1  SOMOL e ga’ar, “Fak e girdi’, mu fek e saydon nib m’uth ngam puy robem nge urngin piyan lolugem. Ma ga thabthabelnag fapi piy mag ki’eg nge dalip ulung ni ta’reb oren. 2 Mu urfiy ba ulung u lan binaw ko ngiyal’ nike m’ay ya’an fare m’ag mael. Mu kum fek ba ulung ngam theth’ab ko saydon rom ni ga be liyeg fare binaw. Ma ga werwereg e ulung ni kabay nga fithik’ e nifeng, ma bay gu tuluf ko saydon rog. 3 Mu tay in gaf ngam bachiy nga taban e mad rom. 4 Ma aram ma ga fek in gaf riy bayay, nga mon’ nga mit e nifiy, ma ga pag nge yik. Ma nifiy riy e bayi nath u daken e nam nu Israel.”

5 I SOMOL ni Th’abi Tolang e ga’ar, “Mu changar nga Jerusalem, ni kug tay nga lukngun e fayleng, ni bay boch e nam nib liyeg. 6 Machane yu Jerusalem e i tagopluw ko tin gog ni ngan rin’, ngi i gagiyel nib gel e kireb rok ngak boch e nam, ni da i fol ni ba thil ko tin ba’aram e nam u to’oben i yan. Jerusalem e siyeg e tin u gog me digey e motochiyel rog nde tay u gil’. 7 Jerusalem, mmotoyil e chiney ko n’en ni Gag SOMOL ni Th’abi Tolang e gu be yog. Bochan ni dam fol ko motochiyel rog nge tin gog, ere gur e mu k’aring e oloboch ngom nib ga’ boch ko pi nam nib liyegnem. Kam un nga yalen boch e nam. 8 Ere I Gag SOMOL ni Th’abi Tolang, e gu be yog ngom ni gag e to’ogor rom. Bay gu pag e gechig nge aw ngom ni gubin e nam mra guy. 9 Bochan gubin e tin ga ma rin’ ni gub fananikay, e bay gu gechignag yu Jerusalem nib gel ni dawor gu rin’ bi’id ma dab kug rin’ bayay. 10 Ma wenegan nra yib riy e pi galibthir nu Jerusalem e bay ur longyed pifakrad, ma bitir e bay ur longyed e galibthir rorad. Bay gu werwereg u gubin yang e pi’in ni magach ni kub fos.

11 “Bod feni mich ni gag fare Got ni gu be par ni gub fos — irera’ e thin ku SOMOL ni Th’abi Tolang — ma bochan e Tempel rog ni kam dariyfan nag ko urngin e ngongol rom ni kireb, nge pin’en ni golong ni kam rin’, ere bay gu chililig nagem nga but’ ni dab gu runguyem. 12 Ba guruy u dalip guruy ko girdi’ rom e bay i yim’ ko m’ar nge bilig u lan binaw; ma ba guruy u dalip guruy e bay ni th’abrad nga but’ ko saydon u wuru’ fare binaw; ma bay gu wereg e guruy ni wuriyel nga fithik’ e nifeng mu gu tulufrad ko saydon.

13 “Bay mu thamiy ga’ngin gelngin e damumuw rog nge taw ko ngiyal’ nike gaman u lanin’ug. Nap’an nra buch e piney, ma bayi mich u wun’um ni Gag SOMOL, e gu be non ngom ni bochan e kemus fanag damumuw nga feni damur yul’yul’. 14 Gubin e girdi’ ko pi nam u to’bem i yan e bay u ranod u to’bem ma yad be pilig owcharad romed ma yad be galngeg yad romed.

15 “Nap’an ni gu ra damumuw nib gel nggu gechig nagem, ma urngin e nam u to’bem i yan e yad ra rus. Bay ra sapgad ngom ni ka ra sonogorgad ngu’ur gosgos niged gur. 16 Bay gu taleg e ggan rom nggu pagem ngamum’ ko mak’iy. Bay mu thamiy amthun e mak’iy ni bod rogon gan e gat’ing nib muth npag ngom ni ngamum’. 17 Bay gu pag e uyngol nge gamanman ni malboch nge li’ pifakam, ma bay gu pi e liliy, nge pi tawodmang, nge mael ni nge thang owchem. I Gag SOMOL e kugog e pi thin ney.”