1 Girdi’ nib mat’aw e ra yim’, ma dariy be’ ni manang fan ara i lem nag. Machane yad ra yim’ ma dakuriy ban’en ni ra buch rorad. 2 Pi’in ni ur pired nib manigil ngongolrad e yad ra pir’eg e gapas nge toffan ko yam’ ni yad ra tay.

3 Gimed e pi tadenen mired ngaray ngan pufthin nagmed! Dariy e thilthil romed ngak e pi tapig nge pi’in yad ma tayfan yug boch e got nge pi’in yad ma falchuway’ ngorad. 4 Mini’ e en gimed be moningnag? Mini’ e en gimed be kak’ring gimed e pi sasalap l’ungun nir? 5 Gimed ma tay fan e pi got ko yong’ol ni gimed ma ngongliy e ngongol ni darngal u tan fa yuke gek’iy romed nib machmach. Ma gimed be pi’ pifakmed ni maligach u tan e war u charen e lul’. 6 Gimed be fek e malang nib sapachpach downgin u lan e yochpa’ i lul’ ngu’um ted fan ni aram e pi got romed. Ma gimed ma pu’og e wayin mi gimed be pi e grain ni maligach romed ngorad. Gimed be leamnag ma bm’ag u wun’ug urngin e pinn’ir? 7 Kam marod ko burey ntotolang ni ngam pi’ed e maligach romed ma gimed be ngongliy e ngongol ko darngal. 8 Kam ted e liyos ni ya’an boch e got nsonsonogor nga ba’ nnaun ko mab romed. Ka mu n’igedgag; gimed be luf e mad u dakenmed gimed be fek ilingmed ni ka mu pi’ed puluwon ni ngam molaged, nga daken yungi chob romed nib ga’ radan. Ni aram e gin ni chum’er e ar’ar romed riy. 9 Ma gimed be thiy ko florida nge gapgep romed ni ngu’um marod meybilgad ngak Molek. Mi gimed be l’oeg e pi tama’log romed nga orel nib palog, ni ngar gaweged boch e got ni ngu’um tedfan, ni mus ko fayleng ko yam’ ni ka ra tawgad ngay. 10 Ke aw parawmed i chachangarnag yug boch e got, machane damur tal gad. Gimed be leamnag ni pi got romed nir ni golong e ra pi’ gelingmed, nge dabki m’ay gelngimed.

11 I SOMOL e ga’ar, “Mini’ e tiney e got nike k’aring e marus ngomed, ni gimed be ban nigeg ma kug chuw u lanin’med? Fan ni dakmur liyorgad ngog e bochan e ke n’uw nap’an ni kug th’ab gulngag? 12 Gimed be leamnag ni n’en ni gimed be rin’ e bmat’aw, machane bay gu pug e upong u daken e gafarig romed, ma pi got romed e dabiyag nra ayweged gimed. 13 Ngiyal’ ni gimed ra ning e ayuw, ma bayi mang fapi liyos romed e aywegmed! Ma bbuwchuth i nifeng e ra changag nagrad! Machane pi’in ma pagan’rad ngog e yad ra magach u daken e binaw mu ur liyorgad ngog u lan e Tempel rog.”

14 I SOMOL e ga’ar, “Ngan pag e girdi’ rog nge sul ngog. Ngan chuweg urngin e tin be dubchey u kanawo’ rorad! Ngan fal’eg e kanawo’ ngan felfal’eg rogon nge par!

15 “I gag fare Got nib tolang ma ba thothup, ni gu ma par ni gu fos ni urun. Gu ma par u bang nib tolang ma ba thothup, ma kug ma par ko girdi’ nib sobut’an’ ma kar pi’ed keru’rad ko kireb rorad, ya nge yag ni gu fulweg e pagan’ nge lagan’ ngorad. 16 Gu pi’ e yofos ko girdi’ rog, ma dab ug par ni yuggu be puwan’ ngorad ara gu par ni gub damumuw ngorad ndariy n’umngin nap’an. 17 Gu damumuw ngorad ni bochan e denen rorad, ma go’ yad e ngi i fel’ ngorad, ma aram mu ggechig nagrad nggu n’agrad. Machane rib gelan’rad ki yad be yan u kanawo’ rorad ni kireb.

18 “Kug guy rogon ni yad be ngongol, machane bay ggol nagrad. Bay gu pow’iyrad mu gu ayuwegrad, ma bay gu fel’eg laniyan’ e pi’in ke kireban’rad. 19 Ma bay gu pi’ e gapas ngak gubin e girdi’, ni tin yad ba chugur nge tin yad bpalog! Bay gu golnag e girdi’ rog. Efe 2:17 20 Machane girdi’ nib kireb e yad bod e day nib mayko’, ni dar aw e mocha’ ko n’ew riy, ni be fek i yib e duwor nge rungdu’. 21  SOMOL e be ga’ar, “Dariy e gapas ni fen e pi’in tadenen.”