskõimaxii. Mãkai ato omiskõimatiroma. 20 Ato kopitamaroko nã mato noikaspaifo fonãikaifãfe ato pimakãfe. Nõamã ikaifãfe ato ayamakãfe. Ma askafaito õikani, “Noko kopikanimara,” ikanax rãfipainõfo. 21 Askata fetsafãfe mato chakafapaifiaifãfe mãri kopikiri ato chakafayamakãfe. Chaka ifofayamakãfe. Askatamaroko afara sharafatitaifakãfe. Askafakĩ mã chaka potatiro.