1 Mired, gimed e girdi’ u gubin e pi nam! Mu’ulung gad ngam motoyilgad. Ga’ngin e fayleng nge gubin e pi’in ni be par u daken e nge yib ngaray nge motoyil. 2 I SOMOL e ke damumuw ngak gubin e nam nge gubin e salthaw rorad. Ke gechig nagrad ni ngan thang e pogofan rorad. 3 Pi ldow rorad e dab ni k’eyag, ma bayi par downgirad u but’ nge meal nge kireb bon; pi burey e bayi row ko racha’ rorad. 4 Yal’, nge pul, nge pi t’uf e bayi pilpil nge ngal’ ni fiyath. Lanelang e ra chuw ni bod bangi babyor ni kan bachiy, ma pi t’uf e ra mul ni bod yuwan e gek’iy ni grape fa gek’iy ni fig ni mulmul. Rev 6:13–14

5 I SOMOL e ke flagin rogon e saydon rok u tharmiy, ma chiney e nge aw nga Edom, ko fapi girdi’ nike gechig nagrad ni ngan thang e pogofan rorad. 6 Saydon rok e bayi pen ko racha’ rorad nge mam, ni bod e racha’ nge mam u pifak e saf nge kaming ni yima maligach ngay. I SOMOL e bayi pi’ e re maligach ney u lan e binaw nu Bozrah; bayi gagiyegnag ngan cham nib almarin u daken e but’ nu Edom. 7 Girdi’ e bay i thig ni bod e gamanman ni garbaw ni malboch nge pifak e garbaw, ma fayleng e bayi row ko racha’ me sug daken ko mam. 8 Irera’ e ngiyal ni bay ayuweg SOMOL yu Zion nge falbeyen e pi to’ogor rok.

9 Pi lul’ nu Edom e bayi ngal’ ni pich, me pig e but’ nge ngal’ ni sulfur. Ga’ngin fare binaw nra dararam ni bod e pich. 10 Bayi gak’ ni rran nge nep’, ma be yan e ath riy ngalang ni dariy n’umngin nap’an. Fare but’ e bayi par ni dakriy e fel’ riy u reb e mfen ngu reb, ma dariy be’ ni bay ki milekag u rom bingyal’. 11 Ma arche’ ni owl nge gapluw e bay ra tafned fare binaw. I SOMOL e bayi gagyeynag bayay nge par ndariy ban’en ni bfel’ riy, ni bod rogon ko som’on ni sunmiy urngin ban’en. 12 Dariy reb e pilung ni bayki gagiyegnag fare binaw, ma pi tayugang’ riy e dakriy bagyad ni kabay. 13 Rachangal e bayi tugul u gubin tafen e pilung nge fa yochi binaw ni kan ngongliy e rungrung riy, ma bayi tafnay e jackal nge owl. 14 Gamanman ni malboch e bay ur derawgad u rom, ma mo’niyan’ e bay ur piningedyad. Kan e nep’* KAN E NEP’: Ba mo’oniyan’ ni bpin ni yima leamnag nma par ko yungin dakriy be’ nma par riy. e bayib ngaram ni be changarnag e gin nge gif ngay. 15 Arche’ ni owl e bay ra toyed taferad, ngar ted e pi tamango’ rorad riy miyad bilig ngu’ur chathowliyyed u rom. Arche’ ni vulture e bay ra malaygad ngar mokungad ngaram.

16 U lan fare ke babyor rok SOMOL e rayag ni ngam sapnag ngam pir’eg e gin kan yoloy ngay ni be yog riy, ni dariy ta’reb e tin ni sunmiy Got nra malog, ma dariy reb nra par ndariy e pluw rok. I SOMOL e keyog ni aray rogon; i ir e bayi kunuyrad nga ta’bang. 17 I SOMOL e ir e ra f’oth e binaw rorad nge pi’ ngorad nra bagyad ma pi’ e gi rok. Bay ra pired riy u reb e mfen ngu reb, nge milfan ngorad ndariy n’umngin nap’an.