1 Mu telmed ko pi thin ni ba’aray, gimed e pi’in ni ppin nu Samaria, ni kam sugsug gad ni bod e pi garbaw nu Bashan ni bfel’ e dorwo’ ngorad, ma ba kireb e ngongol romed ngak e pi’in nib me’waer, ma gimed be gafgownag e pi’in gafgow, ma gimed ma gelfen ngak pi figirngimed ni ngar pi’ed e rrum ngam unumed. 2 Rogon nib thothup SOMOL ni Th’abi Tolang e ke micheg nike ga’ar, “Bay boch e rran ni bay yib ni bay ni the’ e lam ngomed ngu’un girngiymed ni gimed gubin; nra bigimed ma bayi bod ba nig u taban e lam. 3 Bay ni girngiymed ko gin nib chugur ni kan kuruf ko yoror ko binaw nga nin’med riy nga wuru’.”

4 I SOMOL ni Th’abi Tolang e be ga’ar, “Gimed e girdi’ nu Israel, fa’anra thingar mu denen gad, me’ere mmarod ngam denen gad ko fa gin ba thothup u Bethel! Marod nga Gilgal, ngam rin’ed e ngongol nib denen ngari musmus rogomed riy! Mu feked e gamanman i yib ni ngam pi’ed ni maligach u reb e kadbul ngu reb, mi gimed fek ta’ab guruy ko ragag guruy e tin bay romed ni yu duk’uf. 5 Mu pi’ed e flowa romed ni ogmagaer ngak Got, mi gimed weliy u fithik’ e ufanthin e tin ka mu chagiyed ngay kam feked i yib! Ya irera’ e mit i n’en ni gimed ba’adag ni ngu’um rin’ed.

6 “I gag e gu pi’ e uyongol nge yib nga urngin e pi binaw romed, yug aram rogon ma da mu sulod ngog. 7 Gu tel e n’uw ko ngiyal’ ni kri t’uf ko pi woldug romed. Ug pi’ e n’uw nge aw nga daken reb e binaw, ma de aw nga reb. Ma bang e flang e i aw e n’uw ngay, ma bang e danga’. 8 Ma girdi’ u in i binaw e rm’ad ko belel miyad yan nga bbinaw ni yad be athapeg ni ngar pir’eged e ran, machane ran ni ba’ riy e dab ra gamangad riy. Ni yug aram rogon ma dam sulod ngog.

9 “Gu l’oeg ba nifeng nib gawel nge mlik nag e woldug romed. Me longuy e pi asmen’ing e yungi woldug romed nge yungi milay’ ko grape, nge yungi gek’iy ni fig nge olive ni fi’imed. Machane ku dam sulod ngog.

10 “Gu pag e msilipig ngomed ni bod fa binem ni gu pag ngak piyu Egypt. Kug thang e fan rok e pi’in pagel romed u fithik’ e mael mu gu fek e pi os romed. Mu gu suguy p’ethungmed nga bon e yam’ u lan gin gimed be par riy. Machane ku da mu sulod ngog.

11 “Gu thang owchen bochi gimed ni bod ni gu thang owchen yu Sodom ngu Gomorrah. Pi aromed ni de yim’ e yad bod ba ley i l’ud ni be yik’ min laeg u mit e nifiy. Machane ku da msulod ngog,” I SOMOL e be non. 12 “Ere gimed e girdi’ nu Israel, aram e nggu gechig nagmed. Ma nggu rin’ e ran’ey, ere ngam fal’eged rogomed ya ngam mada’ niged wenegan e pufthin rog!”