1 I SOMOL e non ngog. 2 Ni ga’ar, “Fak e girdi’, irera’ e n’en ni gu be yog I Gag fare SOMOL ni Th’abi Tolang ko nam nu Israel: Irera’ e tungun ko fare nam ni polo’!

3 “Israel, tungun e ke anog. Bay mu thamiyed e damumuw rog, ni bochan e kug gonpiy ni aram rogon ni fan e tin kam rin’ed. Bay gu fulweg taban ngom gubin e gafarig rom ni golong. 4 Dab gu pagmed ni dabi buch ban’en romed fa gu dag ngomed bochu’uw i wurengan’. Bay gu gechig nagmed ni fan ko tin nib golong ni kam rin’ed, ma aram e bay mu nanged ni Gag SOMOL.”

5 Irera’ e n’en ni be yog SOMOL ni Th’abi Tolang: “Bayi malay e riya’ nga dakenmed. 6 Kema’ ni gubin. Irera’ e tungun. Kam mu’ gad. 7 Tungun e ke anog ngomed e girdi’ ni gimed be par ko re nam ney. Ke chugur ko ngiyal’ ni dab kun madnom ko pi tagil’ e meybil u daken e burey, kemus ni bay mu pired nike wagagay lanin’med.

8 “Dabki n’uw nap’an e chiney mi gimed thamiy ga’ngin gelngin e damumuw rog. Ni fan e kug gonpiy ni nge buch romed ni bochan e tin kam rin’ed, ma bay gu fulweg puluwon ngomed gubin ngongolmed ni sonogor. 9 Dab gu digeymed fa gu dag bochi marnguy ngomed. Aram e nggu gechig nagmed ni fan ko pin’en nib golong ni kam rin’ed, ma aram e bay mu nanged ni Gag SOMOL ni gag e cha’ ni gu be gechig nagmed.”

10 Yaran e riya’ e ke yib. Ke tagyet e cham. Ma tolngan’ e kemus tolngin. 11 Cham e be gargeleg e kireb ni yo’or. Dariy ban’en nra magay u pa’rad, ni pi fel’ rogon rorad, nge pi fla’ab rorad, ara bugwarad.

12 Ke taw nga nap’an. Nike chugur ko fare rran ni bayi m’ayfan e chuway’ nge falchuway’, ni bochan e gechig rok Got e bayi aw nga daken e girdi’ ni ta’reb rogon. 13 Dariy reb e siyobay nra par nib fos nib n’uw nap’an nge yag ni fulweg ngak e tin ke thay u pa’, ni bochan e damumuw rok Got e bay u daken urngin e girdi’. Ma pi’in kireb e leam rorad e dab ra fosgad. 14 Ra non e rappa me fal’eg e girdi’ rograd. Machane dariy be nra yan ko mael ya damumuw rok Got e bay i aw nga daken e girdi’ ni ta’reb rogon.

15 Bay e cham u lan e yupa’ i kanawo’, ma m’ar nge bilig e bay u lan e tabnaw. Ma en rayan nga wuru’ e binaw e ra yim’ u fithik’ e cham, ma en nu lan binaw e bayi m’ar ma be yim’ ko bilig. 16 Bochi yad e bayi mil nga burey nike rus ni bod e arche’ ni dove ni kan og ngorad u loway. Yad gubin ni bay ur mongad ni bochan e denen rorad. 17 Yad gubin ni bayi ma’ gelngin pa’rad, ma bugunrad e bayi da’da’. 18 Bay ron’ed e mad ni tutuw nga dakenrad miyad t’on nreb. Bay ni puy piyan lolugrad, ma bayi ma’ farad ni yad gubin. 19 Bay ron’ed e gol nge silber rorad ngalan e yupa’ i kanawo’ ni bod e dow, ni bochan e silber nge gol e dabiyag ni nge aywegrad u nap’an nra pu’og SOMOL e damumuw rok. Dabkiyag ni ngar faned nge gamaneg e ar ar rorad, fa suguy e yal rorad. Ya gol nge silber e fekrad i yan ko denen. 20 Immoy bangiyal’ ni ur ufanthin gad ko churwo’ rorad ni bfel’ ya’an, machane miyad fek ngar ngongliyed e pi liyos ni sonsonogor riy. Aram fan ni SOMOL e ke gagiyegnag e fla’ab rorad ke chuwan’rad riy.

21 Ga’ar SOMOL, “Bay gu pag e milekag ngar moro’ro’ gad ngorad, nge pi tamath’ab e motochiyel e bay ra feked e fla’ab rorad u pa’rad miyad m’aynag fan. 22 Bay gu sabalbalyang nigeg ko ngiyal’ ni yibe dariy fan nag e Tempel rog nib t’uf rog, ko ngiyal’ ni bay i yib e pimoro’ro’ ngar guchthuyed ngar ta’ay niged.

23 “Gubin ban’en ma ke wagagey — kesug e nam ko pi’in kan thang e fan rorad nge pi binaw nike suguy e cham. 24 Bay gu fek e pi nam ni th’abi kireb e leam rorad e ngaray mu gu pagrad ngar feked tafenmed u pa’med. Pumo’on romed nib falu’ e bayi mul’anrad u nap’an ni bay gu pag fapi nam ngar ma’ niged fan e yungin gimed ma meybil riy. 25 Mathliyab e be yib. Bay mu changar niged e gapas ma dab mu pir’eged. 26 Bayi aw reb e gafgow nga daken reb, ma bayi m’ap ni lul’ murung’agen e tin nib kireb ni be buch. Bay um weniggad ko profet ni ngar daged ngomed e tin ni kar guyed nga m’on. Dakriy ban’en nra machib nag e prist ko girdi’, ma pi’in pi’lal e dakriy e fanow ni ngar pi’ed. 27 Pilung e bay i yor, ma fak e pilung e bayi mulan’, ma girdi’ e bayi t’on ko marus. Bay gu gechig nagmed ko urngin e pin’en ni kam rin’ed, bay gu pufthin nagmed ni bod ni um pufthin niged boch e girdi’. Ni biney e bayi dag ngomed ni Gag fare SOMOL.”