1 Bin ragag e rran ko be’ech e duw, ni aram e bin rliw’ nge lal e duw nga tomuren nni fekmad ni kalbus nga wuru’ e nam ma ragag nge aningeg e duw nga tomuren ni kan kol yu Jerusalem. Rofan nem mu gu thamiy gelngin SOMOL ni bay, ma aram me chibiyeg nge fekeg i yan. 2 U lan e changar rog ni pilyeg e fekeg Got ko binaw nu Israel nge teg nga daken bburey nib tolang. Puluwon owcheg e gguy ban’en ni bod bbinaw nib ga’ nib sug ko naun. 3 Me fekeg i yan nggu chuchugur ngay, mug gguy be’ ni pumo’on ni be mat ra’en ni bod e wasey ni bronze. Nike kol ba fol nni fal’eg ko mad ni wech nge ba ley i ren ni yima foleg ban’en ngay, nib sak’iy u charen langan e garog.

4 Me ga’ar ngog, “Fak e girdi’, mu changar. Mu l’eg telim mag fal’eg i guy e tin nggu dag ngom, ya arfan ni kan fekem e ngaray. I gur e ngamog ngak e girdi’ nu Israel urngin e tin ngam guy.”

5 N’en ni gguy e ba Tempel, nib liyeg bangi rungrung ni aram e yaror riy. Fare pumo’on e fek fagi fol, ni ragag e fit n’umngin, nge foleg fare rungrung. Ma ragag e fit tolngin ma ku ragag e fit dub’agin. 6 Ma aram me yan fare pumo’on nga langan ba garog nib sap ko ngek. Me yan ko tawo’ ni yan u but’ ngalang nga langan fare garog me foleg langan fare garog u ba’niyen i yan nga ba’an naun; ma ragag e fit radan. 7 Ba’ nem riy e bay e gin yima yan riy, nra barba’ riy ma bay dalip e senggil riy ni tafen e matnag. Ra reb e pi senggil nem ma ta’reb n’umngin nge radan, ni go’ ragag e fit, ma rungrung u thilin e pi senggil nem e meruk e fit dub’agin. U ba’ nem e pi senggil ko matnag e bay bang ni yima yan riy ni ragag e fit n’umngin nib sor nga langan ba mab u reb e senggil ni yima yan riy ngalan e yoror ko ba’ ni mit fare Tempel. 8-9 Me foleg e re senggil ney me pir’eg ni ragag nge aningeg e fit u barba’ nga barba’. Ba’ ni lane yoror ko re senggil ney e bay fare garog riy nib sabaliy fare Tempel. 10 Pi senggil ni tafen e matnag u barba’ ngu barba’ e gin ni yima yan riy e go’ ta’reb ga’ngin, ma rungrung u thilthilin e go’ ta’reb dub’agin.

11 Me migid, me foleg fare mo’on radan e gin yima yan riy nga langan e garog. Ma rliw’ nge l’agruw e fit radan, ma ragag nge nel’ e fit langan e garog u barba’ nga barba’. 12 Mit fapi senggil ko matnag e bay ba yoror riy nib sobut’ ni rliw’ e inch tolngin ma rliw’ e inch dub’agin. (Fapi senggil e ragag e fit ga’ngin nge n’umngin.) 13 Ma aram me foleg thilin e rungrung u ba’ ni tabgul u reb e senggil nge yan i taw ko rungrung u ba’ ni tabgul ko fa binem e senggil ni bay u puluwon nga barba’ fa gin ni yima yan riy, ma aningeg i ragag nge l’agruw e fit pal’afngin. 14 Fare senggil nib orel e yani mab ngalan e yoror. I foleg re senggil nem me pat ngay ni guyey nge aningeg e fit radan. 15 Meruk i ragag nge aningeg e fit n’umngin fare kanawo ni tabab u wuru’ e rungrung ko garog nge mada’ nga barba’ fare senggil ni th’abi wuryel. 16 Bay yoch yang i chabal ko rungrung u wuru’ gubin fapi senggil ma ku bay ko rungrung u thilin fapi senggil. Kan ker ya’an e gek’iy ni palm nga daken e rungrung u barba’ ngu barba’ e gin yima yan riy.

