1 Mu tay e salpiy rom nga reb e bank u reb e nam, me yan i reb e rran me yib e win riy ngom. 2 Mu tay e salpiy rom nga boch e bank u bang ngu bang’, mu tay nga boch ni pire’, ya da mu nang ko mit i mang buchwa’athan e bay yib ngalan e re fayleng ney.

3 Ra sug e manileng ko ran, me aw nn’uw. Gin nra thig ba ke gek’iy ngay e aram e gin ni bay i par riy. 4 Fa’an ga ra son nge yan i taw nga nap’an nike yan i fel’ e nifeng nge yafang mfin mu yung ban’en, ma dabiyag ni mu yung ban’en, ma dabiyag ni ngam kunuy e ggan nike yib ko woldug. 5 I Got e sunumiy urngin ban’en, ri dabiyag ni nge tamilangan’uy ko pin’en nma rin’, ni bod rogon ndabiyag ni nge tamilangan’uy u rogon bbitir ni be ga’ u yin be’ ni bpin. 6 Mu yung e woldug rom ni kakadbul nge blayal’; ya dabiyag ni ngam nang ko gubin nra tugul ni bfel’ rogon fa dangay, ara reb e ra tugul boch ni bfel’ rogon ma boch e dabi fel’ rogon.

7 Ba manigil ni nge yag ni ngu’un felfelan’ nga fel’ngin e tamilang ko rran. 8 Ngi i felan’um ko gubin e duw ni ga be par ni gabfos. Ndemturug n’umngin nap’an nra um par, ma dabi m’ay u wunum’ ni ga ra yim’ ma ka ba n’uw nap’an ni ga ra par ni gab yam’. Dariy ban’en ngabang ni nge lagan’um ngay.

9 Girdi’ nike taw nga yangren, mu felfelan’gad nga yangarmed. Mu felfelan’gad e chiney nike taw nga gelingmed. Mu rin’ed e n’en ni gimed ba’adag ni ngam rin’ed, mi gimed lek fiti lanin’med. Machane dabi m’ay u wun’med ni Got e ra pufthin nagmed ko tin gimed be rin’.

10 Dabi magafan’med nga ban’en ara mu paged ban’en nge k’ar amith ngomed. Gathi bay um pired ni kigimed bpagel nib n’uw nap’an.