GIN M’ON E BABYOR NI PI’ PAUL NGE YAN NGAK
TIMOTHY
Timothy e be’ ni kab pagel ni girdi’en Kristus ni be’ u Asia Minor. Chitiningin e be’ u Israel ma chitamngin e be’ u Greece. I Timothy e un ngak Paul ngi i ayuweg ko maruwel rok ni i tay nrogon e missionary. Gin m’on e babyor rok Paul ngak Timothy e dalip ban’en ni bay riy ni ba ga’ fan.
Bin som’on e fonownag Paul Timothy ni nge ayuw ko machib ni gathi ir. Pi tamchib ni go’ bogi ban’en e kar athkuyed e leam rok boch yu Israel nge boch e pi’in gathi yad piyu Israel karogned nre fayleng ney e ba kireb, ma en ni ba’adag ni nge thap ngak Got e dabi mabgol, ma bay bmit e ggan ni dabi kay, ma nge un ngorad ya bay ba llowan’ rorad ni yugu bmit. Miki yog Paul ngak Timothy rogon e meybil ni nge tay girdi’en e galesiya ngak Got, nge rogon ni ngi i maruwel e pi’in ni ngu’ur ted murung’agen e galesiya nge pi’in ngu’ur ayuweged e galesiya. Ma aram me dag Paul ngak Timothy rogon ni ngi i par ni reb e tapigpig rok Jesus Kristus nib manigil nge rogon ni nge ngongliy e maruwel rok Got u fithik’ girdi’en e galesiya.
Tin ni bay riy
Tabolngin 1:1–2
Thin ni pi’ Paul u murung’agen e galesiya nge pi’in yad be yog e thin riy 1:3—3:16
Thin ni pi’ Paul ngak Timothy u murung’agen e maruwel ni nge tay u galesiya 4:1—6:21
1
1 Re babyor ney e yib rok Paul ni ir reb e apostel rok Kristus Jesus. I Got ni ir e ma runguydad nge thapegdad ngak nge Kristus Jesus, ni ir e ke l’agan’dad ngak e ra turguyew ni nge mang reb e apostel —
2 Ngak Timothy, nike mang be’ nri fakag u daken e mich u wun’uy ngak Kristus:
I Got ni Chitamangiy nge Kristus Jesus ni ir e Somol rodad e ngu’ur ayuwegew gur ma yow be runguyem, ma yow be pi’ e gapas nga lanin’um.
Ngan ayuw ko machib ni gathi ir
3 Gub adag ni ngam par u lan yu Efesus, ni bod rogon ni gu wenignag ngom ni ngam rin’ ko fa ngiyal’nem ni gu be yan nga Macedonia. Bay boch e girdi’ u wur ni yad be machibnag boch ban’en ni gathi ir, ere thingar mog ngorad ni ngar talgad. 4 Mog ngorad ni ngar paged e pi yat nem ndab kur weliyed ngak e girdi’, nge fithingan pi chitamangiy ni kakrom ni ka ma yo’or, ya ireray e pin’en ni be k’aring e tugthin; ya pin’ey e der ayuweg i muruwliy e n’en ni kem’ay i leamnag rok Got ke tay ni kan nang u daken e mich u wun’uy ngak Kristus. 5 Fan e re bugithin ney ni kugog ngom e bochan e nge yagnag e t’ufeg nma yib ko gum’ircha’ nib machalbog, ma ma yib u lanin’uy ni der yog ngom gur be’ ni kam rin’ ban’en nib kireb, ma ma yib ko bin nib riyul’ i rogon nib mich Kristus u wun’uy. 6 Ya boch e girdi’ e kar pi’ed keru’rad ko pi thin ney kemang e tin ndariyfan ni yad be un i weliy e ke fekrad nga wuru’ e kanawo’. 7 Ma yad ba’adag ni ngar manged tamchib ko motochiyel rok Got, machane darir nanged fan e thin ni yad be yog ara murung’agen e pin’en ni yad be weliy ni kari pagan’rad ngay.
