1 Ngiyal’nem e immoy l’agruw i profet ni Haggai nge Zekariah ni fak Iddo, ra tababgow ko welthin u fithingan fare Got nu Israel ngak e pi Jew nma par u Judah ngu Jerusalem. 2 Nap’an ni rung’ag Zerubbabel nib mo’on ni fak Shealtiel nge Joshua nib mo’on ni fak Jehozadak e pi thin rorow, mi yow tabab i toy bayay fare Tempel nu Jerusalem, ma fagal profet e ra ayuwegew row.

3 Ma kangiyal’ nem me yib Tattenai ni governor ko ley ni ngal u Eufrates, nge Shethar Bozenai, nge pi tolang rorad nga Jerusalem ni yad be ga’ar: “Mini’ e cha’ nike yog ngomed ni ngam toyed e re Tempel ney?” 4 Mu ku ra fithed fithingan gubin e pumo’on ni yad be ayuw i toy fare Tempel. 5 Machane Got e be guy fapi tayugang’ ko Jew, ma fapi tolang nu Persia e ra leam niged ni dab rrin’ed ban’en nge taw ko ngiyal’ nrayag ni ngar yolgad ngak Darius ni Emperor nge fulweg bbug i thin ngorad. 6 Ba’aray e re thin nra pi’ed nge yan ngak fare emperor: 7 “Ngak Darius ni Emperor, mang e yug mu gagiyeg u fithik’ e gapas. 8 “Gur e en pilung e thingar mu nang ni kug warod ngalan fare gi nug nu Judah ma kug pir’eged ni fare Tempel rok fare Got nib ga’ e kan toy bayay ko malang ni gagang’ ma palang e kan ayliy ko rungrung riy. Re maruwel nem e rib fel’ rogon ni yibe ngongliy ma be yan ni rib yaram.

9 “Ere magmad fith e pi tayugang’ rok fapi girdi’ ni ngrogned ngomad ko mini’ e cha’ nike pi’ mat’awrad ni ngar toyed bayay fare Tempel. 10 Ma kug fithed fithingrad ni bochan e nge yag ni gogned ngom ko chon mini’ e ga’ ko re maruwel ney.

11 “Mar fulweged ni lungurad, ‘Gamad e tapigpig rok fare Got nu tharmiy ngu but’, ma gamad be toy bayay fare Tempel ni fa’ani toy ba pilung nib gel gelngin nu Israel kakrom. 12 Machane bochan e pi chitamangimad kakrom e ra k’aringed e damumuw ngak fare Got nu tharmiy, me pagrad nge gel Nebukadnezzar ngorad, ni pilung nu Baylonia ni ir e chuwegrad nge fekrad ni kalbus nga Babylon. Me buthug Nebuchadnezzer e tempel rorad nga but’. 13 Ma aram u lan e bin som’on e duw ni gagiyeg Cyrus ni Pilung nu Babylonia, me pi’ Cyrus e thin ni ngan toy bayay fare Tempel. 14 Me fulweg fapi talin e Tempel ni gol nge silber ni fek Nebukadnezzar ko fare Tempel nu Jerusalem nge tay ngalan fare tempel nu Babylon. I Cyrus ni fare pilung e pi’ e pi talin e tempel ney ngak be’ nib mo’on ni Sheshbazzar fithingan, ni ir e ke duwgiliy ni nge mang governor nu Judah. 15 Me yog fare pilung ngak ni nge fek e pin’em nge fulweg ko fare Tempel nu Jerusalem, ma ngki toy fare Tempel ko gin ki immoy riy ni som’on. 16 Ma aram me yib Sheshbazzar nge yib i fal’eg rogon e def riy; me tabab e dimoy riy e ngiyal’ i n’em nge mada’ ko chiney, machane dawor ni mu’nag.’

17 “Chiney, e fa’anra ba m’agan’um ngay i gur e en pilung, magog ngan gay u lan babyoren e pilung u Babylon ngan nang ko yog Cyrus ni Pilung ni ngan toy bayay e re Tempel ney u lan yu Jerusalem fa dangay, magog ngomad ko mang e n’en ni ga be leamnag ko ren’ey.”