17 Fare mo’on e fekeg u langan fare garog ko fare pa’ i kanawo ngalan e yoror. Ma bay guyey e senggil ni kan toy nib foch u downgin fare yoror, ma puluwon e pi senggil nem nga wean e kan filath ba thal i malang riy, 18 ni yan u rom nge liyeg lan e yoror. Lan re yoror ney e ba sobut’ ko thal ni langgin e yoror.

19 Bay reb e garog nib tolang ni yima yan riy ngalan e thal ni langgin e yoror. Fare mo’on e foleg thilin fagal garog ma 168 e fit pal’afngin.

20 Ma aram me foleg fare mo’on reb e garog ko ba’ ni lel’och ni sor ngalan e thal ni wuru’ e yoror. 21 Fa dalip i senggil ko matnag u barba’ ngu barba’ fa gin yima yan riy, nge rungrung u thilin fapi senggil, nge fare senggil ni yima yan riy nga lane thal ni l’agruw e yoror e go’ ta’reb folen ko tin ba’aram u lan e bin ngek e garog. Meruk i ragag nge aningeg e fit n’umngin fare kanawo’ ma aningeg i ragag nge l’agruw e fit radan. 22 Fare senggil nu langan e garog, nge winda, nge fapi ya’an e gek’iy ni palm e ta’reb ya’an ko tin bay ko bin ngek e garog. Medlip thal e tawo’ ni yan ngalang ko re garog ney, ma fa gin yima yan riy ngalan e yoror e kubay reb e senggil riy nib sabliy lan e yoror. 23 Puluwon e garog u lel’och nga barba’ e yoror e bay reb e garog ko thal ni l’agruw e rungrung nib sor ngalan e thal ni langgin e yoror, nri bod rogon fa bin bay u ba’ ni ngek. Fare mo’on e foleg thilin fa gal garog ma 168 e fit pal’afngin.

24 Me migid, me fekeg fare mo’on ko bin yimuch e garog, nu rom e gguyew reb e garog riy. Me foleg e ba’ ni langgin e rungrung riy nge fare senggil ni yima yan riy nga naun, ma ta’ab rogon ko fa tin ba’aram. 25 Bay e winda’ u lan fapi tafen e matnag ko biney e garog ma ku bay u lan fare senggil ni yima yan riy nga naun, ni ta’ab rogon ko fa tin ba’aram, ma ku re garog ney e meruk i ragag nge aningeg e fit n’umngin ma aningeg i ragag nge l’agruw e fit radan. 26 Medlip thal e tawo’ ni sor ngalang ko fare garog, ma fare senggil ni yima yan riy nga naun e bay u baley nib sabliy lan fare yoror. Kan ker ya’an e gek’iy ni palm nga downgin e rungrung riy nib sap ko gin yima yan riy. 27 U roy e kubay reb e garog ko thal ni langgin e yoror. Fare mo’on e foleg pal’afngin fagal garog, ma 168 e fit pal’afngin.

28 Fare mo’on e fekeg nggu warow ko bin yumuch e garog ngalan e thal ni langgin e yoror, me foleg fare garog, ma ta’reb ga’ngin ko tin ni ba’aram e garog ko fa thal ni wuru’ e rungrung. 29-30 Ra reb fapi senggil ko matnag, nge gin yima yan riy nga naun, nge thal ni langgin e rungrung e go’ ta’reb ga’ngin ko tin ba’aram e garog. Ku bay e winda u lan fapi senggil ko biney e garog. Fare garog e meruk i ragag nge aningeg e fit n’umngin ma radan e aningeg i ragag nge l’agruw e fit. 31 Gin yima yan riy nga naun e ba sabliy e bin ba’aram e yoror, ni kan ker ya’an e gek’iy ni palm nga downgin e rungrung ko gin ni yima yan riy. Meruk thal e tawo’ ni sor ngalang ko biney e garog.

32 Fare mo’on e fekeg ko fa binem e garog ni ngek ngalan e thal ni langgin e yoror. Me foleg fare garog, ma ta’reb ga’ngin ko fa tin ba’aram. 33 Pi senggil ni tafen e matnag nge gin yima yan riy nga naun, nge yungin langgin e rungrung riy e ta’reb folen ko tin ba’aram e garog. Pi senggil nem ko matnag e ba liyeg e winda, ma ku aram rogon fa binem e senggil ni yima yan riy nga naun. Fare garog e meruk i ragag nge aningeg e fit n’umngin ma aningeg i ragag nge l’agruw e fit radan. 34 Fa gin yima yan riy nga naun e ba sabliy e thal ni wuru’ e yoror. Kan ker ya’an e gek’iy ni palm nga downgin e rungrung ko gin yima yan riy. Meruk thal e tawo’ ni sor ngalang ko biney e garog.

