EKLESIASTES
Murung’agen e Re Ke Babyor Ney
Fare ke Babyor ni Eklesiastes e bay riy e leam rok be’ nib mo’on nib Filosofer ni i tafinaynag ma be leamnag fan e biney e tamilang nib ngoch nap’an ma ba mo’maw’, ma bo’or ban’en riy nde mat’aw mra i ngochan’uy me kireban’uy ngay; aram fan ni leamnag ni par ko biney e tamilang e ba m’ayfan. De yag ni nge nang fan e leam rok Got u rogon nma gagiyegnag e girdi’. Machane yugu aram rogon me fonownag e girdi’ ni ngu’ur maruwelgad nib gel ma ngar felfelan’gad ko gubin ban’en ni be pi’ Got ngorad u n’umngin nap’an ni yad be par u roy u fayleng.
Bo’or ban’en ni be yog Filosofer u roy nra luf lanin’uy yungyal’. Machane bochan ni bay e re ke babyor ney u Bible e nge dag nre michan’ ni be weliy e Bible murung’agen e ri baga’ nrayag ni weliy murung’agen e salep’lep’ nge tururuw ko girdi’ ni bang ko biney e yafos. Bo’or e girdi’ nike bi’eg e re ke babyor ney make guy ir riy, ni bod ni sap nga therek. Yug aray rogon ni bay e salep’lep’ nge tururuw ko re ke babyor ney, machane Bible e be ognag ngodad e l’agan’ ngak Got ni ri aram e n’en ni be pi’ fan e yafos rodad.
Gathon e Re Ke Babyor Ney
Bay fan e yafos? 1:1—2:26
Thin ni murung’agen e yafos 3:1—11:8
Tin kan ning-chiylen 11:9—12:8
Sul u daken 12:9–14
1
Yafos e ba m’ayfan
1 Irera’ e thin rok ba Filosofer, ni be’ nib pagel ni fak David, ni i pilung u Jerusalem.
2 Rib m’ayfan, bm’ayfan, thin ni yog fare Filosofer. Yafos e ba m’ayfan, gubin nib m’ayfan. 3 U nap’an e yafos rom e ka mu parnag e maruwel, ni maruwel nib gel, ma mang gam’ingin ni nge yib i m’ug? 4 Be yib boch e mfen ma be thumur boch, ma fayleng e ka be par ni kargon. 5 Yal’ e ka be yib ngalang, ma ku be yani ling nga but’, ni ku be gur i yan ko gin ni tabab riy. 6 Nifeng e ku be thow i yan ko yimuch, ma ku be thow i yan ko lel’och — ni be chelchel me sul bayay. 7 Gubin e lul’ ma be map’ nga maday, machane day e ku be par ni der sug. Ma ran e ku be sul ko gin ni tabab e lul’ riy, ngki sul ngki map’ bayay. 8 Urngin ban’en ma be sor i yan ko thay parwon — ni thayparwon ni dabyag i weliy ko sabathin. Lan owchadad e ri dabi gaman ko tin be guy; teldad e ri dabi gaman ko tin be rung’ag. 9 N’en ni ka ni rin’ ko som’on e ku yira rin’ bayay. Ma n’en ka ni mu’nag ko som’on e ku yira mu’nag bayay. Dariy ban’en nib be’ech u polo’ e fayleng. 10 Ra ga’argad, “Amchangar, ba’aray ban’en nib be’ech!” Ma danga’, ya gubin ni ka ni mu’ i rin’ kakrom ni dawor ni gargelegdad. 11 Dariy be’ ni be yib woran ngan’ e n’en nike thumur ni ka’a nrin’, ma ku dariy be’ u lan e tin bayib e rran nra yib woran ngan’ e n’en ni yibe rin’ e chiney nge ta’boch.
Tin ni nang fare Filosofer rogon
12 I gag, fare Filosofer, e ug mang pilung u Israel u lan yu Jerusalem. 13 Gu turguy ni ngug gay mu gu fil urngin e tin ka ni mu’nag u lan e re fayleng ney.
I Got e ke tay ere gafgowney nga dakendad. 14 Kugguy urngin e tin ni kan mu’nag u roy u fayleng, ma nggog ngom, urngin ma ba m’ayfan. Bod ni yibe lol’oeg e nifeng. 15 Dabiyag ni ngam k’iyag e n’en ni kani buguy; ma dabiyag i the’eg rom e tin ndariy.
16 I ga’ar lanin’ug, “Ku gu mang be’ nib mo’on nib sorok, nib ga’ e gonop rog ngak gubin e pi’in ni ur gagiyeg niged yu Jerusalem ni yad bm’on rog. Ku gu nang e bin rriyul’ e gonop nge llowan’.” 17 Gu duwgiliy ni nggu fil ko mang e thil u thilin e llowan’ nge balyang, nge gonop nge aliliy. Machane gu pir’eg ni ku ta’reb rogon ko gu be lol’oeg e nifeng. 18 Feni ri ga ba gonop e aram feni be gel e magfan’ rom; feni yo’or ni ga be nang, e aram feni ri ga be gafgow.
DRAFT VERSION — Proofreading in progress