1 Me ga’ar SOMOL ngak Moses, “Mman ngak Farao ngamog ngak ni SOMOL, ni ir e Got rok e Hebrew e be ga’ar, ‘Mpag e girdi’ rog ngranod, nge yag ni ngar meybilgad ngog. 2 Fa’an ka ga ra siyeg ndab mpagrad ngranod, 3 ma bay gu gechig nigem nga ba liliy nib kireb ni bay gu pi’ nge yib ngak e gamanman rom, ni os, nge dongki, nge kamel, nge garbaw, nge saf, nge kaming. 4 Bay gu gagiyelnag e gamanman rok piyu Israel ko gamanman rok piyu Egypt, ya dariy reb e gamanman ni fak piyu Israel nra yim’. 5 I Gag SOMOL e kug duwgiliy reb e tayim ni gabul e aram e rofen ni nggu rin’ e ran’ey.’ ” 6 Ma reb e rran riy me rin’ SOMOL ni bod rogon ni yog, me yim’ urngin e gamanman rok piyu Egypt, machane dariy reb e gamanman ni fak piyu Israel ni yim’. 7 Me fith Farao murung’agen, me pir’eg ndariy ta’reb e gamanman ni fak piyu Israel ni yim’. Machane me gelnag Farao laniyan’ nde pag piyu Israel ngranod.

8 Ma aram me ga’ar SOMOL ngak Moses nge Aron, “Mu gogoyew e awat u stof; mi Moses e nge yin’ e awat ngalang u p’eowchen Farao. 9 Ya bayi wear ni bod e fiyath nga gubin yang u Egypt, ma gubin yang ni bayi sum e lot riy nga downgin e girdi’ nge gamanman nge ngal’ ni malad.” 10 Ma aram miyow fek e awat u lan e stof ngranow ra sak’iygow nga p’eowchen Farao; me yin’ Moses e awat ngalang, me sum e lot u downgin e girdi’ nge gamanman nge ngal’ ni malad. 11 Ma fa pi tapig e de yag ni ngarbad nga p’eowchen Moses, ya ke sug e lot u dowrad ma ku arrogon gubin e girdi’ nu Egypt. 12 Machane me gagiyegnag SOMOL Farao nge gelnag laniyan’ ma de motoyil ko n’en ni yow be yog, ni bod rogon ni yog SOMOL ngak Moses.

13 Me ga’ar SOMOL ngak Moses, “Ri kakadbul e ngam man ngam mada’gow Farao, ma gog ngak ni SOMOL, ni ir e Got rok e Hebrew e be ga’ar, ‘Mpag e girdi’ rog ngranod, nge yag ni ngar meybilgad ngog. 14 Yaney e gathi go’ tolang rom nge girdi’ rom e gu ra gechignag, ya gab mu’un ngay, ma aram e bay mu nang ni dariy be’ ni bod gag u lan e re fayleng ney ni ga’ngin. 15 Fa’an mang e gu pug pa’ag ngalang nggu pi’ e liliy ngom nge girdi’ ko nam rom, ma kam m’ad. 16 Ma bochan gelngig ni ngam guy aram fan ni kug pagem ndab mum’, ya nge wear buguwag nga urngin yang u fayleng. Rom 9:17 17 Machane ka ga be togopluw ngak e girdi’ rog u fithik’ e tolngan’, ndamur pagrad ngranod. 18 Mu telim, re ngiyal’ i n’ey gabul e nge mul e ayis nike el u lang nib cheag e nifeng ni yoko’ ngay, ndawori guy yu Egypt ni ka nap’an ni mang reb e nam. 19 Ere mog nga ni fek e gamanman rom nge urngin ban’en rom ni bay u lan e tamilang ngan tay nga naun; ya bayi mul e ayis nike el nga daken urngin e girdi’ nge gamanman ni bay u wean, ma yad gubin ni bay ra m’ad.’ ” 20 Ma boch e pi tolang u tan pa’ Farao e rrusgad ni bochan e tin keyog SOMOL, miyad fek e sib rorad nge gamanman rorad nga naun. 21 Machane boch e girdi’ e dar motoyilgad ko tin keyog SOMOL, miyad pag e sib rorad nge gamanman rorad u wean.

22 Me ga’ar SOMOL ngak Moses, “Mpug pa’am ngalang, me aw e ayis nike el u lang nga daken e girdi’, nge gamanman nge urngin e woldug ni bay u milay’ u daken e nam nu Egypt.” 23 Ma aram me pug Moses fare ley i sog rok ngalang, me pi’ SOMOL e dirra’ nge ayis nike el nge yib, me aw e dirra’ nga but’. Me pag SOMOL e ayis nike el nge mul nga daken yu Egypt. 24 Me yib e yoko’ ni be mul e ayis nike el nga but’, ma be matmat e uluch u fithik’; ireram e re yoko’ ni th’abi ga’ nike guy yu Egypt ni ka nap’an ni ngal’ nreb e nam. 25 Urngin e girdi’ nge gamanman ni immoy u wean u urngin yang u Egypt e li’rad e ayis nike el ni aw nn’uw. Me li’ urngin e woldug ni bay u milay’, me t’ar urngin kan e gek’iy. 26 Nug nu Goshen, ni aram e gin ma par piyu Israel riy, e kemus e gin’en nde mul e ayis riy nga but’.

27 Me pi’ Farao e thin nge yib ngak Moses nge Aron, ni be ga’ar, “Yaney e kug denen; i SOMOL e mmat’aw, ma girdi’ ko nam rog nge gag e gamad ba kireb. 28 Mmeybilgow ngak SOMOL, nge taleg e re yoko’ ney ni ba’ e dirra’ u fithik’ nge ayis nike el. Bay gu pagmed ngam marod; ndab kum pired.” 29 Me ga’ar Moses ngak, “Nap’an ni gu ra yan nga wuru’ e binaw, mu gu pug pa’ag ngalang nggu meybil ngak SOMOL. Me tal e dirra’, ma dabki mul e ayis nike el nga but’, ma aram e bay mu nang ni re fayleng ney e mmil suwon ngak SOMOL. 30 Ya gu manang ni gur nge pi tolang rom ni bay u tan pa’am e dawori yib madgun SOMOL ni Got u wun’med.”

31 Woldug ni flax nge barley e ke kireb, ya ke el e barley, ma flax e ka fini tabab ko mak’uf. 32 Machane woldug ni wheat nge spelt e dawori kireb, ya bay fini k’uf.

33 Me chuw Moses rok Farao nge yan nga wuru’ fare binaw. Me pug pa’ ngalang nge meybil ngak SOMOL, me tal e dirra’ nge ayis ni be mul nga but’, me tal e n’uw ndaki aw. 34 Ma fa’ani guy Farao nike tal e n’uw nge ayis ni be mul nga but’, ma dakir chub e dirra’, me denen bayay ni aram e ke gelnag laniyan’, ni ir nge pi tolang u tan pa’. 35 Me gelnag laniyan’ nge par nde pag piyu Israel ngranod, nri bod rogon ni fa’ani yog SOMOL ngak Moses.