8 Gadad manang ni re Motochiyel nem e bfel’, ni fa’anra ni maruwel ngay nrogon ni ngan maruwel ngay. 9 Machane thangri dab ni pag talin ni pi motochiyel e ni ngongliy ni gathi fan ngak e girdi’ ni bfel’, ya fan ngak e pi’in yad ma th’ab e motochiyel nge pi’in yad ma togopluw ko motochiyel, nge pi’in ndariyfan Got u wun’rad ma yad be ngongliy e tin nib kireb, nge pi’in ndarir liyorgad ngak Got nge pi’in ndariy ban’en nib thothup u wun’rad, nge girdi’ ni kar thanged e pogofan rok e chitamangirad ara chitiningrad, ma fan ngak e pi’in yad ma thang e pogofan ko girdi’, 10 ma fan ngak e pi’in yad ma darngal, ma fan ngak e pumo’on nma darngalnag e pumo’on, nge pi’in yad ma iring e girdi’, ma fan ko pi’in yad ma lifith l’ugunrad ma yad ma pi’ e thin ni nge mang mich nde riyul’ ara rrin’ed ban’en nib togopluw ko bin nib riyul’ e machib. 11 Ireram e re machib ni kan pir’eg u fithik’ fare Thin Ni Bfel’ ni ir e kan pag fan ngog ni nggu weliy ngak e girdi’, ni ireram fare Thin Ni Bfel’ ni ir e th’abi sorok ma ba fla’ab.
Ngan pining e magaer u wun’uy ngak Got ya ir e be runguydad
12 Gu ma pining e magaer ngak Kristus Jesus ni ir e Somol rodad, ni ir e ma pi’ gelngig ko maruwel ni gu be tay. Gu ma pining e magaer ngak ni bochan e be finey nrayag ni nge pagan’ ngog, nge bochan e turguyeg ni nggu pigpig ngak, 13 ni yugu aram rogon nib kireb e thin ni ugog nib togopluw ngak kakrom, mu ug gafgownag ma gu be yog e thin nib kireb nga fithingan. Machane me runguyeg Got, ya de mich Kristus u wun’ug e ngiyal’nem, ni aram e dagur nang e n’en ni gu be rin’. 14 Ma Somol rodad e tow’ath nigeg ko ayuw ni pi’ ngog nge pag rogon me pi’ ngog fare mich nge t’ufeg ni fadad ko ta’ab girdi’ ni gadad ma tay Kristus. 15 Re bugithin ni ba’aray e rib riyul’, ma ngari mich u wun’uy me pagan’uy ngay: ni Kristus Jesus e yib ngaray nga fayleng ni nge thapeg e pi tadenen ngak Got. Me gag e th’abi kireb u fithik’rad, 16 machane er fan nike runguyeg Got, ni bochan e nge yag ni dag Kristus Jesus feni gumaen’ u puluwog, i gag e en nth’abi tadenen u fithik’ e pi tadenen, ni nge dag ngak e pi’in ni bayi mich Jesus u wun’rad nga tomureg me yag e yafos ndariy n’umngin nap’an ngorad. 17 Fare Pilung ni bay i par ndariy n’umngin nap’an, ma dabi yim’ bi’id ma dab ni guy nga owchey, ma kemus ni ir e ta’are Got ni bay, e ir e ngi i liyor e girdi’ ngak me ir e nganog e sorok ngak ndariy n’umngin nap’an! Amen.
18 Timothy ni fakag, kug pag fan e re bugithin ney ngom, ni bod rogon e thin nni yi’iynag nike n’uw nap’an ni murung’agem. Pi thin ney e ir e nge mang talin e cham rom ko cham ni ga be tay nib mat’aw, 19 mu um par nib mich Kristus u wun’um ma dariy ban’en ni be yog lanin’um ngom ni kam rin’ nib kireb. Boch e girdi’ e darir folgad ko tin be puguran lanin’rad ngorad kar kireb niged rogon nib mich Kristus u wun’rad; 20 ni Hymeneus nge Alexander e yow mu’un nga fithik’rad, ni kug pi’row nga gelngin Satan, ya ngar filew ni ngar talgow ndab ku rognew e thin nib kireb nib togopluw ngak Got.
DRAFT VERSION — Proofreading in progress