35 Ma aram me fekeg fare mo’on ko bin lel’och e garog. Me foleg, ma ta’reb ga’ngin ko tin ba’aram. 36 Ku bod fatinef, ni ku bay e pi senggin ni tafen e matnag, ni kan nunuwnag e pi rungrung riy, nge gin yima yan riy nga naun, nge pi winda nike liyeg. Biney e garog e meruk i ragag nge aningeg e fit n’umngin ma aningeg i ragag nge l’agruw e fit radan. 37 Fa gin yima yan riy nga naun e ba sabliy e thal ni wuru’ e yoror. Kan ker ya’an e gek’iy ni palm nga downgin e rungrung ko gin yima yan riy. Meruk thal e tawo’ ni sor ngalang ko biney e garog.

38 U lan e ba’ ni wuru’ e yoror e bay boch reb e naun nib peth ko ba’ ni langgin e garog ko ba’ ni lel’och. Ni bmab ngalan fa gin yima yan riy nga nu’an nib sabliy fare yoror, ni aram e gin yima luknag e gamanman riy ni ngan orfeg ni kab polo’ ni maligach. 39 U lan e re senggil ney ni yima yan riy nga naun e bay aningeg i tabel riy, l’agruw nga barba’ e senggil ma l’agruw nga barba.’ U daken e pi tebel ney e yima li’ e gamanman riy ni ngan pi’ ni maligach, demturug ko ngan orfeg ni polo’ ara maligach ni fan ko denen ara maligach ni mathang malfith. 40 Wuru’ fare senggil e ku bay aningeg e pi tabel nem riy, l’agruw nga barba’ ma l’agruw nga barba’ e gin yima yan riy ngalan e bin lel’och e garog. 41 Gubin e pi tebel ney ni meruk ni yima li’ e gamanman u daken ni maligach: aningeg u lan e senggil ma aningeg ngalan e yoror. 42 Aningeg e tabel e bay u lan fachi naun, ni yima fanay ni ngan bangbengnag fare maligach riy ni ngan orfeg nib polo’, pi tebel nem e malang ni kan puy. Pi tebel nem e rliw’ e inch tolngin ma daken e guyey e inch n’umngin nge radan, ma gubin e tatalin e mali’ gamanman ma yima cha’riy u daken e pi tebel ney. 43 Marichalen e pi tebel nem e dalip e inch radan. Gubin e ufin ni ngan pi’ ni maligach e kan tay nga daken e pi tebel nem.

44 Ma aram me fekeg ngalan e bin langgin e yoror. Ma bay l’agruw i senggil ni bmab nga langgin e bin langgin e yoror, reb e bsap ko yimuch u charen fa bin lel’och e garog ma reb e ba sap ko lel’och u charen fa bin yimuch e garog. 45 Me yog fare mo’on ngog ni fa bin ba’aram e senggil ni bsap ko yimuch e fen e prist nma pigpig u lan fare Tempel, 46 ma senggil nib sap ko lel’och e fen e prist nma pigpig u altar. Gubin e pi prist nem ni yad owchen Zadok; karmusgad chonggin fare ganong rok Levi nni pi’ mat’wunrad ni ngranod nga mit SOMOL ngar pigpiggad ngak.

47 Fare mo’on e foleg fa bin langgin e yoror, ma 168 e fit radan ma ku aram n’umngin. Fare Tempel e bay u ba’ ni ngal riy, ma bay ba altar u mit. 48 Ma aram me fekeg fare mo’on nga langan e gin yima yan riy ngalan fare Tempel. Me foleg langan e gin yima yan riy nga langgin fare Tempel ma mereb e fit n’umngin ma rliw’ nge aningeg e fit radan ma lal e fit dub’agin e rungrung u barba’ ngu barba’. 49 Bay yu thal i tawo’ ni sor ngalang ko gin yima yan riy nga senggil, ni guyey nge aningeg e fit radan ma rliw’ e fit n’umngin. Ma bay l’agruw i rumog, nra reb ma bay u barba’ e gin yima yan riy nga naun.