1 “Bezalel nge Oholiab nge gubin e pumo’on nike pi’ SOMOL e salap ngorad nge tamilangan’, ni yad manang rogon ni ngar ngongliyed gubin ban’en nib t’uf ko fare Tent nib thothup ni ngan toy, ma thingar ra ngongliyed gubin ban’en riy ni bod rogon nike yog SOMOL.”

2 Me pining Moses i Bezalel, nge Oholiab, nge gubin fapi pumo’on nike pi’ SOMOL thawrad ma bmagan’rad ngay ni ngar ayuwgad, me yog Moses ngorad ni ngar tababgad ko maruwel. 3 Me pi’ Moses urngin fapi maligach ngorad nike yib i pi’ e girdi’ nu Israel ni ngan fanay ko fare Tent nib thothup. Ma girdi’ nu Israel e dar talgad i fek i yib ngak Moses e pi maligach rorad ni gubin e kadbul. 4 Ma aram ma fapi pumo’on ni yad be ngongliy fare maruwel e ranod 5 ngar ga’argad ngak Moses, “Tin ke fek e girdi’ i yib e kaygi pag urngin ko tin ba tuf’ ko maruwel ni yog SOMOL ni ngan rin’.”

6 Ma aram me pi’ Moses e thin nge yan u ga’ngin yang e gin be par piyu Israel riy ni be yog ni dakriy be’ ni nge ngongliy yug ban’en nge pi’ ni pa’ ni fan ko fare Tent nib thothup; ma aram me tal e girdi’ i fek ban’en i yib. 7 Tin kan kunuy ni ngan fanay ko fapi maruwel e ke gaman ke aw.

8 Ma urngin e pi’in nth’abi salap u fithik’ fapi pumo’on ni yad be maruwel e ra ngongliyed fare Tent u P’eowchen SOMOL. Ra ngongliyed u ragag yang i mad ni wech ni kan lifith bunu’en e saf u fithik’ nib ra’en mak’ef, nge purple, nge row, ni kan sisyunag ya’an e pi kerubim ngay ni bfel’ ya’an. 9 Yungi mad ney e go’ ta’reb ga’ngin, ra bang ma ragag nge aningeg e yard n’umngin ma l’agruw e yard radan. 10 Ra puthuyed lal yang nga ta’bang ngar yip’ed nge par nike ta’bang, ma ku aram e n’en nrin’ed ko fa lal yang nem ni kabay. 11 Ra ngongliyed e yuchi upol ko mad nib ra’en mak’ef ngar ted u ta’ab raba’ i mirichlen bang nge bang fa gal yang i mad. 12 Wugem e upol nra ted nga ta’ab raba’ i mirichlen bang, ma ku wugem e upol nra ted ngabang, bpapuluw e yuchi upol n’em. 13 Ra ngongliyed wugem i lam nib gol ni ngan fanay ni ngan the’ ko fa gal yang i kateng nge peth ni aram e nge ta’bang.

14 Ra ngongliyed e upong ko fare Tent u ragag nge ta’reb yang i mad u bunu’en e kaming. 15 Yungi mad ney e go’ ta’reb ga’ngin yang, nra bang ma ragag nge lal e yard n’umngin ma l’agruw e yard radan. 16 Ra puthuyed lal yang nga ta’bang ngar yip’ed nge yag bang riy, miyad puthuy n’el yang nga ta’bang. 17 Ma ra bang fa gali yang i mad ma wugem e yuchi upol nra ted nga marichlen u ta’ab raba’. 18 Ra ngongoliyed wugem i lam ko wasey ni bronze ni nge puthuy fa gal yang i mad nga ta’bang, nge par nike ta’ab opong. 19 Ku ra ngongliyed l’agruw yang e upong, bang e ni ngongliy u keru’ e saf ni pumo’on ni kan k’ad ko row, ma bang e ni ngongliy u keru’ e kaming, ni ireram e thal nth’abi wuru e upong ko fare Tent.

20 Gek’iy ni acacia e ra chamayed e ren riy ni ngan fanay ko rungrung ko fare Tent. 21 Ra bang e yungi chayem nem ma ragag nge lal e fit n’umngin ma rliw’ nge medlip e inch radan, 22 ni bay l’agruw i ayal riy, ya nge yag ni peth fa gal yang i chayem nga ta’bang. Urngin e pi chayem ney ma bay e ayal riy. 23 Ra ngongliyed rliw’ yang e chayem ni fen e ba’ ni yimuch fare Tent, 24 ma aningeg i ragag e ayal nib silber ni nge yan u tanggin fa yungi chayem, l’agruw e ayal nga tanggin bang e chayem ni nge kol fa gal yang i n’em ni gapeth ko chayem. 25 Ra ngongliyed rliw’ yang e chayem ni fen e ba’ ni lel’och fare Tent, 26 nge aningeg i ragag e ayal nib silber, ni l’agruw e ayal nga tanggin bang e chayem. 27 Ba’ ni tabgul ko fare Tent, u ba’ ni ngal e ra ngongliyed nel yang e chayem ni fen, 28 ma l’agruw yang e chayem ko pi tabthung riy. 29 Yungi chayem nem ko pi tabthung riy e ba peth u enggin u but’ me dachug i yan nga p’ebugul. L’agruw i chayem ko l’agruw i tabthung e aray rogon ni kan ngongliy. 30 Ere meruk yang e chayem ma ragag nge nel’ yang e ayal nib silber, lal’agruw e ayal nga tanggin bang e chayem.

31 Ra ngongliyed ragag nge lal ley e ralap ko ren ni acacia, ma lal ley riy e fen e pi chayem u barba’ fare Tent, 32 ma lal ley riy e fen pi chayem u barba’, ma ku lal ley riy e fen pi chayem ko ley ntabgul nib migid ko ngal. 33 Ma baley e gek’iy e yan u lukngun fapi chayem u baley nge taw nga baley fare Tent. 34 Ra inged ko gol fa yuyang i chayem, ma ra fal’eged bogi luwaw ni nge kol fa yuley i gek’iy nu lukngun e chayem, ni ku ni ing ko gol. 35 Ra ngongliyed bangi kateng ko mad ni wech miyad lifith bunu’en e saf u fithik’ nib ra’en mak’ef, purple, nge row, miyad sisyunag ya’an e pi kerubim nga daken. 36 Ra ngongliyed aningeg ley i rumog ko gek’iy ni acacia ni ngan the’ fagi kateng ngay, miyad ing ko gol; min the’ ko pi lam riy ni gol. Ma aram miyad ngongliy aningegi e ayal ni nge kol e pi rumog riy. 37 Ra ngongliyed bang i kateng ni nge mang mban fare Tent, regi kateng ney e ra ngongliyed ko mad ni wech ni kan lifith bunu’en e saf u fithik’ ni kan k’ad ko ra’en mak’ef, purple, nge row, ma kan sisyunag ni bfel’ ya’an. 38 Ra ngongliyed lal ley e rumog ni fen e giney e kateng nrayag ni ngan the’ ko pi lam riy, ra inged p’ebgul nge pi ralap riy ko gol, miyad ngongliy lal e ayal ni fen e rumog riy ko bronze.