47
Pufthin nga daken yu Babylon
1 SOMOL e ga’ar,
“Babylon, mu luw nga but’ ko liw rom,
ngam par nga fithik’ e ab u daken e but’.
Ummoy bingyal’ ni ga bod be’ ni bpin ni dawori nang e pumo’on, nib binaw ni dawor i waer ko mael,
machane dakriy fal’ngim ngabang!
Chiney e gur e sib! 47:1–15 Isa 13:1–14; 23; Jer 50:1–45
2 Mu cheleg e malang nib tlulbuy! Ngam blig e wheat ngay!
Mu luf e mad u owchem ma ga luf e mad u dakenam ni fafalel’!
Mu ker e sikato rom ngalang ngam th’ab e pi lul’.
3 Girdi’ e bay ra guyed gur ni dariy e mad u dakenam;
bay ra guyed gur nike m’ingkuwom ka mu tamra’.
Bay gu fulweg taban ngorad, ndariy be’ nrayag ni nge talegneg.”
4 Fare Got nib thothup nu Israel e ke pithigdad
fithngan e SOMOL ni Gubin ma Rayag Rok.
5 Be ga’ar SOMOL ngak yu Babylon,
“Mu par nib math gulngam u fithik’ e lumor;
dakriy e ngiyal’ ni ku yira piningem ni gur fare bpin ni pilung ko pi nam!
6 Kug damumuw ko girdi’ rog;
kug ta’rad ni gowa gathi ku yad e girdi’ rog:
Kug tayrad nga tan gelngim,
ma da mu dag e runguy ngorad’;
ni mus ko tin ke pilibthir ma ga be gafgow nagrad.
7 Ka mu leamnag ni yug bay um par ni gur e bpin ni pilung,
ma dam tay e pin’ey u lanin’um
ara mu leamnag rogon ni bayi yan i aw.
8 “Ngam motoy ko ran’ey, i gur ni go’ fiti lanin’um e ga ma leamnag,
gur ni ga ma leamnag ni gab muduwgil ni dariy ban’en nra buch rom.
Ga ma yog nib ta’reb fanmew sorok Got —
ni dariy be’ ni bodem.
Um leamnag ni dariy e ngiyal’ ni nge yim’ figirngim
ara pifakam.
9 Machane u lan ta’boch ngiyal’, u ta’abo rran,
ma l’agruw e galin’ey nra buch.
Dariyfan urngin e pig ni um tay,
ma figirngim nge pifakam e bay ra mulgad u pa’am.
10 “I pagan’um ngom u fithik’ e kireb rom;
um leamnag ni dariy be’ nrayag ni nge guyem.
Gonop rom nge fanam llowan’ e ke waliyem nga wuru’ e wo’,
mag ga’ar u wun’um, ‘I gag Got —
dariy be’ ni bodeg.’
11 Riya’ e bayib nga dakenam,
ma dariy reb e pig rom nrayag ni nge taleg.
Ba tomgin nra machade’ nigem e gafgow —
ni gafgow ni da i bit ngan’um!
12 Mu cha’riy urngin e pig rom nge bey;
ni um muruwliy nnap’an ni ka gab bitir.
Sana ra yib boch angin ngom;
dabisiy nrayag ni nge tamdag e pi to’ogor rom ngay.
13 Gab me’waer nike mayfan e fanow ni yag ngom.
Mu pag e pi’in yad ma bon ko t’uf ngarbad ra aywegned gur
picha’nem ni yad ma fil murung’agen e t’uf,
ni pi’in ma fal’eg babyoren e mathil ko pi tharmiy
ma urogned ngom u reb e pul ngu reb
e n’en ni bayi buch rom.
14 “Bay ra boded chabngen e ro’uy,
ma ba nifiy e ra orfegrad!
Dariy bagyad nrayag ni nge ayweg ir riy
daramram riy e kay gi gowal ngorad,
gathi bochi nifiy ni ngu’ur rorgad riy.
15 Kemus rogon e tin ni bfel’ ni yad ra rin’ ngom
fapi girdi’ nma yaliy lanelang ni um de’eriy e fanow rorad u n’umngin nap’an e yafos rom.
Go’ bay ra paged gur nge bagyad me yan,
ni dabi magach be’ ni nge aywegem.”
DRAFT VERSION — Proofreading in progress